ການເຮັດວຽກກັບຄົນຕ່າງປະເທດ
ຖ້າຫາກວ່າທ່ານກຳລັງເຮັດວຽກກັບຄົນຕ່າງປະເທດຢູ່ ທ່ານເຄີຍພົບກັບບັນຫາໃນຊ່ວງໄລຍະຂອງການເຮັດວຽກກັບຄົນຕ່າງປະເທດຫຼືບໍ່ ຫຼືວ່າ ທ່ານມີວິທີເຮັດວຽກໃດແດ່ ເພື່ອໃຫ້ເຂົ້າກັບຄົນຕ່າງປະເທດໄດ້ ແລະ ໃຫ້ໄດ້ຮັບມີປະສິດທິຜົນທີ່ດີ. ເຊິ່ງມື້ນີ້ ເຮົາຈະຂໍແນະນຳບາງວິທີການທີ່ຈະເຮັດໃຫ້ທ່ານເອງສາມາດເຮັດວຽກກັບຄົນຕ່າງປະເທດເພື່ອບໍ່ໃຫ້ເກີດມີບັນຫາ ແລະ ສາມາດເຂົ້າໃຈກັນໄດ້ເປັນຢ່າງດີ
(to read in English, click here)
ສັນຍາວ່າຈະເຮັດອັນໃດຕ້ອງໃຫ້ແນ່ໃຈວ່າເຮັດໄດ້.
ການທີ່ເຮົາໄດ້ເຮັດວຽກັບຄົນຕ່າງປະເທດ ສິ່ງສຳຄັນໃນການເຮັດວຽກແມ່ນຜົນໄດ້ຮັບ, ເຊິ່ງຫຼາຍຄົນບໍ່ກ້າທີ່ຈະປະຕິເສດຄຳສັ່ງ ຫຼື ກ້າເວົ້າ ແລະ ສະແດງຄວາມຄິດເຫັນ, ເພາະວ່າວຽກທີ່ໄດ້ຮັບມອບໝາຍນັ້ນມັນຍາກທີ່ເຮົາຈະສາມາດເຮັດໄປຕາມແຜນທີ່ວາງໄວ້ໄດ້ ໂດຍສະເພາະແມ່ນເລື່ອງເວລາ. ສະນັ້ນ ຖ້າຫາກວ່າເຮົາບໍ່ສາມາດເຮັດໄປຕາມແຜນນັ້ນໄດ້ກໍ່ຕ້ອງໃຫ້ສະແດງຄວາມຄິດເຫັນອອກມາຢ່າງສຸພາບ ແລະ ກົງໄປກົງມາ. ເຊິ່ງຖ້າວ່າເຮົາຮັບປາກໄປກ່ອນແລ້ວບໍ່ສາມາດເຮັດໄດ້ນັ້ນຈະເຮັດໃຫ້ທ່ານຂາດຄວາມໜ້າເຊື່ອຖືໄດ້ ແລະ ຂາດຄວາມໄວ້ເນື້ອເຊື່ອໃຈຕໍ່ກັບເຮົາໄດ້.
1. ຕ້ອງກ້າຖາມເມື່ອມີບັນຫາ.
ຄົນຕ່າງປະເທດສ່ວນຫຼາຍຈະຮູ້ສຶກດີຖ້າວ່າມອບວຽກໃດໜື່ງໄປແລ້ວ ລູກນ້ອງມີຄຳຖາມກັບຄືນ, ເພາະສະແດງເຖິງວ່າລູກນ້ອງມີຄວາມສົນໃຈຕໍ່ກັບລາຍລະອຽດຂອງວຽກ ແລະ ຕ້ອງການເຂົ້າໃຈຕໍ່ກັບວຽກນັ້ນໆ, ແຕ່ວ່າລູກນ້ອງຫຼາຍຄົນບໍ່ມັກຖາມ ເພາະຄິດວ່າຢ້ານເສຍໜ້າ ຫຼື ອາດຈະຖືກໄລ່ອອກຈາກວຽກ ສະນັ້ນຈຶ່ງເຮັດເສີຍໆເອົາໄວ້ກ່ອນ, ເຊິ່ງການເຮັດແບບນີ້ມັນອາດຈະເຮັດໃຫ້ມີຄວາມເຂົ້າໃຈຜິດຕໍ່ກັບຈຸດປະສົງ ແລະ ລາຍລອຽດ ຂອງໜ້າວຽກທີ່ຈະເຮັດໄດ້ ເຊິ່ງອາດເຮັດໃຫ້ເກີດມີບັນຫາຕາມຫຼັງມາກໍ່ໄດ້.
2. ມີບັນຫາຜິດພາດກັບວຽກງານໃຫ້ຮີບບອກຫົວໜ້າ.
ໃນກໍລະນີທີ່ເຮົາເຮັດວຽກແລ້ວເກີດມີຄວາມຜິດພາດຂຶ້ນ ຢ່າປົກປິດເອົາໄວ້ເພື່ອບໍ່ຢາກໃຫ້ໂຕເອງຖືກຕຳນິ, ແຕ່ວ່າຄວາມຈິງແລ້ວຖ້າຫາກວ່າເຮົາບອກເຈົ້ານາຍແຕ່ເນີ້ນໆໄວ້ກ່ອນ ຄວາມເສຍຫາຍທີ່ຈະເກີດຂຶ້ນ ແລະ ໂອກາດໃນການແກ້ໄຂບັນຫາກໍ່ຈະງ່າຍຂຶ້ນ. ແນ່ນອນທີ່ສຸດວ່າທ່ານອາດຈະຕ້ອງຖືກຫົວໜ້າຮ້າຍ ແຕ່ວ່າຫົວໜ້າຈະແຮງໃຈຮ້າຍຫຼາຍຂຶ້ນຖ້າຫາກວ່າປ່ອຍໃຫ້ເກີດຄວາມເສຍຫາຍຫຼາຍຂຶ້ນ.
3. ການສື່ສານກັບຫົວໜ້າຕ້ອງໃຫ້ເຂົ້າໃຈຊັດເຈນ.
ຄົນຕ່າງປະເທດສ່ວນຫຼາຍມັກການເວົ້າທີ່ກົງໄປກົງມາ, ເຊິ່ິງວິທີການເວົ້ານັ້ນເຮົາຕ້ອງລຽງລຳດັບຄວາມຄິດຂອງໂຕເຮົາເອງກ່ອນວ່າ ເຮົາຕ້ອງການເວົ້າເລື່ອງຫັຍງ, ມີທີ່ໄປທີ່ມາຈຶ່ງໃດ, ເກີດບັນຫາຫັຍງ ແລະ ເປັນເພາະສາເຫດຫຍັງ, ຂໍ້ມູນທີ່ມີຢູ່ມີຫັຍງແດ່, ສຸດທ້າຍແມ່ນມີຂໍ້ສະເໜີແນະຫັຍງແດ່ສຳລັບບັນຫານັ້ນ ແລະ ເຮົາຄວນຈະມີຂໍ້ສະເໜີແນະຫຼາຍໆທາງເລືອກ ພ້ອມທັງສະເໜີທາງເລືອກຄວາມຄິດເຫັນຂອງເຮົາອອກໄປ ແລະ ຖ້າຫາກຈະລະອຽດແມ່ນຕ້ອງມີການວິເຄາະເຖິງຜົນໄດ້ຮັບ ແລະ ຄວາມສ່ຽງນຳ.
4. ລາຍງານຄວາມຄືບໜ້າຂອງວຽກເປັນໄລຍະ.
ຫົວໜ້າສ່ວນຫຼາຍຕ້ອງການທີ່ຈະຮູ້ຄວາມຄືບໜ້າຂອງວຽກເປັນໄລຍະໆ, ດັ່ງນັ້ນເຮົາຄວນຈະລາຍງານໜ້າວຽກໃຫ້ຫົວໜ້າຮູ້ ຢ່າງຕໍ່ເນື່ອງ ແລະ ສະໝ່ຳສະເໝີ. ສຳລັບເລື່ອງຂອງຄວາມຖີ່ ແລະ ລາຍລະອຽດໃນຮູບແບບການສື່ສານກໍ່ອາດຈະຕ້ອງສຶກສາເບິ່ງວ່າຫົວໜ້າມັກຈະໃຫ້ລາຍງານທາງໃດ ອາດຈະແມ່ນການລາຍງານທາງໂທລະສັບ, ເປັນລາຍລັກອັກສອນ, ການເວົ້າຈາທຸກໆມື້ ຫຼື ທຸກໆອາທິດ ຕາມແຕ່ລະວິທີຂອງແຕ່ລະຄົນ.
ສຳລັບ 4 ວິທີ ທີ່ໄດ້ກ່າວມານັ້ນ ອາດຈະເປັນແນວທາງເລັກໆໜ້ອຍໆທີ່ສຳລັບຜູ້ທີ່ເຮັດວຽກກັບຄົນຕ່າງປະເທດຢູ່ ເຊິ່ງທ່ານອາດຈະນຳເອົາວິທີດັ່ງກ່າວໄປປະຍຸກໃຊ້ໃຫ້ເຂົ້າກັບຕົວຈິງໄດ້ເພື່ອໃຫ້ການເຮັດວຽກຂອງທ່ານມີປະສິດທິພາບ ແລະ ເຮັດວຽກໄດ້ງ່າຍຂຶ້ນ.
