ອົງການ ຂ່າວສານ ຕ່າງ ປະເທດ ຣາຍງານ ວ່າ ກ່ຽວກັບ ກໍຣະນີ ການ ຫາຍສາບສູນ ຂອງ ທ່ານ ສົມບັດ ສົມພອນ ນັກພັທນາ ກອນ ທີ່ ສຳຄັນ ໃນລາວ ທີ່ ຫ້ອງການ ສະຫະ ປະຊາຊາດ ດ້ານ ສິດມະນຸດ ໄດ້ ສະແດງ ຄວາມ ເປັນຫວ່ງ ຢູ່ຕຣອດ ກຸ່ມ ອົງການ ທີ່ ບໍ່ສັງກັດ ຣັຖບານ ທີ່ ເຮັດວຽກ ໃນລາວ ບໍ່ເວົ້າ ຫຍັງເລີຍ.
ໃນກອງ ປະຊຸມ ທຸກຄັ້ງ ໃນຂະນະ ທີ່ ທູດ ຕ່າງປະເທດ ໄດ້ຍົກ ບັນຫາ ດັ່ງກ່າວ ມາໂອ້ລົມ ກັນ ກຸ່ມ ອົງການ ພັທນາ ໃນລາວ ບໍ່ພຽງ ແຕ່ ພາກັນ ມິດງຽບ ຍັງເພີ້ມ ການຊ່ອຍ ເຫລືອ ໃຫ້ແກ່ ສປປລາວ ຫລາຍຂື້ນ. ກຸ່ມ ນັກ ການທູດ ໃນລາວ ຍັງໄດ້ໃຫ້ ການວິຈັຍ ເຖິງ ສະພາບການ ຂອງ ພາກ ປະຊາ ສັງຄົມ ໃນລາວ ວ່າ ຍັງມີ ຄວາມອ່ອນແອ ຫລາຍຢູ່ ຄວາມ ພຍາຍາມ ໃນການ ສ້າງ ສັກກະຍາພາບ ໃນລາວ ແມ່ນໄດ້ ຮັບການ ສນັບສນູນ ຈາກ ກຸ່ມ ປະເທດ ຜູ້ ບໍຣິຈາກ ແລະ ອົງການ ພັທນາ ຕ່າງໆ ໃນລາວ ແຕ່ກຸ່ມ ຜູ້ ບໍຣິຈາກ ແລະ ອົງການ ພັທນາ ດັ່ງກ່າວ ມິດງຽບ ແລະ ເມີນເສີຍ ຕໍ່ ບັນຫາ ສິດທິມະນຸດ ໃນລາວ.
ນັກວິເຄາະ ເວົ້າວ່າ ການທີ່ ອົງການ ທີ່ ບໍ່ສັງກັດ ຣັຖບານ ແລະ ອົງການ ພັທນາ ຕ່າງໆ ໃນລາວ ມິດງຽບ ກ່ຽວກັບ ບັນຫາ ດ້ານ ສິດທິມະນຸດ ໃນລາວ ໂດຍສະເພາະ ການ ຫາຍສາບສູນ ຂອງ ທ່ານ ສົມບົດ ສົມພອນ ນັ້ນ ສ່ວນນຶ່ງ ກໍເປັນ ເພາະວ່າ ທາງການລາວ ຈະບໍ່ໃວ້ ຫນ້າ ອົງການໃດ ທີ່ ປະນາມ ແລະ ຕ້ານ ຣັຖບານລາວ ດັ່ງທີ່ເຫັນ ໃນຣະຍະ ຜ່ານມາ ເຈົ້າຫນ້າທີ່ ອົງການ ຊ່ອຍເຫລືອ ບາງຄົນ ຖືກ ເນຣະເທດ ຍ້ອນ ປະນາມ ຣັຖບານ ລາວ.
ການປະຊຸມ ກ່ຽວກັບ ສິດທິມະນຸດ ແລະ ການພັທນາ ຂອງ ເອເຊັຍ ໂດຍ ມີຕົວແທນ ຈາກ ອົງການ ສິດທິມະນຸດ 47 ອົງການ ຈາກ 16 ປະເທດ ໃນເອເຊັຍ ໄດ້ຮຽກຮ້ອງ ຄະນະ ກັມມາ ທິການ ສິດທິ ມະນຸດ ຂອງ ອາຊຽນ ແລະ ຣັຖບານ ຂອງ ປະເທດ ອາຊຽນ ໃຫ້ຕໍ່ຕ້ານ ກໍຣະນີ ການບີບ ບັງຄັບ ໃຫ້ສູນຫາຍ ຂອງ ນັກປົກປ້ອງ ສິດທິີມະນຸດ ຢູ່ໃນ ຂົງເຂດ.
ໃນວັນເສົາ ທີ່ ຜ່ານມາ ກຸມສິດທິ ມະນຸດ ໄດ້ຈັດງານ ພິທີ ລຳລຶກ ໃຫ້ແກ່ ທ່ານ ສົມບັດ ສົມພອນ ນັກພັທນາ ອາວຸໂສ ດີເດັ່ນ ຂອງລາວ ເນື່ອງ ໃນໂອກາດ ຄົບຮອບ 18 ເດືອນ ທີ່ ທ່ານ ຖືກລັກ ພາຕົວ. ທ່ານ ສົມບັດ ໄດ້ຖືກ ລັກພາຕົວ ແລະ ບີບບັງຄັບ ໃຫ້ ຫາຍສາບສູນ ໃນວັນທີ 15 ທັນວາ 2012 ຫລັງຈາກທີ່ ຣົດ ຂອງທ່ານ ຖືກ ເຈົ້າໜ້າທີ່ ຕຳຫລວດ ຈະຣາຈອນ ຢຸດຢູ່ ຖະໜົນ ທ່າເດື່ອ ຕໍ່ໜ້າໂຮງຮຽນ ການຊ່າງ ລາວ ເຢັຍຣະມັນ ບ້ານ ວັດນາກ ເມືອງ ສີສັດຕະນາກ ນະຄອນ ຫລວງ ວຽງຈັນ. ອີງຕາມ ຫລັກຖານ ຈາກພາບ ວີດີໂອ ຂອງກ້ອງ ວົງຈອນປິດ.
ທ່ານ ບາລາຍສ ເຊີຣັນໂນ ເຈົ້າໜ້າທີ່ ດ້ານ ສິດທິມະນຸດ ໄດ້ກ່າວ ວ່າ ກໍຣະນີ ການ ຂອງທ່ານ ສົມບັດ ບໍ່ເປັນ ເຫດການ ທີ່ ຖືກ ເມີນເສີຍ ຢູ່ໃນ ປະເທດລາວ ແລະ ຢູ່ໃນ ປະເທດ ອາຊຽນ ກໍເຊັ່ນດຽວ ກັນ ຊຶ່ງມີ ກໍຣະນີ ການບີບ ບັງຄັບ ໃຫ້ສູນຫາຍ ເກີດຂຶ້ນ ຫລາຍ ແລະ ຍັງມີ ກໍລະນີ ຈຳກັດ ສິດທິ ໃນການ ປາກເວົ້າ.
