ລາວໂຮມລາວ ເພື່ອປະຊາທິປະໄຕ

ວັນທີ 6 ມັງກອນ 2014 ນີ້, ທ່ານ ດຮ ບຸນທອງ ຈິດມະນີ ກຳມະການກົມການເມືອງສູນກາງພັກ, ປະທານກວດກາສູນກາງພັກ ຫົວໜ້າອົງການກວດກາລັດ, ຫົວໜ້າຕ້ານການສໍ້ລາດບັງຫຼວງ ພ້ອມຄະນະໄດ້ເຄື່ອນໄຫວຢ້ຽມຢາມເຮັດວຽກຢູ່ແຂວງຫົວພັນ. ການມາຢ້ຽມຢາມເຮັດວຽກຄັ້ງນີ້ ໄດ້ຮັບຟັງການລາຍງານສະພາບການເຄື່ອນໄຫວປະຕິບັດວຽກງານກວດກາພັກ - ກວດ ກາລັດໃນໄລຍະຜ່ານມາ. ທົ່ວແຂວງຫົວພັນມີ 88 ໜ່ວຍພັກ, ທຽບໃສ່ປີ 2012 ເພີ່ມຂຶ້ນ 100 ໜ່ວຍ, ມີໜ່ວຍພັກເຂັ້ມແຂງຮູ້ນຳພາຮອບດ້ານ ແລະ ໜ່ວຍພັກແຂງ 338 ໜ່ວຍ, ເພີ່ມຂຶ້ນ 38 ໜ່ວຍ, ໜ່ວຍພັກກາງ 130 ໜ່ວຍ, ອ່ອນ 5 ໜ່ວຍ ແລະ ບໍ່ໄດ້ຈັດແບ່ງປະເພດຈຳນວນໜຶ່ງ, ມີສະມາຊິກພັກທັງໝົດ 12.312 ສະຫາຍ ທຽບໃສ່ປີ 2012 ເຫັນວ່າເພີ່ມຂຶ້ນ 821 ສະຫາຍ; ມີສະມາຊິກພັກແຂງຮູ້ນຳພາຮອບດ້ານ ແລະ ແຂງ 8.998 ສະຫາຍ, ກາງ 1.141 ສະຫາຍ, ອ່ອນ 69 ສະຫາຍ, ເສຍທາດ 50 ສະຫາຍ.

ການປະຕິບັດວຽກງານກວດກາພັກ - ກວດກາລັດໄດ້ເອົາໃຈໃສ່ປະຕິບັດແຜນພັດທະ ນາເສດຖະກິດ - ສັງຄົມຂອງແຂວງ, ກວດກາບັນດາໂຄງການພື້ນຖານໂຄງລ່າງ, ການຂຸດຄົ້ນແຮ່ທາດ, ການເກັບທ້ອນໄມ້ຕົກຄ້າງ, ການຄຸ້ມຄອງລາຍຮັບລາຍຈ່າຍດ້ານງົບປະມານ ແລະ ວຽກ ງານອື່ນໆ. ຜ່ານການກວດກາເຫັນໄດ້ບັນດາພະແນກການ, ອົງການກ່ຽວຂ້ອງຂອງແຂວງ ແລະ ຂັ້ນເມືອງໄດ້ເອົາໃຈໃສ່ປະຕິບັດຕາມລະບຽບກົດໝາຍ, ຕາມການອານຸມັດຂອງຂັ້ນເທິງເປັນຢ່າງດີ, ບັນດາໂຄງການກໍ່ສ້າງພື້ນຖານໂຄງລ່າງສ່ວນຫຼາຍໄດ້ຮັບການຈັດຕັ້ງປະຕິບັດສຳເລັດ ເຮັດໃຫ້ແຂວງຫົວພັນມີລັກສະນະກ້າວກະໂດດເມື່ອທຽບໃສ່ປີຜ່ານມາ. ຈາກຈຸດດີຍັງມີປະກົດການຫຍໍ້ທໍ້ທີເປັນການສໍ້ລາດບັງຫຼວງເກີດຂຶ້ນໃນຖັນແຖວພະນັກງານທີ່ສໍ້ໂກງເງິນຂອງລັດເຊິ່ງມີຜູ້ຕ້ອງຫາທັງໝົດ 61 ຄົນ, ພົບເງິນເສຍຫາຍ 20 ກວ່າຕື້ກີບ ແລະ 376.000 ພັນໂດລາ ແລະ ສາມາດເກັບເງິນຄືນມາໄດ້ແລ້ວພຽງແຕ່ 9 ຕື້ກີບ. ໃນນີ້ຍັງໄດ້ສັງຟ້ອງສານຕັດສິນ 20 ຄົນ, ລົງວິໄນບໍລິຫານ, ປົດຊັ້ນ, ໂຈະການເລື່ອນຊັ້ນ - ເລື່ອນຂັ້ນ, ກ່າວເຕື່ອນ 41 ຄົນ.

ໂອກາດມາຢ້ຽມຢາມ ແລະ ເຮັດວຽກຄັ້ງນີ້ທ່ານ ດຮ ບຸນທອງ ຈິດມະນີ, ກຳມະການກົມການເມືອງສູນກາງພັກ, ປະທານກວດກາສູນກາງພັກ ຫົວໜ້າອົງການກວດກາລັດ, ຫົວໜ້າ ຕ້ານການສໍ້ລາດບັງຫຼວງ ໄດ້ມີຄຳໂອລົມ ເຊິ່ງທ່ານໄດ້ເນັ້ນໜັກໃຫ້ຄະນະພັກອຳນາດການປົກຄອງ ນັບແຕ່ຂັ້ນແຂວງລົງຮອດທ້ອງຖິ່ນຕ້ອງເພີ່ມທະວີຄວາມສາມັກຄີ, ສ້າງຖັນແຖວພະນັກງານກວດກາໃຫ້ມີຄວາມເຂັ້ມແຂງໜັກແໜ້ນ ເພື່ອເຮັດໃຫ້ການຈັດຕັ້ງປະຕິບັດວຽກງານມີຄວາມສອດຄ່ອງສະດວກ ເພາະວຽກງານກວດກາເປັນວຽກງານທີສຳຄັນທີ່ຕ້ອງໄດ້ເຮັດເປັນປົກກະຕິໃນການກວດກາ ເພື່ອຄວາມຖືກຕ້ອງປອດໃສ ໃນຖັນແຖວ ພະນັກງານສະມາຊິກພັກ, ພະນັກ ງານລັດຖະກອນ ແລະ ສິ່ງສຳຄັນຄືເຮັດໜ້າທີປົກປ້ອງສິດຜົນປະໂຫຍດລວມຂອງຊາດ, ປະຊາ ຊົນ ເພື່ອຕ້ານການຖືກສໍ້ໂກ້ງ. ໃຫ້ກຽດເຂົ້າຮ່ວມຮັບຟັງມີການນຳແຂວງ, ຜູ້ເຮັດວຽກງານກວດກາພັກ - ກວດກາລັດ, ອົງການທຽບເທົ່າ, ເມືອງຊຳເໜືອເຂົ້າຮ່ວມຮັບຟັງ.