ຊາວບ້ານຕ້ອງການດິນຄືນ

ຊາວບ້ານ ບ້ານປ່າຈຸດອນ ເມືອງຕະໂອ້ຍແຂວງສາຣະວັນ ຕ້ອງການທີ່ດິນ ທີ່ບໍຣິສັດເອກກະຊົນ ໂລບເອົາໄປນັ້ນຄືນມາ. ບໍຣິສັດເອກກະຊົນ ລາວ ໄດ້ສໍາປະທານທີ່ດິນຈາກທາງການໃນເຂດດິນຂອງຊາວບ້ານ ເພື່ອປູກໝາກເຍົາ ໂດຍເຮັດສັນຍາກັບຊາວບ້ານແບບ 2+3 ແລະສັນຍາ ວ່າຈະແບ່ງກໍາໄຣໃຫ້. ແຕ່ເມື່ອປູກໝາກເຍົາບໍ່ປະສົບຜົນສໍາເຣັດແລ້ວ ກໍປ່ຽນມາປູກມັນຕົ້ນ ແລະຍຶດຄອງທີ່ດິນຂອງປະຊາຊົນ ໂດຍທີ່ບໍ່ແບ່ງ ຣາຍໄດ້ໃຫ້ ເຮັດໃຫ້ຊາວບ້ານເດືອດຮ້ອນ ຍ້ອນບໍ່ມີທີ່ດິນທໍາກິນ. ຕາມຄໍາເວົ້າຂອງ ຊາວບ້ານຜູູ້ນຶ່ງ:

"ຢູ່ໃນຂອບເຂດບ້ານປ່າຈຸດອນ ເພາະບໍຣິສັດກວມເອົາເນື້ອທີ່ ປູກມັນຕົ້ນຢູ່ຂອບເຂດໃກ້ກັບຫລັງເຮືອນແລະໜ້າບ້ານ ຄັນວ່າພໍໄດ້ ຢາກຮຽກ ຮ້ອງແຫລະ ເຂົາວ່າ ເພາະວ່າໃນເບື້ອງຕົ້ນນີ້ ເຂົາບໍ່ທັນຮຽກຮ້ອງ ເຂົາກໍບໍ່ກ້າເຂົາກໍຢ້ານຢາກໄດ້ຄືນ ແຫລະ ຢາກເຮັດທໍາການຜລິດ".

ຊາວບ້ານຜູ້ນີ້ວ່າບໍຣິສັດເພັດດາລາໄດ້ມາເຮັດສໍາປະທານປູກໝາກເຍົາຢູ່ເຂດບ້ານດັ່ງກ່າວໃນເນື້ອທີ່ 300 ເຮັກຕາມາຕັ້ງແຕ່ປີ 2006 ໂດຍມີ ສັນຍາກັບປະຊາຊົນແບບ 2+3 ຄືປະຊາຊົນເປັນທີ່ດິນ ແລະແຮງງານ. ສ່ວນບໍຣິສັດເປັນທຶນ ເຕັກນິກແລະແນວພັນແລະສັນຍາວ່າ ຈະແບ່ງ ກໍາໄຣຕາມການຕົກລົງກັນ. ແຕ່ຫລັງຈາກປູກໝາກເຍົາບໍ່ໄດ້ຜົນ ຕາມທີ່ຕ້ອງການປະມານ 2 ປີ ບໍຣິສັດດັ່ງກ່າວ ຈຶ່ງໄດ້ຮ່ວມມືກັບບໍຣິສັດຈີນ ປູກມັນຕົ້ນແທນ ໂດຍຂຍາຍເນື້ອທີ່ຕື່ມອີກເປັນ 1,000 ເຮັກຕາ ທີ່ກວມເອົາເນື້ອທີ່ຂອງຫລາຍບ້ານ ຮວມທັງບ້ານທົ່ງກົງ ບ້້ານພໍເບັຍ ແລະ ບ້ານລະລືກ ໂດຍທີ່ບໍ່ໃຫ້ຊາວບ້ານມີສ່ວນຮ່ວມ.

ປັດຈຸບັນປະຊາຊົນໃນເຂດດັ່ງກ່າວ ມີຄວາມເດືອດຮ້ອນຫລາຍ ຍ້ອນບໍ່ມີທີ່ດິນທໍາກິນ ໄດ້ອາສັຍປູກເຂົ້າໃນພື້ນທີ່ປູກມັນຕົ້ນຂອງບໍຣິສັດ ເມື່ອ ບໍຣິສັດກວດພົບ ກໍໄລ່ຊາວບ້ານອອກບໍ່ໃຫ້ປູກໃສ່ ເຖິງແມ່ນທີ່ດິນດັ່ງກ່າວ ເປັນຂອງຊາວບ້ານ ກໍຕາມ.

ກ່ຽວກັບບັນຫານີ້ນັກຂ່າວເອເຊັຍເສຣີ ໄດ້ສອບຖາມເຈົ້າໜ້າທີ່ເມືອງຕະໂອ້ຍ ແລະໄດ້ຮັບຄໍາຢັ້ງຢືນຮັບຮູ້ວ່າມີບັນຫາດັ່ງກ່າວເກີດຂຶ້ນແທ້ ແລະ ໄດ້ແຈ້ງໄປໃຫ້ທາງແຂວງໃຫ້ຊາບນໍາແລ້ວ. ປັດຈຸບັນລໍຖ້າຄໍາສັ່ງຈາກແຂວງໃນການແກ້ໄຂ ບັນຫາດັ່ງກ່າວ.