ປາຄ້າວ ຂະໜາດ 1 ແມັດປາຍ ຕາຍຢູ່ໜອງຫານ ບ້ານນາທາມເມືອງປາກງື່ມ ນະຄອນຫລວງວຽງຈັນ ອາດມີສາເຫດຈາກນໍ້າຂະນະທີ່ກ່ອນໜ້ານີ້ ກໍມີປານ້ອຍຕາຍຢ່າງຫລວງຫລາຍ.
ຕອນເຊົ້າວັນທີ 8 ພະຈິກ 2013 ນີ້ ທ່ານ ແຊວ ສີດາວົງ ນາຍບ້ານໆນາທາມເມືອງປາກງື່ມ ນະຄອນຫລວງວຽງຈັນ ໄດ້ໃຫ້ສໍາພາດຕໍ່ຜູ້ສື່ຂ່າວພວກເຮົາວ່າເລີ່ມແຕ່ວັນທີ 28 ຕຸລາ 2013 ເປັນຕົ້ນມາ ໄດ້ເກີດປະກົດການປາຕາຍປາຕາຍເປັນຈໍານວນຫລວງຫລາຍຢູ່ໃນບໍລິເວນ ໜອງຫານ ບ້ານນາທາມເມືອງປາກງື່ມ ໃນເບື້ອງຕົ້ນມີປານ້ອຍຕາຍຟູຕາມໜ້ານໍ້າເປັນຈໍານວນຫລາຍພາຍຫລັງຫລາຍມື້ຕໍ່ມາ ກໍເລີ່ມຈົມລົງພື້ນນໍ້າ ໃນຂະນະທີ່ປາໃຫຍ່ກໍເລີ່ມຕາຍແລະ ຟູຂຶ້ນໜ້ານໍ້າຫລາຍຂຶ້ນ ສະເພາະວັນທີ 7 ພະຈິກນີ້ ປະກົດວ່າມີປາຄ້າວໃຫຍ່ທີ່ມີຄວາມຍາວກວ່າໜຶ່ງແມັດຕາຍຟູຂຶ້ນ ຊຶ່ງປະກົດການແບບນີ້ເຄີຍເກີດຂຶ້ນໃນປີກ່ອນ.ທ່ານ ແຊວ ສີດາວົງ ໃຫ້ຮູ້ອີກວ່າ “ ໜອງຫານ ແຫ່ງນີ້ມີເນື້ອທີ່ກວ້າງກວ່າ200 ເຮັກຕາ ຊຶ່ງເປັນບ່ອນສະໜອງສັດນໍ້າໃຫ້ແກ່ປະຊາຊົນໃນບໍລິເວນນີ້ໄດ້ຫາເພື່ອລ້ຽງຊີບ ແລະ ສົ່ງປ້ອນຕະຫລາດໃນແຕ່ລະມື້ບໍ່ຕໍ່າກວ່າ 200 ກກເມື່ອເກີດສະພາບນີ້ຂຶ້ນ ຈິ່ງເປັນຜົນກະທົບບໍ່ໜ້ອຍຕໍ່ກັບການດໍາລົງຊີວິດຂອງປະຊາຊົນ ຈິ່ງຢາກຮຽກຮ້ອງເຖິງເຈົ້າໜ້າທີ່ທີ່ກ່ຽວຂ້ອງຈົ່ງໄດ້ລົງຊ່ອຍສໍາຫລວດແລະ ຫາວິທີແກ້ໄຂຢ່າງຮີບດ່ວນ ເພື່ອຟື້ນຟູຊີວິດການເປັນຢູ່ຂອງປະຊາຊົນແລະ ປັບປຸງສະພາບແວດລ້ອມຂອງແຫລ່ງທໍາມາຫາກິນ ໃຫ້ກັບສູ່ສະພາບປົກກະຕິໂດຍໄວ.
