ຄວາມຄືບໜ້າໃນການຊອກຄົ້ນກູ້ໄພຊາກສົບຜູ້ຖືກເຄາະຮ້າຍ ແລະ ຊາກເຮືອບິນ ******************************** ພາຍຫຼັງທີ່ຄະນະກຳມະການຊອກຄົ້ນກູ້ໄພຊາກສົບຜູ້ຖືກເຄາະຮ້າຍ ແລະ ຊາກເຮືອບິນ Qv 301 ທີ່ເກີດອຸບັດເຫດໃນຕອນບ່າຍວັນທີ 16 ຕຸລາ 2013 ທີ່ຜ່ານມາ,ຮອດວັນທີ 22 ເດືອນກັນກໍ່ສາມາດຊອກຄົ້ນພົບຊາກສົບ ແລະ ບາງສິ້ນສ່ວນຂອງຊາກເຮືອບິນລຳດັ່ງກ່າວ. ລາຍລະອຽດນັ້ນທ່ານ ລັດຕະນະມະນີ ຄູນນີວົງ ລັດຖະມົນຕີຊ່ວຍວ່າການກະຊວງໂຍທາທິການ ແລະ ຂົນສົ່ງ ໃນນາມຄະນະກຳມະການຊອກຄົ້ນກູ້ໄພຊາກສົບຜູ້ຖືກເຄາະຮ້າຍ ແລະ ຊາກເຮືອບິນໄດ້ຊີ້ແຈງວ່າ: ເປັນເວລາ 7 ວັນທີ່ຄະນະກຳມະການຂັ້ນສູນກາງ, ຂັ້ນແຂວງ, ຊ່ຽວຊານຈາກທັງພາຍໃນ ແລະ ຕ່າງປະເທດ ໄດ້ປະສານສົມທົບກັບຄະນະພັກ-ອຳນາດການປົກຄອງ ແລະ ພໍ່ແມ່ປະຊາຊົນບັນດາບ້ານໃກ້ຄຽງຈຸດເກີດເຫດ ແລະ ບ້ານທີ່ຕັ້ງຢູ່ລຽບຕາມແຄມຂອງ ພ້ອມພາກັນຊອກຄົ້ນເກັບກູ້ຊາກສົບຜູ້ຖືກເຄາະຮ້າຍ ແລະ ຊາກເຮືອບິນດ້ວຍຄວາມເປັນເຈົ້າການ, ມາຮອດຕອນບ່າຍວັນທີ 22 ຕຸລານີ້ ພວກເຮົາກໍ່ສາມາດເກັບກູ້ຊິ້ນສ່ວນກາງຂອງເຮືອບິນໄດ້ແລ້ວ ເຊິ່ງຢູ່ຫ່າງຈາກຈຸດເກີດເຫດ 900 ແມັດ ແລະ ຊາກເຮືອບິນທີ່ເກັບກູ້ຂຶ້ນໄດ້ໃນຄັ້ງນີ້ບ່ໍແມ່ນຈຸດທີ່ຕັ້ງຂອງກ່ອງດຳ, ແຕ່ຍັງສາມາດກວດເຫັນສັນຍານຂອງກ່ອງດຳຢູ່ໃນຈຸດດັ່ງກ່າວ, ຍ້ອນແນວນັ້ນຄະນະກຳມະການ ກໍ່ຄືຊ່ຽວຊານຈາກຝຣັ່ງ, ລາວ ແລະ ຊ່ຽວຊານຈາກສິງກະໂປທີ່ມາຊ່ວຍໃນມື້ນີ້ 23 ຕຸລາ ຍັງຈະໄດ້ພ້ອມກັນສືບຕ່ໍສະແກນຊອກຫາຈຸດພິກັດທີ່ກ່ອງດຳຕັ້ງຢູ່ ຖ້າວ່າຈັບສັນຍານ ກໍ່ຄືຮູ້ຈຸດລະອຽດຄັກແນ່ແລ້ວຈິ່ງຈະໃຫ້ນັກມຸດນ້ຳລົງມຸດເບິ່ງຕື່ມອີກ. ທ່ານ ລັດຕະນະມະນີ ໃຫ້ຮູ້ຕື່ມວ່າ: ກ່ອງດຳດັ່ງກ່າວນີ້ໜັກປະມານ 4-6 ກິໂລກຣາມ, ມີ 2 ໜ່ວຍ, ໜ່ວຍໜຶ່ງສຳລັບບັນທຶກສຽງ ແລະ ໜ່ວຍໜຶ່ງບັນທຶກພາບ, ຍ້ອນແນວນັ້ນກ່ອງດຳຈິ່ງມີຄວາມໝາຍສຳຄັນ ເພາະມັນຈະເຮັດໃຫ້ເຮົາຮູ້ສາເຫດຂອງອຸບັດເຫດຄັ້ງນີ້. ຕາງໜ້າຄະນະກຳມະການຊອກຄົ້ນກູ້ໄພກ່າວຕອນທ້າຍອີກວ່າ: ສຳລັບຊາກສົບຂອງຜູ້ເຄາະຮ້າຍຈາກເຫດການຄັ້ງນີ້ມາຮອດມື້ນີ້ສາມາດຊອກຄົ້ນເກັບກູ້ໄດ້ທັງໝົດ 42 ສົບ ກັບ 30 ຊິ້ນສ່ວນ, ໃນນັ້ນສາມາດພິສູດໄດ້ແລ້ວ 27 ສົບ, ຍັງ 15 ສົບ ກັບ 30 ສິ້ນສ່ວນ ແລະ ໃນ 27 ສົບທີ່ພິສູດໄດ້ແລ້ວນີ້ມີຄົນລາວ 12 ສົບ, ໄທ 4 ສົບ, ເກົາຫຼີ 3 ສົບ, ຫວຽດນາມ 2 ສົບ, ຈີນ 2 ສົບ, ນອກນັ້ນແມ່ນມາເລເຊຍ, ກຳປູເຈຍ, ສະຫະລັດອາເມລິກາ ແລະ ການາດາ ຊາດລະ 1 ສົບ. ໃນນີ້ໄດ້ສົ່ງໃຫ້ຄອບຄົວ ແລະ ຍາດພີ່ນ້ອງນຳໄປເຮັດພິທີທາງສາສະໜາແລ້ວ 19 ສົບ, ສ່ວນສົບທີ່ພິສູດແລ້ວກໍ່ເກັບຮັກສາໄວ້ ເພື່ອຈັດພິທີມອບໃນໂອກາດຕໍ່ໄປ. ສຳລັບຊາກສົບທີ່ພິສູດບໍ່ທັນໄດ້ຄະນະກຳມະການພິສູດຊາກສົບກໍ່ໄດ້ສົ່ງຕົວຢ່າງ ດີເອັນເອ (DNA) 55 ລາຍການໄປພິສູດ ຢູ່ປະເທດໄທຍ ແລະ ຈະສົ່ງກັບມາໃນຕອນບ່າຍມື້ນີ້ ( 23 ຕຸລາ ) 27 ລາຍ.
