ທ່ານ ແລັງເຫງິນ (Langen) ປະທານຄະນະຜູ້ແທນສະພາຢູໂຣບ ກິຈກັມເອເຊັຽຕະເວັນອອກສ່ຽງໃຕ້ ແລະສະມາຊິກສະພາຢູໂຣບ 3 ທ່ານ ທີ່ເດີນທາງໄປ ນະຄອນຫລວງວຽງຈັນ ເພື່ອພົບປະກັບ ທາງການລາວ ກ່ຽວກັບ ການຮ່ວມມື ລະຫ່ວາງ ຢູໂຣບກັບສປປລາວ ແລະ ໄດ້ຍົກ ເອົາບັນຫາ ສິດທິມະນຸດ ໂດຍສະເພາະ ກໍຣະນີ ການຫາຍສາບສູນ ຂອງ ທ່ານ ສົມບັດ ສົມພອນ ນັກພັທນາຊຸມຊົນໃນລາວ ໄດ້ຖແລງໃນ ວັນຈັນ ທີ 28 ຕຸລາ ນີ້ວ່າ:
"ພວກທ່ານ ຍັງບໍ່ໄດ້ຮັບຄໍາຕອບ ທີ່ໜັກແໜ້ນແລະເປັນໜ້າເຊື່ອຖືໄດ້ຈາກທາງການລາວ ໃນຄໍາຖາມອັນໃດກໍດີ ກ່ຽວກັບການ ຫາຍສາບສູນ ຂອງທ່ານ ສົມບັດ ສົມພອນ". ຕາມລາຍງານອົງການຂ່າວ ເຢັຽຣະມັນ (Deutch press agentur.)
ໃນວັນດຽວກັນ ທາງວິທຍຸເອເຊັຽເສຣີ ກໍໄດ້ໂທຣະຊັບຖາມ ທ່ານ ແລັງເຫງິນ (Langen) ຕື່ມອີກກ່ຽວກັບສະຖານະພາບຂອງ ທ່ານ ສົມບັດ ສົມພອນ ທ່ານກໍຕອບວ່າ ພວກທ່ານໄດ້ຖາມເຣື້ອງນີ້ ຈາກທາງການລາວ ໄດ້ສົນທະນາກັນກ່ຽວກັບ ຮູບພາບ ວີດີໂອ ຕອນທີ່ທ່ານ ສົມບັດ ສົມພອນ ຖືກລັກໂຕໄປ:
"ພວກທ່ານ ບໍ່ໄດ້ຮັບຄໍາຕອບ ວ່າທ່ານສົມບັດສົມພອນ ດຽວນີ້ຢູ່ໃສ, ພວກທ່ານບໍ່ຮູ້ສະຖານະພາບ ອັນແທ້ຈິງ ຂອງ ທ່ານ ສົມບັດ".
ຜ່ານມາ ທາງການລາວ ປະຕິເສດຕລອດມາວ່າ ບໍ່ຮູ້ວ່າທ່ານ ສົມບັດ ສົມພອນ ຢູ່ໃສ. ທ່ານ ແລັງເຫງິນ (Langen) ກ່າວຕື່ມວ່າ:
ພວກທ່ານບອກທາງການລາວ ຢ່າງຊັດແຈ້ງວ່າ: “ຖ້າຫາກກໍຣະນີ ສົມບັດສົມພອນ ບໍ່ຖືກແກ້ໄຂ ລາວ ຈະສູນເສັຽຄວາມເຊື່ອຖືຢູ່ໃນຢູໂຣບ".
ສະຫະພາບຢູໂຣບທີ່ປະກອບດ້ວຍ 27 ປະເທດສະມາຊິກ ເປັນກຸ່ມປະເທດນໍາໜ້າ ໃນການໃຫ້ການຊ່ວຍເຫລືອແກ່ລາວ. ອົງການສິດທິມະ ນຸດ Amnesty International ອົງການຄຣິສຈຽນ ເພື່ອຄວາມສາມັກຄີທົ່ວໂລກ ແລະ ສະຫະພັນ ສັນນິບາດກົດໝາຍສາກົນ ໄດ້ສົ່ງຈົດ ໝາຍ ຮຽກຮ້ອງສະພາຢູໂຣບ ໃຫ້ໃຊ້ສິດອໍານາດ ທີ່ມີຢູ່ ເພື່ອກົດດັນຣັຖບານລາວ ຮັບປະກັນໃຫ້ນໍາເອົາໂຕ ທ່ານ ສົມບັດ ກັບຄືນມາຫາ ຄອບຄົວ ດ້ວຍຄວາມປອດພັຍ.
ຂອບອົກຂອບໃຈ ຊາວໂລດທີ່ເປັນຫ່ວງຄົນລາວ ຕາດຳດຳ
ຂໍໃຫ້ປະສົບຜົນສຳເລັດທຸກທົ່ວໜ້າ
ສະພາຢູໂລບຢ່າທັກທວງແຕ່ເລືອງທ່ານສົມບັດ ສົມພອນ ກໍລະນີດຽວທໍນີ້ບໍ່ຫນ້າຈະມີຫລາຍໆກໍລະນີກ່ອນນີ້ ທາງລາວກໍຄວນເຮັດໃຫ້ເລື່ອງແຈ້ງຂາວໄວໆ ຍ້ອນການຊ່ວຍເຫລືອຊິໄດ້ ຜູ້ເດືອດຮ້ອນແມ່ນປະຊາຊົນ.
ຄັກລະຫວາຄົນສລາດສ່ອງໃສ.
