ລາວໂຮມລາວ ເພື່ອປະຊາທິປະໄຕ

ໄມ້ມະນີໂຄດສິ່ງສັກສິດຄູ່ບ້ານຄູ່ເມືອງໄດ້ຖືກປະດິດສະຖານໃນອູບແກ້ວພິເສດ

ແຂວງຈຳປາສັກໄດ້ຈັດພິທີກຳທາງສາສະໜາ ເພື່ອເຊີນເອົາໄມ້ມະນີໂຄດ ເຊິ່ງເປັນສິ່ງສັກສິດຄູ່ບ້ານຄູ່ເມືອງຂອງລາວເຮົາ ຂຶ້ນປະດິດສະຖານໃນອູບແກ້ວແບບພິເສດ ທີ່ມີມູນຄ່າ 1 ແສນໂດລາສະຫະລັດ.
ພິທີດັ່ງກ່າວມີຂຶ້ນໃນວັນທີ 25 ຕຸລາ 2013 ນີ້ທີ່ແຫຼ່ງທ່ອງທ່ຽວນ້ຳຕົກຄອນພະເພັງ ເມືອງໂຂງ,ເຊິ່ງໃຫ້ກຽດເຂົ້າຮ່ວມຂອງທ່ານ ດຣ ບຸນຖອງ ດິວິໄຊ ຮອງເຈົ້າແຂວງໆຈຳປາສັກ, ພຣະສົງ, ອຳນາດການປົກຄອງ ແລະ ຊາວພຸດຈຳນວນຫຼາຍ.
ພະອາຈານ ສຸວັນ ຈັນທະລາດ ປະທານອົງການພຸດທະສາສະໜາສຳພັນລາວແຂວງຈຳປາສັກໃຫ້ສຳພາດວ່າ:ເພື່ອເປັນການປົກປັກຮັກສາຕົ້ນໄມ້ມະນີໂຄດ ເຊິ່ງເປັນຕົ້ນໄມ້ສັກສິດຄູ່ບ້ານຄູ່ເມືອງຂອງ ລາວເຮົາໃຫ້ຄົງຢູ່ຍາວນານເຖິງເຊັ່ນລູກເຊັ່ນຫຼານ ແລະ ເປັນບ່ອນສັກກາລະບູຊາຂອງຄົນລາວເຮົາ,ດັ່ງນັ້ນຄະນະກຳມະການກອບກູ້ຕົ້ນໄມ້ມະນີໂຄດຂັ້ນແຂວງ ແລະ ເມືອງ,ຂະແໜງການທີ່ກ່ຽວຂ້ອງ ສົມທົບກັບພະສົງຈຶ່ງໄດ້ຈັດພິທີກຳທາງສາສະໜາ ດ້ວຍການໄຫວ້ພະ,ສູດປະລິຕະມຸງຄຸນ ເພື່ອເຊີນຕົ້ນໄມ້ມະນີໂຄດຂຶ້ນໄປປະດິດສະຖານທີ່ອູບແກ້ວ ທີ່ສາມາດຮັກສາຕົ້ນໄມ້ດັ່ງກ່າວໃຫ້ປອດໄພ ແລະ ຈົບງາມ.
ທ່ານ ນາງ ສົມເລັດ ໂພສາລາດ ປະທານກຸ່ມບໍລິສັດຍິ່ງໂຊກໄຊໃຫ້ຮູ້ຕື່ມວ່າ: ອູບແກ້ວດັ່ງກ່າວແມ່ນສັ່ງຊື້ເປັນພິເສດຈາກປະເທດຈີນ ຊຶ່ງບໍ່ມີຂາຍໃນຕະຫຼາດທົ່ວໄປ, ເປັນອູບແກ້ວທີ່ມີຄວາມໜາ 5 ຊັງຕີແມັດ, ເປັນແກ້ວລວງດຽວບໍ່ໄດ້ຕໍ່,ສາມາດກັນລູກປືນ,ມີລະບົບສູນຍາກາດເຊິ່ງເປັນລະບົບທີ່ສາມາດເກັບຮັກສາໄມ້ມະນີໂຄດໃຫ້ຄົງຢູ່ຍາວນານ. ອູບແກ້ວດັ່ງກ່າວມີຄວາມກວ້າງ 2 ແມັດ,ຍາວ 8 ແມັດ ແລະ ສູງ 2,20 ແມັດ,ມີມູນຄ່າ 1 ແສນໂດລາສະຫະລັດ.
ທ່ານນາງສົມເລັດ ກ່າວຕື່ມອີກວ່າ : ສຳລັບວຽກງານການກໍ່ສ້າງຫໍປະດິດສະຖານໄມ້ມະນີໂຄດມາຮອດປັດຈຸບັນໄດ້ສຳເລັດແລ້ວ 95 %,ຍັງເຫຼືອພຽງແຕ່ວຽກງານຕົກແຕ່ງ,ປະດັບປະດາ,ເຊິ່ງເປັນວຽກງານລະອຽດອອ່ນ ແລະ ຄາດວ່າຈະສຳເລັດໃນທ້າຍເດືອນ ທັນວາ 2013 ນີ້./.