ພຣະພຸດທະຮູບອົງນີ້ຢູ່ຖ້ຳປູຄຳ ເມືອງວັງວຽງ
ມັນເມົາບໍຈຶ່ງບໍ່ຢ້ານບາບກິນຫົວ? ຜູ່ຮັກສາເບິ່ງແຍງຄວາມຮຽບຮ້ອຍໃນສະຖານທີ່ນັ້ນໄປໃສ
ຈຶ່ງປ່ອຍໃຫ້ມັນເຮັດແນວນັ້ນ?
Anonymous wrote: ພຣະພຸດທະຮູບອົງນີ້ຢູ່ຖ້ຳປູຄຳ ເມືອງວັງວຽງ
ມື້ນີ້ເຫັນຂ່າວຈາກເພຈ ກ່ຽວກັບນັກທ່ອງທ່ຽວ ທີ່ໄປສະແດງກິຣິຍາບໍ່ເໝາະສົມຕໍ່ພຣະພຸດທະຮູບ ທີ່ຈື່ໄດ້ກໍ່ຄົງແມ່ນຖ້ຳປູຄຳ(ບັງເອີນໄດ້ໄປເມື່ອເດືອນກ່ອນ) ເລີຍເຮັດໃຫ້ພຣະອາຈານຊວດນຶກເຫັນພາບແນະນຳເຫຼົ່ານີ້ແກ່ນັກທ່ອງທ່ຽວ ພຣະອາຈານກໍ່ບໍ່ຮູ້ວ່າຊອກຫາມາແຕ່ໃສ່ ອັນນີ້ເຂົາໂພສຕ໌ໄວ້ໃນເຟສກໍ່ເຊັບໆ ເຂົາມາດົນລ່ະ ພຣະອາຈານກໍ່ເຫັນການປະກອບຄວາມຄິດເຫັນຫລາຍແບບຫລາຍຄົນ ຈະເຮັດບໍ່ສົນໃຈ ປ່ອຍໄປເລີຍກໍ່ຈະເສຍປະໂຫຍດທີ່ຄວນເວົ້າກ່າວກັນ ຢ່າງນ້ອຍກໍ່ຝາກຂໍ້ຄິດໃຫ້ພິຈາຣະນານຳກັນ ຖ້າໃຜມີອຳນາດປະຕິບັດກໍ່ຊ່ອຍເກັບໄປເຮັດ ເລື່ອງແບບນີ້ເຮົາຊາວພຸດເບິ່ງຄືວ່າເຂັ້ມແຂງບໍ່ພໍທີ່ຈະຍອມຮັບໄດ້ ແນ່ນອນພຣະອາຈານກໍ່ຍອມຮັບບໍ່ໄດ້ເຊັ່ນກັນ ແຕ່... ຈະໄປສະແດງອາການງໍແງຄືເດັກນ້ອຍກໍ່ບໍ່ຄືປານໃດ ແມ່ນຢູ່ທີ່ພຣະພຸດທະຮູບເປັນພຽງກ້ອນຫີນດິນຈີ່ຊີເມນເຫລັກທອງວັດຖຸ ແຕ່ກໍ່ແມ່ນສິ່ງວັດຖຸທີ່ເຮົາສ້າງຂຶ້ນເພື່ອເປັນອະນຸດສະຕິນ້ອມຣະນຶກເຖິງພຣະພຸດທະອົງ ເມື່ອເຫັນຈະເພີກເສີຍເລີຍລະໄປເລີຍກໍ່ຄືວ່າໂພດກະດໍ້ ພໍເວົ້າເຮົາກໍ່ຢາກເວົ້າຢາກບອກໃຫ້ເຂົ້າໃຈກັນໄວ້ໃນຖານະມະນຸດທີ່ຕ້ອງໃຊ້ຊີວິດຮ່ວມກັນໃນສັງຄົມ ຕໍ່ເລື່ອງແບບນີ້ເຮົາຄວນເຮັດແນວໃດດີ? ໑.ກໍ່ວາງໃຈໃຫ້ເປັນປົກກະຕິວ່າສິ່ງນີ້ບໍ່ແມ່ນອົງສາສະດາ ເປັນແຕ່ພຽງຮູບປັ້ນທີ່ເຮົາສ້າງຂຶ້ນມາຣະນຶກເຖິງເພິ່ນ ຖ້າໃຜລ່ວງເກີນກໍ່ຮູ້ໄດ້ເຖິງເຈຕະນາຂອງເຂົາວ່າສະຫລາດຫຼືໂງ່ງ່າວ ໃຫ້ກຽດຫຼືບໍ່ໃຫ້ກຽດເຮົາໃນເລື່ອງນີ້ ເຮົາເອງກໍ່ຄວນມີສະຕິທີ່ເຂັ້ມແຂງພໍທີ່ຈະບໍ່ໄປສະແດງອາການທີ່ບໍ່ດີຕໍ່ເຂົາ. ໒.ກໍ່ບອກໃຫ້ເຂົາໄດ້ຮູ້ໄດ້ວ່ານັ້ນແມ່ນການທຳລາຍນ້ຳໃຈບໍ່ໃຫ້ກຽດກັນ ເປັນການກະທຳທີ່ຄວນແກ່ການຕຳນິຕິຕຽນ ບໍ່ໂຄຣົບກໍ່ບໍ່ແມ່ນຈະດູໝິ່ນນ້ຳໃຈກັນ ບ້ານມີກົດບ້ານ ເມືອງມີກົດເມືອງ ເຂົ້າບ້ານເຮົາກໍ່ຄວນໃຫ້ຄວາມໂຄຣົບເຮົາ ຄວນສຶກສາໃສ່ໃຈວ່າອັນໃດເຮັດໄດ້ອັນໃດເຮັດບໍ່ໄດ້ ບໍ່ແມ່ນມາກ້າວກ່າຍລ່ວງລ້ຳສິດທິກັນ ້ບ້ານເມືອງເຮົາແລະຄົນລາວບໍ່ຍອມຮັບການກະທຳດັ່ງກ່າວ ຖ້າປັບໃໝຕ້ອງໂທດລະເມີດກໍ່ຄວນເຮັດ ແມ່ນແຕ່ສູບຢາໃນທີ່ສາທາຣະນະຍັງປັບໃໝໄດ້ ການກະທຳທີ່ກ້າວກ່າຍຄວາມເຊື່ອຖືກັນຈະໃຫ້ເປັນໂທດກໍ່ວ່າໄດ້ຕາມກົດໝາຍຂອງບ້ານເມືອງເພື່ອປ້ອງກັນກຽດສັກສີຂອງບ້ານເມືອງຕົນ ເຮົາຈົນແຕ່ເຮົາກໍ່ຢູ່ຢ່າງມີກຽດ ບໍ່ໄດ້ແມ່ນທາດຂອງຄົນຊົນຊັ້ນບ້ານເມືອງອື່ນ ພໍບອກໄດ້ກໍ່ບອກ ບໍ່ຄວນເມີນເສີຍ. ໓.ອັນນີ້ຝາກໄວ້ໃຫ້ຄິດ ພຣະອາຈານເຫັນປ້າຍໂປຣໂມທເຄື່ອງດື່ມເຕັມບ້ານເຕັມເມືອງ ປ້າຍເຊີນຊວນໃຫ້ໄປຫຼິ້ນໄປທ່ຽວບ່ອນນັ້ນບ່ອນນີ້ ປ້າຍສິນຄ້າ ເຕັມຕາມຈຸດຕ່າງ ໆ ແຕ່ບໍ່ຄ່ອຍເຫັນປ້າຍທີ່ສ້າງຂຶ້ນມາເຕືອນນັກທ່ອງທ່ຽວຕາມແຫຼ່ງທ່ອງທ່ຽວຕ່າງ ໆ ເຫັນແຕ່ເຈົ້າໜ້າທີ່ນັ່ງສູບຢາຖ້າເກັບເງິນຕາມຈຸດຕ່າງ ໆ ແຕ່ຫາປ້າຍທີ່ເຮັດມາເຕືອນນັກທ່ອງທ່ຽວບໍ່ຄ່ອຍມີ ເຊັ່ນໃນຮູບນີ້ກໍ່ດີ ຖ້າຫາກພາກສ່ວນທີ່ກ່ຽວຂ້ອງຈະຈັດພິມປ້າຍໄປຕິດໄວ້ຕາມຈຸດສຳຄັນ ໆ ບໍ່ຕ້ອງຢ້ານຫຼືເກງໃຈນັກທ່ອງທ່ຽວຫລາຍດ໋ອກ ຄົນເຮົາຢູ່ຮ່ວມກັນດ້ວຍຣະບຽບວິໄນ ຖ້າທາງການທ່ອງທ່ຽວ ກະຊວງວັດທະນະທຳ ຫຼືໜ່ວຍງານຫຍັງທັງຫລາຍຈະພິຈາຣະນາຮ່ວມກັນເຮັດຂຶ້ນມາກໍ່ຄຶດວ່າເປັນການດີ ອັນນີ້ເຮົາບໍ່ເຫັນຄວາມໃສ່ໃຈເທົ່າທີ່ຄວນ ຖ້າທາງໜ່ວຍງານຣັດຖະການໃຫ້ອຳນວຍຄວາມສະດວກທາງດ້ານນີ້ໄດ້ມັນກໍ່ແມ່ນດີ ເລື່ອງຄ່າໃຊ້ຈ່າຍເຊັ່ນໃນຕ່າງປະເທດເຂົາກໍ່ຂໍການສະໜັບສະໜຸນຈາກບໍຣິສັດຕ່າງ ໆ ຄິດວ່າທາງເອກະຊົນເຂົາກໍ່ພ້ອມຊ່ວຍເຫລືອ ວ່າແຕ່ຈັດຣະບົບການເຮັດວຽກໃຫ້ມັນດີ ມີແບບແຜນໃຫ້ເຂົາໄດ້ເຫັນຈະແຈ້ງເປັນຮູບຮ່າງສ້າງຂຶ້ນມາຈິງ
ທີ່ພຣະອາຈານເຫັນກໍ່ມີແຕ່ໄກດ໌ນຳທ່ຽວທີ່ຕ້ອງເຮັດໜ້າທີ່ນີ້ ບາງຄົນບໍ່ໄດ້ຮັບການຝຶກອົບຮົມມາດີປານໃດ ເອົາໃຈນັກທ່ອງທ່ຽວໄປຈົນໝົດ ບໍ່ບອກເວົ້າເລົ່າເລື່ອງວັດທະນະທຳທີ່ດີທຳນຽມປະຕິບັດຕົນໃນທີ່ຕ່າງ ໆ ໃຫ້ເຂົາຟັງ ເຊັ່ນທີ່ເຫັນເປັນປັນຫາເລື່ອງພາສາກັບເພື່ອນບ້ານທີ່ເວົ້າເອົາໃຈນັກທ່ອງທ່ຽວນັ້ນເອງ ເຊັ່ນທີ່ພຣະອາຈານເຮັດງານວິໄຈເລື່ອງໄກດ໌ໃນປະເທດອື່ນເຂົາກໍ່ມີສະມາຄົມຂອງເຂົາ ຕ້ອງສອບຜ່ານຫລາຍເລື່ອງບໍ່ແມ່ນແຕ່ເລື່ອງພາສາ ຕ້ອງສອບປະຫວັດສາດບ້ານເມືອງແລະການປະຖົມພະຍາບານເບື້ອງຕົ້ນ ກົດໝາຍເບື້ອງຕົ້ນ ອີຫຍັງອື່ນ ໆ ອີກ ແຕ່ບ້ານເຮົາກໍ່ບໍ່ຮູ້ວ່າເປັນແນວໃດ ເວລາມີປັນຫາກໍ່ບໍ່ຢາກໃຫ້ເບິ່ງແບບຜິວເຜີນ ບາງເລື່ອງກໍ່ຕ້ອງຄຶດໄປໜ້າແດ່ ບາງຄົນອາດບອກວ່າບໍ່ເຫັນສິເປັນຫຍັງເປັນພຽງຮູບປັ້ນ ຄວາມເຂົ້າໃຈເບື້ອງຕົ້ນນັ້ນແມ່ນແທ້ ແຕ່ມີຫຍັງອີກທີ່ເຮົາຕ້ອງເຮັດ? ມັນຕ້ອງມີຄຳຖາມຕໍ່ໄປອີກວ່າເຮົາຈະປ້ອງກັນປັນຫານີ້ໃນອະນາຄົດຕໍ່ໄປໄດ້ແນວໃດ? ຕ້ອງຊ່ອຍກັນໃຫ້ຄວາມເຫັນ ຊ່ອຍກັນຫາທາງອອກ ທາງແກ້ໄຂ ເຮົາກະບໍ່ແມ່ນງໍແງຮ້ອງໄຫ້ ແຕ່ເຮົາກະບໍ່ໄດ້ເພີກເສີຍຕໍ່ໜ້າທີ່ຊາວພຸດ ພຸດທະສາສະໜາກໍ່ບໍ່ໄດ້ມິແຕ່ພຽງຄຳສອນ ເຮົາມີສາສະນະວັດຖຸ ມີສາສະນະບຸກຄົນ ມີຄູບາອາຈານ ມີການປະພຶດປະຕິບັດ ບໍ່ແມ່ນວ່າຈະເອົາແຕ່ຢ່າງໃດຢ່າງໜຶ່ງ ແມ່ນແຕ່ພຣະສົງສາມະເນນເຮັດຜິດເຮົາກໍ່ຕ້ອງຊ່ອຍກັນກວດສອບ ບໍ່ແມ່ນຊົ່ວຊ່າງຊີດີຊ່າງສົງ ຕ້ອງຊ່ອຍກັນເບິ່ງແຍງ ບ້ານຈຶ່ງເປັນບ້ານເມືອງຈຶ່ງເປັນເມືອງ ໃຜເຮັດຫຍັງບໍ່ຈົບບໍ່ງາມກໍ່ບອກສອນແນະນຳກັນ ຫາທາງປ້ອງກັນນຳກັນ ເຂົາບໍ່ມັກບໍ່ນັບຖືໄດ້ ຫຼືວິພາກວິຈານໃນສິ່ງທີ່ບໍ່ມັກໄດ້ ແຕ່ເຂົາບໍ່ຄວນເຂົ້າມາລ່ວງເກີນ ເຂົ້າມາບ້ານເມືອງເຮົາກໍ່ຕ້ອງປະຕິບັດຕາມກົດເກນບ້ານເມືອງເຮົາ ບໍ່ແມ່ນໃຫ້ເຂົາເຮັດຫຍັງຕາມໃຈໄດ້ສະບາຍ ຄັນຊັ້ນເຮົາຊິມີກົດໝາຍໄວ້ເຮັດຫຍັງ? ເຮົາຊິມີທະຫານຕຳຫຼວດໄວ້ເຮັດຫຍັງ? ມີຂະນົບທຳນຽມປະເພນີໄວ້ເຮັດຫຍັງ ແມ່ນບໍລ່ະ? ເຮົາໄປບ້ານເມືອງເຂົາ ເຂົາກໍ່ບັງຄັບໃຫ້ເຮົາປະຕິບັດຕາມກົດໝາຍແລະຣະບຽບວິໄນບ້ານເມືອງເຂົາແມ່ນບໍລ່ະ? ເມື່ອມາບ້ານເຮົາກໍ່ເຊັ່ນກັນ ຝາກໄວ້ໃຫ້ຄິດພິຈາຣະນາ ຈະເຣີນທັມ.//ສັກຂີທັມມິກະພິກຂຸ.
ພັກລັດ ປະປອ່ຍໃຫ້ຄົນຕ່າງຊາດ ເຂົ້າໄປທຳລາຍ ວັດທະນະທັມຂອງຊາວພຸທ
ປະກົດການຫຍໍ້ທໍ້ຂອງສັງຄົມບ້ານເຮົາໃນປັດຈຸບັນນີ້
ຍ້ອນ ຜູ້ນຳ ພັກລັດ ສະລາດສອງໃສ
ຜູ້ຍິງຜູ້ນີ້ ອາດຈະບໍ່ເຂົ້າໃຈຫຍັງ ຄິດວ່າແມ່ນຮູບປັ້ນດິນຈີ່ຊີມັງໄປຊື່ໆຈຶ່ງໄປນອນຈູບເພາະອາດຄິດວ່າເປັນຕາຮັກ ເພາະເພິ່ນບໍ່ໄດ້ຖືສາສນາພຸດຄືພວກເຮົາ ດີແທ້ຄວນຂຽນແນະນຳເປັນພາສາອັງກິດຫລືຝຣັ່ງໃສ່ມີຂໍ້ຫ້າມແນວໃດ ກໍລະນີເຮັດແນວນີ້ຈະຖືກໂທດຖືກໂພຍແນວໃດ ເມື່ອຮູ້ແນວນັ້ນອາດບໍ່ມີໃຜເຮັດແບນີ້ໃສ່, ດ້ານໜຶ່ງກໍຄວນມີຄົນຮັກສາເບິ່ງແຍງບໍ່ໃຫ້ໃຜມາທຳລາຍຈຶ່ງຈະດີ.
ຖ້າໄປເຮັດແບບນີ້ຢູ່ເມືອງໄທແມ່ນຖືກເຂົາຟ້ອງ
ເອົາເລື່ອງ ປັບໄຫມຢ່າງຫນັກແລ້ວ, ແຕ່ອັນນີ້
ເມືອງລາວ ໃຈດີເກີນໄປ
