ນາຍົກຣັຖມົນຕຣີລາວວ່າຕ້ອງລຶບຣັຖບາລຫລາຍຮ້ອຍຄົນເພື່ອປະຢັດ ງົບປະມານ ແຕ່ເຄືອຍາດຂອງຜູ້ນໍາຍັງມີຕໍາແໜ່ງຢູ່ຕໍ່ໄປ. ເຈົ້າໜ້າທີ່ ຂັ້ນສູງກະຊວງການເງິນ ຜູ້ຂໍສະຫງວນຊື່ທ່ານນຶ່ງເປີດເຜີຽຕໍ່ຜູ້ສື່ຂ່າວ ເອເຊັຍເສຣີວ່າ ທ່ານ ທອງສິງ ທໍາມະວົງ ນາຍົກ ຣັຖມົນຕຣີ ລາວ ໄດ້ອອກຄໍາສັ່ງໃຫ້ຍົກເລີກບັນດາ ຂໍ້ຕົກລົງ ທີ່ມີເນື້ອໃນ ບໍ່ສອດຄ່ອງ ກັບສະພາບການທີ່ເປັນຈິງໃນປັດຈຸບັນ ຢ່າງເປັນທາງການເມື່ອເດືອນ ກັນຍາທີ່ຜ່ານມາ.
ຄໍາສັ່ງສະບັບດັ່ງກ່າວ ມີ 4 ມາດຕຣາ ຊຶ່ງໃນນັ້ນ ມາດຕຣາ 1- ໃຫ້ ມີການຍົກເລີກບັນດາຂໍ້ຕົກລົງ ວ່າດ້ວຍການແຕ່ງຕັ້ງ ແລະການມອບ ໝາຍວຽກງານ ໃຫ້ບຸຄລາກອນທັງໝົດ ທີ່ໄດ້ມີໃນຊ່ວງປີ 2006 ຫາ 2007. ມາດຕຣາ 2- ໃຫ້ຖືວ່າບຸຄລາກອນເຫຼົ່ານັ້ນໄດ້ສິ້ນສຸດພາລະ ໜ້າທີ່ແລ້ວ ແລະໃຫ້ຢຸດປະຕິບັດໜ້າທີ່ ໃນທັນທີ. ພ້ອມກັນນັ້ນກໍວ່າ ໃຫ້ທຸກກະຊວງ ແລະອົງການທຽບເທົ່າກະຊວງ ໃນທົ່ວປະເທສ ຕ້ອງ ປະຕິບັດຢ່າງເຄັ່ງຄັດແລະໃຫ້ເລີ່ມປະຕິບັດຄໍາສັ່ງສະບັບນີ້ ໃນວັນທີ 9 ກັນຍາ 2013 ຄືວັນ ທີ່ນາຍົກໄດ້ລົງນາມ.
ເຈົ້າໜ້າທີ່ຂັ້ນສູງທ່ານນີ້ ຢືນຢັນວ່າ ຄໍາສັ່ງດັ່ງກ່າວເຮັດໃຫ້ ທີ່ປຶກສາ ຣັຖບາລ ຊຶ່ງປະຈໍາຢູ່ແຕ່ລະກະຊວງ ແລະອົງການທຽບເທົ່າກະຊວງ ທີ່ມີຫຼາຍກວ່າ 800 ຄົນນັ້ນ ພົ້ນຈາກຕໍາແໜ່ງ ແລະທັງຈະບໍ່ໄດ້ຮັບຄ່າ ຕອບແທນຕ່າງໆໃນທັນທີ ອັນຈະເຮັດໃຫ້ຣັຖບາລປະຢັດງົບປະມານໄດ້ ຫລາຍຮ້ອຍຕື້ກີບໃນແຕ່ລະປີ.
ຢ່າງໃດກໍຕາມ ຄໍາສັ່ງສະບັບທີ່ວ່ານີ້ກໍບໍ່ໄດ້ສົ່ງຜົນກະທົບຕໍ່ໜ້າທີ່ການງານແລະຕໍາແໜ່ງຕ່າງໆຂອງລູກຫລານ ຫລືເຄືອຍາດຂອງບັນດາ ຜູ້ນໍາ ພັກ-ຣັຖ ແຕ່ຢ່າງໃດ ເພາະຕໍາແໜ່ງທີ່ປຶກສາເຫລົ່ານັ້ນ ໄດ້ມີການແຕ່ງຕັ້ງຫລັງຈາກປີ 2007 ມາ ແລະສ່ວນໃຫຍ່ກໍໄດ້ ຮັບເງິນເດືອນຈາກ ໂຄງການຊ່ວຍເຫລືອຂອງຕ່າງປະເທສ -ທ່ານກ່າວໃນທີ່ສຸດ.
