ລາວໂຮມລາວ ເພື່ອປະຊາທິປະໄຕ

ການວາງແຜນ ແລະ ຄາດການຂອງລັດຖະບານລາວ ຖື ວ່າ ຖືກຈັດຢູ່ໃນຂັ້ນສຸດຍອດ, ທຸກເອກະສານ, ທຸກຄຳເວົ້າ ລ້ວນແຕ່ຖືກຕ້ອງ ຕາມທິດສະດີ, ທີ່ຫຼາຍປະເທດໄດ້ດຳເນີນມາ, ແຕ່ ຂັ້ນຕອນປະຕິບັດ ນັ້ນ ແມ່ນຍັງບໍ່ ປະສົບຜົນສຳເລັດ, ເປັນພຽງແຕ່ຮູບການ ນາມມະທຳ. ຖ້າເບີ່ງຮູບນອກ ແບບຜິວເຜີນ ກໍ່ພໍເປັນໄປໄດ້, ແຕ່ຖ້າເບີ່ງເລິກລົງໄປ ທຸກໂຄງການ, ທຸກການຈັດຕັ້ງປະຕິບັດ ແລ້ວ ເຫັນວ່າ ຍັງຫ່າງໄກກັບຄວາມເປັນຈິງ, ເພາະລະບຽບ ກົດໝາຍບໍ່ໄດ້ຖືກນຳໃຊ້ຢ່າງເດັດຂາດ ແລະ ເຕັມຮູບແບບ, ການກວດກາ ກວດການ ຂະບວນການ Corruption ຍັງ ເຮັດບໍ່ໄດ້ ແລະ ຂະບວນການນີ້ ກໍ່ຍັງ ນັບມື້ນັບ ເກີດຂື້ນຢ່າງແຜ່ຫຼາຍ ແລະ ເປີດແປນໃນທຸກລະບົບ ທຸກລະດັບ ຂອງຜູ້ມີອຳນາດ ນັບແຕ່ຂັ້ນບ້ານ ຈົນເຖິງຂັ້ນ ສູງສຸດຂອງປະເທດ, ສາເຫດ ແມ່ນມາຈາກ ອຳນາດສັງການ ຈາກ ການນຳ ຂັ້ນເທິງ ທີ່ບໍ່ໄດ້ ມີການວິເຄາະ ພິຈາລະນາ ເຖິງບັນຫາ ຈື່ງເຮັດໃຫ້ ອຳນາດການປົກຄອງທ້ອງຖີ່ນ ພັກພວກ ປະຕິບັດຕາມ ເພື່ອ ເອົາຕົວລອດ, ຖ້າບໍ່ເຮັດຕາມ ກໍ່ຈະຖືກປົດຈາກຕຳແໜ່ງ. ເຮັດໃຫ້ ເກີດມີປະກົດການ ກຸ່ມກ້ອນ ເຊື້ອສາຍ ເພື່ອຫາຜົນປະໂຫຍດໃຫ້ກັບຕົນເອງ ຢ່າງແຜ່ຫຼາຍ, ເອື້ອເພື້ອ ຜົນປະໂຫຍດ ໃຫ້ ບັນດາບໍລິສັດ ທີ່ໃກ້ສິດກັບຕົວເອງ. ຈົນລືມໄປວ່າ ຄວາມຖືກຕ້ອງ ຄວາມຍຸດຕິທຳມັນຢູ່ໃສ.

ການດຳເນີນ ນະໂຍບາຍ 3 ສ້າງ ຖ້າປະຕິບັດຢ່າງຈິງຈັງ ແລະ ເປັນທຳ ກໍ່ຈະເປັນສີ່ງທີ່ດີ ທີ່ຈະນຳພາປະເທດຊາດ ກ້າວໄປໜ້າໄດ້, ແຕ່ຖ້າຂະບວນແນວຄວາມຄິດເກົ່າ ຍັງຄອບງຳຢູ່ ບໍ່ກ້າ ເວົ້າຄວາມຈິງບັນຫາກໍ່ຈະເປັນຄື້ເກົ່າ, ການເຮັດ 3 ສ້າງ ແມ່ນ ຕ້ອງເລີ້ມຈາກຄວາມຕ້ອງການຂອງພື້ນຖານຂື້ນມາ, ແຕ່ກົງກັນຂ້າມ ຄຳສັງຈາກສ່ວນກາງ ແລະ ຜູ້ມີອຳນາດ ຍັງຄອບງຳຢູ່ (ໜັງສືນ້ອຍ, ເຈັ້ຍເຫຼືອງ) ຍັງໃຊ້ຢູ່ ທຸກຢ່າງກໍ່ເໝືອນເດີມ, ເພາະ ອຳນາດ ຍັງຢູ່ເໝືອກົດໝາຍ ເຮັດໃດ ຈື່ງຈະ ຍຸດຕິທຳ ແລະ ໃຫ້ ຄວາມເປັນທຳ ແກ່ສັງຄົມໄດ້