ຊາວລາວຜູ້ນຶ່ງ ຢູ່ແຂວງ ພາກເໜືອຂອງລາວ ເວົ້າວ່າ ປະຊາຊົນ ທົ່ວໄປ ຍັງບໍ່ກ້າທີ່ ຈະອອກຄວາມເຫັນ ຫລື ວິພາກວິຈານ ເຣື່ອງການ ເມືອງ ຂອງພັກຣັຖ ໃນສະຖານທີ່ ສາທາຣະນະ ເຖິງແມ່ນວ່າຢາກຈະເວົ້າກໍຕາມ ຍ້ອນຢ້ານວ່າ ຫາກເວົ້າໄປ ມີເຈົ້າໜ້າທີ່ ທາງການ ໄດ້ ຍິນ ກໍອາຈຖືກຈັບ ຕົວໄປ. ຜູ້ທີ່ສາມາດ ເວົ້າໄດ້ ກໍຕ້ອງແມ່ນ ພະນັກງານ ຣັຖ ເທົ່ານັ້ນ. ນາງກ່າວວ່າ:
"ການເມືອງລາວ ເວົ້າບໍ່ໄດ້ເດ້ ການເມືອງລາວ ນີ້ລະເນາະ ສົມມຸດວ່າ ຣະບຽບອອກມາ ແລ້ວເຮົາໄປເວົ້າ ໂລເລ ເວົ້າຫລິ້ນ ການເມືອງ ບໍ່ໄດ້ ມີແຕ່ພວກຫລິ້ນ ການເມືອງ ເວົ້າໄດ້".
ນາງເວົ້າຕື່ມວ່າ ຫາກປະຊາຊົນ ຜູ້ໃດຢາກເວົ້າ ຂໍ້ສເນີແນະຕໍ່ ການນໍາ ຂອງພັກຣັຖ ຫລືບໍ່ເຫັນ ພ້ອມນໍາ ກໍສາມາດເວົ້າໄດ້ ແຕ່ຕ້ອງເວົ້າ ໃນຂະນະທີ່ ໄປປະຊຸມ ກັບທາງ ອໍານາດການ ປົກຄອງ ເທົ່ານັ້ນ. ແຕ່ຖ້າຫາກເວົ້າ ພາຍນອກທີ່ປະຊຸມ ຫລືມີການເຕົ້າໂຮມ ກັນປະທ້ວງ ຫຍັງກໍຕາມ ກໍຈະຖືກຈັບ. ຢູ່ບ່ອນທີ່ ຕົນອາສັຍນັ້ນ ກໍມີບາງຄົນ ຖືກຈັບ ໄປແລ້ວ ຍ້ອນເກີດມີ ການປະທ້ວງ ເຈົ້າໜ້າທີ່ ແຕ່ບໍ່ຮູ້ ຄັກແນ່ວ່າ ປະທ້ວງ ເຣື່ອງໃດ ກັນແທ້.
ຊາວລາວອີກຄົນນຶ່ງ ກໍເວົ້າວ່າ ຕົນເຊື່ອວ່າ ປົກກະຕິ ປະຊາຊົນ ສາມາດເວົ້າເຣື່ອງ ການເມືອງ ຕາມສະຖານທີ່ ສາທາຣະນະໄດ້ ແລະເຊື່ອ ວ່າ ຖ້າເຂົາຮູ້ເຣື່ອງ ການ ເມືອງ. ຄັນບໍ່ຮູ້ ກໍບໍ່ເວົ້າ. ນາງເຊື່ອວ່າ ເຈົ້າໜ້າທີ່ ຈະບໍ່ຈັບຜູ້ ທີ່ບໍ່ມີຄວາມຜິດ. ດັ່ງນາງກ່າວຕອນນຶ່ງ:
"ໄດ້ ບໍ່ເປັນຫຍັງ ຄັນຂະເຈົ້າຮູ້ ເລົາຮູ້ ເລົາເວົ້າ ຄັນຖ້າເຮົາ ບໍ່ຮູ້ເຮົາບໍ່ເວົ້າ ສິມາຈັບໄປເລີຍບໍ່ ຖ້າເຮົາບໍ່ຜິດ".
ຢ່າງໃດກໍຕາມ ເມື່ອບໍ່ດົນມານີ້ ອົງການຕິດຕາມ ສິດທິມະນຸດ Human Rights Watch ທີ່ມີສູນກາງ ຢູ່ ນະຄອນນິວຢ໊ອກ ສະຫະຣັຖ ອະເມຣິກາ ກໍໄດ້ເວົ້າວ່າ ການປະຕິບັດ ສິດທິມະນຸດ ຢູ່ລາວ ຢູ່ໃນ ສະພາບຊຸດໂຊມ. ລາວເປັນບ່ອນທີ່ຜູ້ຄົນ ບໍ່ຄ່ອຍຈະໄດ້ຍິນ ກ່ຽວກັບ ການລ່ວງຣະເມີດສິດທິພົລເຮືອນ ສິດທິທາງການເມືອງ ທີ່ເກີດຂຶ້ນໃນລາວ ເພາະທາງການ ປົກປິດໄວ້ ບໍ່ເປີດເຜີຍ ໃຫ້ສາທາຣະນະ ຮູ້.
