ຄົນລາວສົນໃຈ ການເມືອງໄທ ຫລາຍກວ່າການເມືອງລາວ ໂດຍສະເພາະ ໃນຂະນະນີ້ ສະພາບການເມືອງໄທ ກໍາລັງເຂັ້ມຂົ້ນ ມີຂໍ້ຂັດແຍ້ງ ແລະໂຕ້ແຍ້ງກັນແຮງຂຶ້ນ ສ່ວນການເມືອງລາວ ນັ້ນຖືກປິດມິດງຽບມີແຕ່ ຂ່າວຜູ້ນໍາໄປຢ້ຽມຢາມ ຫລືໂຄສະນານະໂຍບາຍຂອງພັກ-ຣັດ ເທົ່າ ນັ້ນ. ດັ່ງຄົນລາວຜູ້ນຶ່ງເວົ້າວ່າ:
“ເປັນຫຍັງບໍ່ສົນໃຈ ເຣື່ອງການເມືອງລາວໂດຍກົງ ເພາະວ່າສ່ວນຫລາຍ ການເມືອງລາວ ກໍຄືລາວ ມີແຕ່ພັກດຽວເນາະແລ້ວສ່ວນຫຼາຍການ ເມືອງຈະບໍ່ຄ່ອຍມີ ການໂຕ້ແຍ້ງກັນ ຂ່າວທີ່ອອກສ່ວນຫລາຍ ກະມີແຕ່ ເຣື່ອງການໄປຢ້ຽມຢາມ ບ່ອນນັ້ນບ່ອນນີ້ ຂອງຜູ້ນຳລາວເນາະ ຄິດ ວ່າສິບໍ່ມີຫຍັງ ປ່ຽນແປງຫລາຍ.”
ຊາວລາວຜູ້ນີ້ເວົ້າອີກວ່າ ນາງກໍາລັງຕິດຕາມ ສະພາບການເມືອງຂອງໄທ ຢ່າງໃກ້ຊິດ ເພື່ອຢາກຮູ້ວ່າມັນຈະປ່ຽນແປງ ໄປແນວໃດ ຣັຖບານ ຈະເຮັດຫຍັງຕໍ່ໄປ ແລະພວກປະທ້ວງເດ່ ຈະໂຮມຊຸມນຸມເຄື່ອນໄຫວ ສືບຕໍ່ໄປເລື້ອຍໆບໍ່?
ຄົນລາວອີກຜູ້ນຶ່ງເວົ້າວ່າ ເຂົາເອງກໍຕິດຕາມເບິ່ງການເມືອງໄທ ເປັນປະຈຳເຊັ່ນກັນ ແຕ່ຫັນມາສົນໃຈການເມືອງລາວ ຫລາຍຂື້ນ ເພາະວຽກ ງານຂອງພັກ-ຣັດ ຫລາຍຢ່າງເລີ້ມສົ່ງຜົນກະທົບຕໍ່ເຂົາເອງແລະ ປະຊາຊົນລາວຫລາຍຂື້ນ. ຄົນລາວຜູ້ນີ້ເວົ້າຕື່ມວ່າ:
“ສິສຶກສາກໍາລັງສິເບິ່ງ ເລີ້ມສົນໃຈແລ້ວເພາະວ່າມັນສິມີຜົນກະທົບຕໍ່ເຮົາ ຫລືວ່າມີຜົນໃນອະນາຄົດຕ້ອງໄດ້ສຶກສາແລ້ວ ຕະກີ້ເຮົາບໍ່ມັກແທ້.”
ຄົນລາວຜູ້ນີ້ເວົ້າອີກວ່າ ການເມືອງລາວກໍມີຄວາມສຳຄັນ ສຳລັບຄົນລາວ ສະນັ້ນຈຶ່ງຢາກ ຂໍຮຽກຮ້ອງ ໃຫ້ທາງການລາວ ສເນີຂ່າວທີ່ໜ້າສົນ ໃຈຫລາຍຂຶ້ນ ເພື່ອໃຫ້ປະຊາຊົນລາວ ຫັນມາຕິດຕາມ ສະພາບການ ບ້ານເມືອງຂອງຕົນ. ເທົ່າທີ່ຜ່ານມາ ຄົນລາວສ່ວນຫລາຍຮູ້ວ່າ ນາຍົກ ຣັຖມົນຕຣີໄທ ແມ່ນໃຜ ແຕ່ບໍ່ຮູ້ວ່າ ນາຍົກຂອງປະເທດຕົນເອງ ແມ່ນໃຜ.
