ສະມາຊິກສະພາຢູໂຣບ ທ່ານນຶ່ງ ເຕືອນໃນມື້ວັນພຸດ ວ່າ ສປປລາວ ເມີນເສີຍຕໍ່ ການຫາຍສາບສູນ ຂອງຫົວຫນ້ານັກພັທນາຊຸມຊົນ ຄົນ ສຳຄັນຂອງລາວ ທ່ານສົມບັດ ສົມພອນ ແຕ່ຢ່າຄາດຫວັງວ່າ ສະພາຢູໂຣບ ຈະຢຸດໃນບັນຫາດັ່ງກ່າວ. ທ່ານ Soren Bo Sondergaard ສະມາຊິກສະພາຢູໂຣບຈາກປະເທດ Denmark ຜູ້ຊຶ່ງນຳພາ ຄນະຜູ້ແທນ ຈາກຫລາຍປະເທດ ເຂົ້າໄປ ນະຄອນຫລວງວຽງຈັນ ໃນວັນຈັນ ເວົ້າວ່າ ສປປລາວ ຍັງປະຕິເສດກ່ຽວກັບ ການບີບບັງຄັບ ການຫາຍສາບສູນ ຂອງ ທ່ານ ສົມບັດສົມພອນ ຢູ່ ແລະໃນມື້ວັນອັງຄານ ທ່ານ ໄດ້ສົ່ງສັນຍານ ໄປຫາຜູ້ນຳລາວ ວ່າ ຄະດີດັ່ງກ່າວ ຈະບໍ່ຍຸຕິລົງ ໂດຍງ່າຍ.
ທ່ານ ສົມບັດສົມພອນ ນັກຕໍ່ສູ້ເພື່ອຊຸມຊົນ ຜູ້ທີ່ກ້າປາກກ້າເວົ້າ ຖືກກັກໂຕທີ່ ດ່ານກວດຣົຖສະຖານີຕຳຣວດ ທີ່ນະຄອນຫລວງວຽງຈັນ ໃນມື້ ວັນທີ 15 ທັນວາ 2012 ກ້ອງວົງຈອນປິດ ຂອງທາງການລາວ ໄດ້ບັນທຶກພາບ ການຈັບກຸມແລະບັງຄັບ ໃຫ້ທ່ານຂຶ້ນຣົຖກະບະຄັນນຶ່ງແລ້ວ ຂັບຫນີໄປ ດ້ວຍຄວາມໄວ ຕໍ່ຈາກນັ້ນມາ ກໍບໍ່ເຫັນທ່ານເລີຍ.
ທ່ານ Sondergaard ຍັງບໍ່ໄດ້ເອີ່ຍເຖິງ ການລົງໂທດທາງດ້ານເສຖກິດ ຕໍ່ ສປປລາວໃນບັນຫາດັ່ງກ່າວເທຶ່ອ ມີແຕ່ບອກວ່າ ສະພາຢູໂຣບ ສາມາດກີດກັ້ນ ສປປລາວ ບໍ່ໃຫ້ເປັນສະມາຊິກສະພາສິດທິມະນຸດ ອົງການສຫະປະຊາຊາດ ຫລືການທີ່ສປປລາວຈະອອກ ຈາກຖານະການ ເປັນປະເທດ ດ້ອຍພັທນາ ມາໃຊ້ເປັນມາຕການໃນການບັງຄັບ ສປປລາວ ຊຶ່ງເປັນນຶ່ງໃນບັນດາ ປະເທດຄອມມຸນິດ ທີ່ຍັງເຫລືອຢູ່ໃນໂລກ.
