ໂຄງການພັທນາ ເພື່ອຫລຸດຜ່ອນ ຄວາມທຸກຍາກ ຂອງ ປະຊາຊົນ ໃນເຂດ ຊົນນະບົດ ຂອງລາວ ໄດ້ຮັບ ງົບປະມານ ພຽງ 15% ຂອງຈໍານວນ ທີ່ ຕ້ອງການ ໃນ ແຕ່ລະປີ.
ເຈົ້າໜ້າທີ່ ໃນ ຄະນະພັທນາ ຊົນນະບົດ ແລະ ລົບລ້າງ ຄວາມທຸກຍາກ ຂອງ ຣັຖບາລລາວ ຜູ້ບໍ່ປະສົງ ອອກຊື່ ທ່ານນຶ່ງ ເປີດເຜີຍຕໍ່ຜູ້ສື່ ຂ່າວເອເຊັຍເສຣີ ໃນທ້າຍ ສັປດາ ຜ່ານມາ ແລະຮັບວ່າ ເປັນການຍາກ ທີ່ ຣັຖບາລລາວ ຈະເຮັດໃຫ້ ເປົ້າໝາຽ ສະຫັດສະວັດ ການພັທນາ ເພື່ອລົບລ້າງ ຄວາມທຸກຍາກ ຂອງ ປະຊາຊົນ ໃນເຂດ ຊົນນະບົດ ຂອງລາວ ບັນລຸໄດ້ ຢ່າງແທ້ຈິງ ໃນປີ 2015 ເນື່ອງຈາກວ່າ ໃນຣະຍະ ເຄິ່ງທາງ ຂອງແຜນການ 5 ປີ (2011-20105) ທີ່ ຜ່ານມາ ຣັຖບາລລາວ ສາມາດ ສນອງງົບປະມານ ໃຫ້ໂຄງການ ພັທນາ ຊົນນະບົດ ໃນທົ່ວປະເທສ ໄດ້ພຽງ 15% ຂອງຄວາມຕ້ອງ ການຕົວຈິງ ໃນແຕ່ລະປີ ຄືໄດ້ພຽງ 113 ຕື້ກວ່າ ກີບ ເທົ່ານັ້ນ.
ໂຄງການພັທນາ ຊົນນະບົດ ຂອງລາວ ປະກອບ ດ້ວຍ 167 ເຂດຈຸດສຸມ ໃນ 64 ເມືອງ ຊຶ່ງປະຊາຊົນ ມີຊີວິດການເປັນຢູ່ທຸກຍາກທີ່ສຸດ ນັ້ນ ມີຄວາມຕ້ອງການ ງົບປະມານ ໃນແຕ່ລະປີ ບໍ່ໜ້ອຍກວ່າ 755 ຕື້ກີບ. ແຕ່ປາກົດວ່າ ໃນຣະ ຍະ 2 ປີເຄິ່ງ ຜ່ານມານີ້ ຣັຖບາລລາວ ສາມາດສນອງ ໃຫ້ໄດ້ພຽງແຕ່ 394 ຕື້ກີບ ຊຶ່ງເທົ່າກັບ 10.43% ຂອງ ແຜນການ 5 ປີ ເທົ່ານັ້ນ.
ເຈົ້າໜ້າທີ່ ທ່ານນີ້ ເວົ້າວ່າ ສາເຫດສໍາຄັນ ທີ່ເຮັດໃຫ້ ຣັຖບາລລາວ ບໍ່ສາມາດ ຕອບສນອງ ງົບປະມານໄດ້ ຕາມແຜນການ ທີ່ວາງໄວ້ນັ້ນ ກໍຍ້ອນວ່າ ບໍ່ສາມາດເກັບ ຣາຍຮັບໄດ້ຕາມ ແຜນການ ແລະ ການໃຊ້ຈ່າຍ ງົບປະມານ ຂອງ ຣັຖບາລ ທັງໃນສູນກາງ ແລະ ຢູ່ທ້ອງຖິ່ນ ບໍ່ມີ ປະສິທິພາບ ແລະ ທັງມີການ ສໍ້ຣາສບັງຫລວງ ຢ່າງກວ້າງຂວາງ.
ດັ່ງນັ້ນ ຈຶ່ງເຮັດໃຫ້ ງົບປະມານ ທີ່ໄດ້ໜ້ອຍ ຢູ່ແລ້ວ ນັ້ນສ່ວນຫລາຍ ບໍ່ຕົກໄປເຖິງ ການພັທນາ ໃນເຂດ ຊົນນະບົດ. ບັນຫາ ຕິດຕາມມາ ຄືປະຊາຊົນ ຍັງທຸກ ຢູ່ຄືເກົ່າ, ຣາຽໄດ້ຂອງ ປະຊາຊົນ ໃນເຂດ ນະຄອນຫລວງ ວຽງຈັນ ແຕກໂຕນ ກັນຫລາຍ ທຽບກັບແຂວງ ອື່ນໆ ເຊັ່ນແຂວງ ອັດຕະປື ແຕກໂຕນ ກັນເຖິງ 10 ກວ່າເທົ່າ.
