ເຈົ້າຂອງໂຮງງານໄມ້ແປຮູບຊາວວຽດນາມ ທີ່ມີທັງໂຮງງານຢູ່ລາວແລະວຽດນາມ ໃຫ້ການຍອມຮັບວ່າ ໄມ້ທີ່ໃຊ້ໃນໂຮງງານຂອງນາງທີ່ຜລິດ ເປັນເຄື່ອງເຮືອນ ເພື່ອສົ່ງອອກນັ້ນ 100% ເປັນໄມ້ທີ່ຕັດແລະນໍາເຂົ້າຈາກ ປະເທດລາວ.
ເນື່ອງຈາກຣັຖບານວຽດນາມ ໄດ້ສັ່ງຫ້າມຕັດໄມ້ຢ່າງເດັດຂາດ ໃນຣະຍະ 10 ກວ່າປີຜ່ານມາຈື່ງເຮັດໃຫ້ໂຮງງານໄມ້ແປຮູບໃນວຽດນາມກວ່າ ສອງພັນເກົ້າຮ້ອຍ ແຫ່ງ ໃນປັດຈຸບັນຕ້ອງໄດ້ນໍາ ເອົາໄມ້ຈາກລາວແລະກຳພູຊາ ເຂົ້າປະເທດ. ດັ່ງນາງກ່າວ ໃນຕອນນື່ງວ່າ:
"100% ແມ່ນໄມ້ທີ່ພວກ ເຮົາຕັດມາຈາກປະເທດລາວ ແລ້ວກໍຂົນເຂົ້າມາປອ້ນໂຮງງານ ຢູ່ທີ່ເມືອງລິງ ຕໍ່ຈາກນັ້ນກໍແປຮູບ ເປັນຜລິດຕະພັນ ເຄື່ອງເຮືອນ ຕ່າງໆເພື່ອສົ່ງອອກໄປຢູໂຣບ ແລະຣັຖເຊັຽ".
ກະຊວງການຄ້າວຽດນາມລາຍງານວ່າ ໃນຣະຍະ 9 ເດືອນຂອງຕົ້ນປີນີ້ ວຽດນາມໄດ້ນໍາເອົາໄມ້ເຂົ້າ ຈາກລາວ ທີ່ມີມູນຄ່າຫລາຍກວ່າ 250 ລ້ານໂດລາ ແຕ່ກຸ່ມ ອະນຸຮັກສິ່ງແລດລ້ອມ ໃນລຸ່ມແມ່ນ້ຳຂອງເຊື່ອວ່າ ວຽດນາມໄດ້ນໍາເຂົ້າໄມ້ ຈາກລາວຫລາຍກວ່າຫລາຍເທົ່າຂອງມູນຄ່າ ທີ່ທາງການວຽດນາມ ແຈ້ງການ ຈະເຫັນໄດ້ຈາກມູນຄ່າ ການຂາຍຜລິດຕະພັນເຄື່ອງເຮືອນ ຂອງວຽດນາມໃຫ້ຕ່າງປະເທດ ໃນຣະຍະດຽວ ກັນ ຫລາຍກວ່າ 5 ພັນ ລ້ານໂດລາ.
ແຕ່ເຖິີງຢ່າງໃດກໍຕາມ ເຈົ້າຂອງໂຮງງານຜລິຕພັນໄມ້ແປຮູບ ຊາວວຽດນາມ ຄົນດັ່ງກ່າວຍັງໄດ້ຢືນຢັນຕື່ມວ່າ ໂຮງງານໄມ້ແປຮູບ ວຽດນາມ ທີ່ຕັ້ງຢູ່ພາກກາງຂອງປະເທດກວ່າ 1 ພັນ 9 ຮ້ອຍແຫ່ງລ້ວນແຕ່ອາສັຍໄມ້ທີ່ນຳເຂົ້າຈາກລາວ ທັງຊິ້ນ ເພື່ອມາປ້ອນໂຮງງານຂອງຕົນ.
