ຄນະຜູ້ແທນ ຣັຖສະພາ ຕ່າງປະເທດ ເດີນທາງໄປ ສປປລາວ ອີກເປັນເທື່ອ ທີ 3 ຣະຫວ່າງວັນ ທີ 25 ຫາ 27 ສິງຫານີ້ ເພື່ອຂໍຊາບ ເຖິງຄວາມຄືບໜ້າ ໃນການສືບສວນ ສອບສວນ ຊອກຫາ ທ່ານ ສົມບັດ ສົມພອນ ທີ່ ຫາຍສາບສູນໄປ ແຕ່ວັນທີ 15 ທັນວາ ປີ 2012 ຢູ່ ນະຄອນຫລວງ ວຽງຈັນ.
ແລະໃນວັນທີ 28 ສິງຫາ ທາງຄນະຜູ້ແທນ ຣັຖສະພາ ຕ່າງປະເທດ ກໍຈະຈັດ ຖແລງຂ່າວ ຢູ່ທີ່ ສະໂມສອນ ນັກຂ່າວ ຕ່າງປະເທດ ໃນບາງກອກ ປະເທດໄທ ເພື່ອສະເນີຣາຍງານ ຜົລການ ຢ້ຽມຢາມນັ້ນ. ທ່ານ ສົມບັດ ສົມພອນ ເປັນນັກພັທນາ ທີ່ໄດ້ຮັບ ການນັບຖື ແລະຍົກຍ້ອງ ຢ່າງກວ້າງຂວາງ ໃນການສຶກສາ ແລະ ການພັທນາ ແບບຍືນຍົງ ໃນສປປລາວ ແລະ ທ່ານກໍໄດ້ຮັບ ລາງວັນ ກຽດຕິຄຸນ ຂອງເອເຊັຽ Ramon Magsaysay ໃນປີ 2005 ໃນຖານະ ເປັນຜູ້ນໍາ ຊຸມຊົນ ທີ່ດີເດັ່ນ ຂອງລາວ.
ຕາມບັນທຶກ ກ້ອງວົງຈອນປິດ ທີ່ ຖືກເຜີຍແພ່ 2 ມື້ຕໍ່ມານັ້ນ ບົ່ງບອກວ່າ ທ່ານ ສົມບັດ ສົມພອນ ຖືກຕໍາຣວດ ຈະລາຈອນ ຢຸດຣົດ, ຣົດຂອງທ່ານ ມີຄົນທີ່ບໍ່ຮູ້ ວ່າເປັນໃຜ ຂັບໜີໄປ. ຫລັງຈາກນັ້ນ ມີ 2-3 ຄົນ ບໍ່ຮູ້ວ່າເປັນໃຜ ນໍາຕົວ ທ່ານສົມບັດ ສົມພອນ ຂຶ້ນຣົດໄປ.
ຣັຖບານລາວ ອ້າງວ່າ ບໍ່ຮູ້ເຫັນ ກ່ຽວກັບ ການລັກພາຕົວ ທ່ານ ແລະ ບໍ່ຮູ້ວ່າທ່ານ ຢູ່ບ່ອນໃດ ແລະ ໄດ້ ຢືນຢັນວ່າ ກໍາລັງສືບສວນ ສອບສວນ ກ່ຽວກັບເຣື່ອງນີ້ຢູ່. ຢ່າງໃດກໍຕາມ 8 ເດືອນ ພາຍຫລັງທີ່ ທ່ານຫາຍສາບສູນ ທາງການລາວ ບໍ່ໄດ້ໃຫ້ຂໍ້ມູລ ເຣື່ອງຄວາມ ຄືບໜ້າ ແລະຜົລການ ສືບສວນສອບສວນ ທີ່ມີຄວາມໝາຍໃດໆ.
ນັບແຕ່ຕົ້ນປີ 2013 ນີ້ມາ ອົງການ ສິດທິມະນຸດ ໃນພາກພື້ນ ແລະ ເຄືອຂ່າຍ ທາງສັງຄົມ ໄດ້ເດີນທາງໄປ ນະຄອນຫລວງ ວຽງຈັນ ແລະພົບປະກັບ ເຈົ້າໜ້າທີ່ ຂັ້ນສູງ ຂອງຣັຖບານ ແລະ ສະພາແຫ່ງຊາດລາວ ເພື່ອສະແດງຄວາມ ເປັນຫ່ວງຢ່າງຍິ່ງ ກ່ຽວກັບການ ຫາຍສາບສູນ ຂອງທ່ານ ສົມບັດ ແລະ ຫາຣືເຣື່ອງການ ດໍາເນີນ ທີ່ອາຈເປັນໄປໄດ້ ເພື່ອຊອກຫາ ທ່ານ ສົມບັດ ແລະ ຊ່ວຍໃຫ້ທ່ານ ກັບຄືນສູ່ ຄອບຄົວ ຂອງທ່ານ ດ້ວຍ ຄວາມປອດພັຍ.
ໄປເຫັນຄຳເຫັນຢູ່ໃນເຟກບຸກຂອງຄົນລາວ ເຂົາວ່າຄົນທີ່ຂີ່ລົດມາທີ່ຈັບ ດຣ ສົມບັດ ສົມພອນ ເຫັນຮູ້ຮອດເລກທະບຽນລົດ ແລະເຫດເກີດໃນປ້ອມຕຳຫລວດອີກ ຄຳເຫັນຕ່າງໆເຂົາກະວ່າບໍຢາກເວົ້າຫລາຍ ຈັກຫນ້ອຍຊິຫາຍສາບສູນຄືກັນ ມັນກະເປັນຕາຫນ້າຄຶດຢູ່ໄດນໍ ແລະ ໃນເວບຂອງຄົນລາວເຂົາກະເບິງແລະມອງໄປໃນລັກສະນະດຽວກັນກະຄື ມີຄົນໃຊ້ອຳນາດເຫນືອກົດຫມາຍສັ່ງການ ກໍລະນີຫາຍສາບສູນຄິດວ່າ ບໍແມ່ນແຕ່ກໍລະນີ ດຽວຍັງມີຫລາຍໆກໍລະນີ ແຕ່ມັນບໍເປັນຂ່າວນອງນັນ ຍ້ອນດຣສົມບັດສົມພອນ ເປັນຄົນດີຄົນດັງ ຄົນມີບົດບາດ ໃນສັງຄົມໃນເວທີສາກົນ ກະເລີຍເປັນຂ່າວ. ສະນັ້ນພວກເຮົາກະລໍຄອຍເບິ່ງຄວາມຄືບຫນ້າ ເບີງຄວາມສາມາດຂອງຜູ້ຮັບຜິດຊອບ ແນວໄດກະຂໍໃຫ້ເລື່ອງກະຈ່າງແຈ້ງ ໄວໆ.
