ກອງຂີ້ເຫຍື້ອແຫ່ງໃໝ່ ລໍຄອຍໃຫ້ມີການແກ້ໄຂ
ພາຍຫຼັງກອງຂີ້ເຫຍື້ອທີ່ຍ້າຍມາແຕ່ຫຼັກ 16 ເມືອງໄຊທານີ ມາຖິ້ມໄວ້ໃນເຂດບ້ານໜອງແປນເໜືອ ເມືອງຫາດຊາຍຟອງ ນະຄອນຫຼວງວຽງຈັນ ບໍ່ພໍເທົ່າໃດ ກໍສ້າງບັນຫາເກີດຂຶ້ນຫຼາຍຢ່າງ ໃຫ້ແກ່ພໍ່ແມ່ປະຊາຊົນໃນຂອບເຂດບໍລິເວນດັ່ງກ່າວ.
ຈາກຫາງສຽງຈົ່ມວ່າຂອງພໍ່ແມ່ປະຊາຊົນໃນເຂດດັ່ງກ່າວ ປັດຈຸບັນ ກອງຂີ້ເຫຍື້ອໄດ້ສົ່ງກິ່ນເໝັນລົບກວນ ບວກກັບບັນດາກອງທັບແມງວັນນັບຮ້ອຍນັບພັນ ໄດ້ພາກັນບິນມາຈັບຕອມເຄື່ອງໃຊ້ຂອງສອຍພາຍໃນເຮືອນຊານ ທີ່ຢູ່ອາໄສ ຮ້າຍແຮງໄປກວ່ານັ້ນ ເວລາກິນເຂົ້າຍັງຕ້ອງໄດ້ກາງມຸ້ງ ເພາະມັນຫຼວງຫຼາຍເກີນຂອບເຂດ ສິ່ງທີ່ຕາມມາກໍຄືພະຍາດນາໆຊະນິດ ທີ່ຕິດພັນມາກັບແມງວັນເຫຼົ່ານັ້ນ.
ບັນຫາດັ່ງກ່າວໄດ້ກາຍມາເປັນຄວາມລຳບາກ ສ້າງຄວາມລຳຄານ ລົບກວນພໍ່ແມ່ປະຊາຊົນໃນຂົງເຂດນີ້ ແລະ ຍັງຈະສືບຕໍ່ໄປ ຖ້າຫາກບໍ່ໄດ້ຮັບການແກ້ໄຂ ນອກຈາກສ້າງຄວາມເດືອດຮ້ອນ ຄວາມບໍ່ເປັນລະບຽບຮຽບຮ້ອຍໃຫ້ແກ່ປະຊາຊົນບ້ານໜອງແປນເໜືອ ແລະ ບ້ານໃກ້ຄຽງແລ້ວ ຍັງເປັນການທຳລາຍສິ່ງແວດລ້ອມ ກີດຂວາງວຽກງານການຜັນຂະຫຍາຍນະໂຍບາຍ 6ສ ຂອງນະຄອນຫຼວງວຽງຈັນນຳອີກ ວອນພາກສ່ວນກ່ຽວຂ້ອງໃຫ້ເຂົ້າມາກວດກາ ຫາວິທີທາງແກ້ໄຂຊ່ວຍເຫຼືອດ່ວນ ເພາະພໍ່ແມ່ປະຊາຊົນໄດ້ຮັບຄວາມເດືອນຮ້ອນຢ່າງແຮງ
