ນັກສຶກສາຫລາຍຄົນເວົ້າວ່າ ມີການບັງຄັບໂດຽທາງອ້ອມ ໃຫ້ນັກສຶກສາ ຊື້ຫວຍຊາວໜຸ່ມ ເພື່ອຫາຣາຍໄດ້ ເຂົ້າອົງການ. ຕາມລາຍງານຂອງ ແຫລ່ງຂ່າວ ທີ່ບໍ່ປະສົງອອກຊື່.
ຣາຍງານວ່າ ເມື່ອຫຼາຍສັປດາທີ່ຜ່ານມາ ໄດ້ມີແຈ້ງການໄປເຖິງສະຖາບັນການສຶກສາ ທັງພາກລັຖແລະເອກກະຊົນ ໃຫ້ຊື້ຫວຍຊາວໜຸ່ມ ຊຶ່ງມີ ກຳນົດ ການອອກລາງວັນ ໃນວັນຈັນ ທີ 23 ທັນວາ 2013 ໂດຍໃຫ້ເຫດຜົນວ່າເປັນການປະກອບສ່ວນ ຊຸກຍູ້ເຂົ້າໃນວຽກງານ ຂອງອົງການ ຈັດຕັ້ງ ຂອງຊາວໜຸ່ມ ໃນທົ່ວປະເທດ. ຫຼາຍຄົນພາກັນວິພາກວິຈານ ແລະຈົ່ມວ່າການກະທໍາແບບນີ້ເປັນພຶດຕິກັມທີ່ບໍ່ເໝາະສົມ. ດັ່ງນັກສຶກສາ ຜູ້ໜຶ່ງເວົ້າວ່າ:
"ຂະເຈົ້າແຈ້ງການມາ ປະກອບສ່ວນນຳກັນ. ໃບດຽວ 10,000 ກີບ ຫາກບໍ່ຮູ້ວ່າເປັນໃບເດ້ ຈົດຊື່ເອົາ. ຈົດຊື່ຊື່ໆແຕ່ໃບຫວຍບໍ່ມີ. ເອົາເງິນໃຫ້ ເຂົາຊື່ໆ ແຕ່ບໍ່ຮູ້ວ່າໂຕຊື້ເລກຫຍັງ? ໃຫ້ຊື້ຫວຍຊາວໜຸ່ມ ເພື່ອປະກອບສ່ວນ ລະກະອ່ານແຈ້ງການມາ".
ນັກສຶກສາຫລາຍຄົນຈົ່ມວ່າ ມັນເປັນການບີບບັງຄັບທາງອ້ອມ ດ້ວຍການຣະດົມ ເກັບເງິນຜູ້ໜຶ່ງ 10,000 ກີບ ເພື່ອໃຫ້ຄນະຫ້ອງ ຮວບຮວມ ເພື່ອໄປຊື້ໃບຫວຍ ແລ້ວນຳໃບຫວຍມາແຈກຢາຍກັນ.
ຣາຍງານຈາກນະຄອນຫລວງວຽງຈັນວ່າ ປັດຈຸບັນຫຼາຍພາກສ່ວນ ອົງການຈັດຕັ້ງຂອງຣັຖ ພວມຂຸ້ນຂ້ຽວຫາຊ່ອງທາງ ເພື່ອຫາລາຍໄດ້ເຂົ້າອົງ ການຈັດຕັ້ງ ຂອງຕົນ ດ້ວຍສາຣະພັດແຈ້ງການ ແລະ ສາຣະພັດວິທີບໍ່ວ່າຈະເປັນການຣະດົມການ ໃຫ້ຊື້ໜັງສືພິມ ວາຣະສານ ຊີດີເພງ ຂອງ ທີ່ຣະຣຶກ ກາຕິດເສື້ອ ແລະ ຫວຍເນື່ອງໃນໂອກາສ ວັນສຳຄັນຕ່າງໆ ຊຶ່ງສະແດງວ່າ ຫລາຍການຈັດຕັ້ງຂາດເຂີນງົບປະມານ ແລະມີຄວາມ ຈໍາເປັນຕ້ອງຫາຣາຍໄດ້.
