ຫຼາຍບັນຫາທີ່ລັດຖະບານໂຈະການຈ່າຍເງິນອຸດໜູນຊົ່ວຄາວ
ລັດຖະບານ ໄດ້ມີຄວາມພະຍາຍາມ ແລະ ເອົາໃຈໃສ່ເຕັມຄວາມສາມາດ ໃນການແກ້ໄຂຊີວິດການເປັນຢູ່ຂອງປະຊາຊົນລາວບັນດາເຜົ່າ ໃຫ້ນັບມື້ດີຂຶ້ນເປັນກ້າວໆ ເຖິງວ່າຈະພົບກັບບັນຫາສິ່ງທ້າທາຍຫຼາຍປະການ ເປັນຕົ້ນແມ່ນດ້ານສະພາບຄ່ອງທາງການເງິນ ແຕ່ລັດຖະບານ ກໍໄດ້ເອົາໃຈໃສ່ສົມທົບກັບພາກສ່ວນກ່ຽວຂ້ອງ ທັງສູນກາງ ແລະ ທ້ອງຖິ່ນ ອັນໄດ້ເຮັດໃຫ້ບັນຫາດັ່ງກ່າວຖືກແກ້ໄຂເທື່ອລະກ້າວ.
ທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສປປ ລາວ ໄດ້ກ່າວບາງຕອນສຳຄັນ ໃນກອງປະຊຸມເຜີຍແຜ່ແນະນຳການຈັດຕັ້ງປະຕິບັດແຜນງົບປະມານແຫ່ງ ລັດ ປະຈຳສົກປີ 2013-2014 ທີ່ຈັດຂຶ້ນລະຫວ່າງ ວັນທີ 29-30 ຕຸລາ 2013 ທີ່ຫໍປະຊຸມແຫ່ງຊາດ (ຫຼັກ 6) ນະຄອນຫຼວງວຽງຈັນ ວ່າ: ການຈັດຕັ້ງປະຕິບັດແຜນງົບປະມານສົກປີ 2012-2013 ຜ່ານມາເຫັນວ່າ ໄດ້ຮັບໝາກຜົນດີສົມຄວນ ສາມາດຮັກສາສະຖຽນລະພາບທາງການເມືອງໜັກແໜ້ນ ສັງຄົມມີຄວາມສະຫງົບປອດໄພ ເສດຖະກິດຍັງຂະຫຍາຍຕົວໃນລະດັບ 8% ອັດຕາເງິນເຟີ້ຢູ່ໃນລະດັບບໍ່ສູງ (5,64%) ແຕ່ເຖິງຢ່າງໃດກໍຕາມ ການປະຕິບັດແຜນງົບປະມານປະຈຳປີ 2012-2013 ຍັງພົບກັບສິ່ງທ້າທາຍຫຼາຍບັນຫາ ເປັນຕົ້ນແມ່ນສະພາບຄ່ອງທາງການເງິນ ເຊິ່ງໃນສົກງົບປະມານປະຈຳປີ 2013-2014 ລັດຖະບານໄດ້ປັບປຸງແກ້ໄຂ ແລະ ຕົກລົງເຫັນດີຕັດເງິນອຸດໜູນ (ອຸດໜູນຄ່າຄອງຊີບ) ເພື່ອແນໃສ່ເຮັດແນວໃດໃຫ້ຂອດບໍລິຫານສາມາດເດີນຕາມລະບົບກົນ ໄກການເງິນຢ່າງສອດຄ່ອງ ເຊິ່ງຫຼາຍເຫດຜົນທີ່ເຮັດໃຫ້ລັດຖະບານຕ້ອງໂຈະການໃຫ້ເງິນອຸດໜູນ ດັ່ງກ່າວ ກໍສືບເນື່ອງຈາກການເກັບພາສີ-ອາກອນບໍ່ໄດ້ຕາມເປົ້າໝາຍ ລາຍຮັບຈາກຜົນກຳໄລຂອງຂະແໜງການຂຸດຄົ້ນບໍ່ແຮ່ຫຼຸດລົງ ແລະ ການເກັບກຳຂໍ້ມູນບັນຊີດ້ານການເງິນຂອງຫຼາຍພາກສ່ວນບໍ່ຈະແຈ້ງ ເທົ່າທີ່ຄວນເປັນຕົ້ນ.
ສຳລັບການດຳເນີນກອງປະຊຸມ 2 ວັນ ບັນດາລັດຖະມົນຕີວ່າການ ຊ່ວຍວ່າການ ແລະ ຜູ້ຕາງໜ້າຈາກຂະແໜງການເງິນໃນຂອບເຂດທົ່ວປະເທດ ຈະໄດ້ຮັບຟັງ ແລະ ປະກອບຄຳຄິດເຫັນໃສ່ບົດລາຍງານສະພາບການຈັດຕັ້ງປະຕິບັດແຜນ ງົບປະມານແຫ່ງລັດ ປະຈຳສົກປີ 2012-2013 ສະພາບການເຮັດທົດລອງວຽກງານ 3 ສ້າງຂອງຂະແໜງການເງິນໃນໜຶ່ງປີຜ່ານມາ ລວມທັງຮັບຟັງການເຜີຍແຜ່ແນະນຳດຳລັດສະບັບເລກທີ 241/ລບ ແລະ ບົດແນະນຳການຈັດຕັ້ງປະຕິບັດແຜນງົບປະມານແຫ່ງລັດ ປະຈຳສົກປີ 2013-2014 ຕື່ມອີກ.
