ຊາວລາວ ປະສົບກັບບັນຫາ ການຖິ້ມຂີ້ເຫຍື້ອ ຊະຊາຍ ຕາມຖນົນຫົນທາງ ໃນ ນະຄອນຫລວງ ວຽງຈັນ ໂດຍສະເພາະ ຕາມຫົນທາງ ໃນເຂດ ເມືອງຫາດຊາຍຟອງ. ດັ່ງຊາວລາວ ຜູ້ນຶ່ງ ທີ່ອາສັຍຢູ່ ໃນເຂດນີ້ເວົ້າວ່າ:
“ສ່ວນຫລາຍ ທາງເມືອງ ຫາດຊາຍຟ້ອງ ຫ່ັນມັນມັກ ມີບັນຫາຖິ້ມຂີ້ເຫຍື້ອ ຊະຊາຍນີ່ນະ ຫລືວ່າ ຂະເຈົ້າ ບໍ່ໄປເຮັດສັນຍາ ບໍ່ ຫລືວ່າ ຂະເຈົ້າ ເຮັດຈັງໃດຫະນະ ເຮົາກໍຍັງ ບໍ່ເຂົ້າໃຈ ໄປເຂດນັ້ນ ມັນມີແຕ່ເຂດ ໂຮງງານ ເບັຍນະ.”
ຊາວເມືອງຫາດຊາຍຟອງ ຜູ້ນີ້ເວົ້າອີກວ່າ ບໍຣິເວນໃກ້ໆໂຮງງານເບັຍ ແລະ ແປັບຊີ ຕາມຖນົນ ທ່າເດື່ອ ປະກົດວ່າ ມີຂີ້ເຫຍື້ອ ຖິ້ມຊະຊາຍ ຫລາຍກວ່າບ່ອນອື່ນ ເຮັດໃຫ້ ຖນົນຫົນທາງ ບໍ່ສວຍງາມ ແລະ ສົ່ງກິ່ນເໝັນໄປທົ່ວ. ນອກຈາກຖນົນທ່າເດື່ອ ແລ້ວຕາມຖນົນ ເລກທີ່ 450 ປີ ເສັ້ນທາງເລກ 21 ເສັ້ນທາງ ບ້ານນາຄວາຍ ແລະ ໜອງບົວທອງ ກໍມີແຕ່ ຂີ້ເຫຍື້ອ ຖິ້ມຊະຊາຍບໍ່ເປັນຣະບຽບຮຽນຮ້ອຍ. ຕາມຮ່ອງນ້ຳ ຕ່າງໆ ກໍເຊັ່ນດຽວກັນ ເຕັມແຕ່ຂີ້ເຫຍື້ອ ເໝົ່າເໝັນ.
ນັກຂ່າວ ຂອງພວກເຮົາ ໂທຣະສັບ ໄປຖາມຫ້ອງການ ພັທນາ ແລະ ບໍຣິຫານ ຕົວເມືອງ ນະຄອນຫລວງ ວຽງຈັນ ຈື່ງໄດ້ຮັບ ຄຳຊີ້ແຈງ ພຽງແຕ່ວ່າທາງການນະຄອນຫລວງ ບໍ່ມີໜ້າທີ່ຮັບຜິດຊອບ ໃນການເກັບຂີ້ເຫຍື້ອ ນັ້ນເລີຍເພາະໄດ້ໃຫ້ ສັມປະທານ ແກ່ບໍຣິສັດ ເອກກະຊົນ ຮັບເໝົາ ເກັບຂີ້ເຫຍື້ອ ແລະ ທຳຣາຍຂີ້ເຫຍື້ອ ໄປແລ້ວ.
