ເມື່ອວັນທີ 28 ສິງຫາ 2013 ຄນະຜູ້ແທນ ຣັຖສະພາ ຕ່າງປະເທດ ໄດ້ຖແລງຂ່າວ ຢູ່ບາງກອກ ກ່ຽວກັບ ຜົລການຢ້ຽມຢາມ ສປປລາວ ເພື່ອຂໍຮູ້ເຣື້ອງ ການສືບສວນ ສອບສວນຫາ ທ່ານ ສົມບັດ ສົມພອນ ທີ່ຫາຍສາບສູນ ແຕ່ວັນທີ 15 ທັນວາ 2012 ຊຶ່ງທາງ ຄນະຜູ້ແທນ ກໍໄດ້ຮັບ ຄໍາຕອບວ່າ ບໍ່ມີຄວາມຄືບໜ້າ. ດັ່ງທ່ານ Sorem Bo Sondergaard ຜູ້ແທນຣັຖສະພາ ຈາກປະເທດ Sweden ກ່າວຕອນນຶ່ງ ວ່າ:
"ທ່ານວ່າ ລາວ ຈໍາເປັນທີ່ຈະຕ້ອງ ມີການພົວພັນ ຮ່ວມມື ກັບຕ່າງປະເທດ ກັບປະເທດ ສະຫະພາບຢູໂຣບ ປະເທດອາຊຽນ ໃຫ້ດີຂຶ້ນ. ທ່ານວ່າ ມີອີກຫລາຍເຣື່ອງ ທີ່ຕ້ອງ ຫາຣືກັນ ຊຶ່ງ ໃນບັນຫານີ້ ເປັນເຣື່ອງບໍ່ຄັກບໍ່ແນ່ ຖ້າຫາກວ່າ ຜູ້ແທນຣັຖສະພາຕ່າງປະເທດ ຕ້ອງມາ ຖົກຖຽງກັນ ເຣື່ອງ ການຫາຍສາບສູນ ຂອງ ທ່ານສົມບັດ ສົມພອນ ຢູ່ຕໍ່ໄປ".
ທ່ານ ເວົ້າຕື່ມວ່າ ໃນການພົບປະ ກັບ ທ່ານ ໄຊສົມພອນ ພົມວິຫານ ຮອງປະທານ ສະພາແຫ່ງຊາດຮວມເຖິງເຈົ້າໜ້າທີ່ ຂັ້ນສູງ ກະຊວງ ການຕ່າງປະເທດ ເຈົ້າໜ້າທີ່ລາວ ຊີ້ແຈງວ່າ ຍັງບໍ່ມີ ຄວາມຄືບໜ້າ ໃນ ການສືບສວນ ສອບສວນ ຫາ ທ່ານ ສົມບັດ ສົມພອນ. ແຕ່ເຖິງ ຢ່າງໃດກໍຕາມ ທາງ ຣັຖບານລາວ ກໍຢືນຢັນ ວ່າຈະດໍາເນີນການ ເຣື່ອງນີ້ ຕໍ່ໄປ.
ພ້ອມດຽວກັນນັ້ນ ຄນະຜູ້ແທນ ຣັຖສະພາ ຕ່າງປະເທດ ຍັງໄດ້ຣາຍງານ ໃຫ້ ຣັຖບານລາວ ຊາບ ກ່ຽວກັບ ເຣື່ອງທີ່ວ່າ ເຈົ້າໜ້າທີ່ ຕໍາຣວດ ສືບສວນສອບສວນ ໄດ້ບອກຄອບຄົວ ຂອງ ທ່ານ ສົມບັດ ວ່າ ທາງຕໍາຣວດໄດ້ໂຈະການ ສືບສວນສອບສວນເຣື່ອງ ທ່ານ ສົມບັດ ແລ້ວ, ໄດ້ສົ່ງຄະດີ ໄປຍັງພາກສ່ວນ ທີ່ສູງກວ່າ ແຕ່ ເຈົ້າໜ້າທີ່ ລາວ ບອກວ່າບໍ່ຮູ້ ກ່ຽວກັບ ຄໍາສັງນັ້ນ ແຕ່ຢ່າງໃດ ແລະວ່າ ມີຄນະກັມມະການ ຂອງ ກະຊວງປ້ອງກັນ ຄວາມສງົບ ເຂົ້າຮັບຜິດຊອບ ວຽກສືບສວນ ໃນເຣື່ອງນີ້.
ການເດີນທາງ ໄປສປປລາວ ຂອງ ຄນະຜູ້ແທນຣັຖສະພາ ຕ່າງປະເທດ ມີຂຶ້ນ ຣະຫວ່າງວັນທີ 25 ຫາ 27 ສິງຫາ 2013.
