ໃນວັນທີ 2 ກັນຍາ 2013 ສະມາຊິກ ຂອງ ຂະບວນການ ເພື່ອ ສິທທິມະນຸສ ແລະ ປະຊາທິປະໄຕລາວ ຫລື ຂສປລ ໃນ ອອສເຕຣເລັຽ ປະຈໍານະຄອນຊິດນີ ໄດ້ເຂົ້າພົບ ທ່ານ Chris Bowen ຣັຖມົນກະຊວງການເງິນ ຣັຖບານກາງ ຊຶ່ງເປັນສະມາຊິກຈາກເຂດເລືອກ ຕັ້ງທ້ອງ ຖີ່ນ ຂອງຣັຖບານກາງ ອອສເຕຣເລັຽ.
ຄນະສະມາຊິກ ຂສປລ ປະກອບດ້ວຍປະທານ ຮອງປະທານ ຜູ້ປະສານງານ ແລະສະມາຊິກເພື່ອປຶກສາຫາລືໃນບັນຫາ ການລ່ວງລະເມີດ ສິທທິມະນຸສ ໃນລາວ ເຊັ່ນການ ຫາຍສາບສູນໄປ ຂອງ ດຣ ສົມບັດ ສົມພອນ ຕັ້ງແຕ່ເດືອນ ທັນວາ 2012 ແລະ ເຫດການອື່ນໆ ທີ່ໄດ້ ເກີດຂຶ້ນໃນລາວ. ນອກຈາກນັ້ນ ທາງຄນະສະມາຊິກ ຍັງໄດ້ປຶກສາຫາລືກັບ ທ່ານ Chris Bowen ກ່ຽວກັບການໃຊ້ສີທແລະການປະກອບ ສ່ວນຂອງ ຊາວລາວ-ອອສເຕຣລຽນໃນອອສເຕຣເລັຽຊຶ່ງທ່ານ Chris Bowen ໄດ້ກ່າວກ່ຽວກັບ ຊຸມຊົນລາວໃນຕອນນຶ່ງວ່າ:
"ຂ້າພະເຈົ້າຄິດວ່າ ຊຸມຊົນລາວ ໄດ້ປະກອບສ່ວນ ອັນໃຫຽ່ຫລວງໃຫ້ ອອສເຕຣເລັຽ ແລະ ພວກເຮົາກໍຍິນດີຮັບເອົາ ແລະພວກເຮົາກໍດີໃຈທີ່ ຊາວລາວໄດ້ເລຶອກອອສເຕຣເລັຽເປັນບ່ອນຢູ່ອາສັຍຂອງພວກຂະເຈົ້າ ແລະຂ້າພະເຈົ້າກໍຫວັງວ່າມື້ນຶ່ງ ພວກເຮົາຈະສາມາດ ຮ່ວມກັນສລອງ ປະຊາທິປະໄຕ ແລະ ສິທທິມະນຸສ ຢ່າງເຕັມປ່ຽມ ໃນລາວ ແລະ ພ້ອມດຽວກັນນັ້ນ ກໍສລອງການ ປະກອບສ່ວນ ຂອງຊຸມຊົນລາວ ໃນ ອອສເຕຣເລັຽ ນໍາອີກ".
ນອກນັ້ນທ່ານ Chris Bowen ຣັຖມົນຕຣີ ກະຊວງການເງິນຣັຖບານກາງ ຍັງໄດ້ໃຫ້ຄໍາໝັ້ນສັນຍາວ່າຈະສືບຕໍ່ ທວງຖາມກ່ຽວກັບ ບັນຫາ ການລ່ວງລະເມີດສິທທິມະນຸສ ໃນລາວ ແລະສົ່ງເສີມຊຸມຊົນ ລາວ-ອອສເຕຣລຽນ ໃນດ້ານສິທທິມະນຸສ ແລະປະຊາທິປະໄຕ ໃຫ້ຫຼາຍຂຶ້ນ.
