ຕົກ ມາຊ່ວງໄລຍະລະດູຝົນນີ້, ບໍ່ວ່າມື້ໃດກອງບັນນາທິການໜັງສືພິມ ລາວພັດທະນາພວກເຮົາ ກໍໄດ້ຮັບໂທລະ ສັບຂອງປະຊາຊົນໂທເຂົ້າມາຂໍເພິ່ງສື່ ເພື່ອສ່ອງແສງໄປຍັງຂະແໜງການກ່ຽວຂ້ອງລົງກວດກາ ແລະ ຫາວິທີປົວແປງເສັ້ນທາງຫລາຍເສັ້ນທີ່ຕົກຢູ່ໃນສະພາບເປ່ເພໜັກ ຈົນເກືອບຈະສັນຈອນໄປມາບໍ່ໄດ້ ໂດຍສະເພາະກໍແມ່ນເສັ້ນທາງໜອງບຶກ ແຕ່ດົກໂດກ, ຕານມີໄຊຕັດອອກສູ່ເສັ້ນທາງ 13 ເໜືອ ອັນໄດ້ເຮັດໃຫ້ການສັນຈອນໄປມາພົບຄວາມຫຍຸ້ງຍາກເປັນທີ່ສຸດ ແລະ ສະພາບນີ້ແກ່ຍາວມາແຕ່ຕົ້ນລະດູຝົນ ຈົນມາຮອດປັດຈຸບັນກໍຍັງບໍ່ທັນເຫັນມີພາກສ່ວນກ່ຽວຂ້ອງໃດໆລົງ ກວດກາ ເພື່ອສະແດງຄວາມຮັບຜິດ ແລະ ມີວິທີບູລະນະປົວແປງ. ພ້ອມນັ້ນ ກໍແມ່ນເສັ້ນທາງສ້າງໃໝ່ ແຕ່ບ້ານຫົວຂົວເຂດທາດຫລວງ-ດົງຄຳຊ້າງ-ບ້ານນ້ອຍຊຽງດາ-ນາຄວາຍ ກໍຕົກຢູ່ໃນສະພາບເປື້ອນເປິະເປັນບວກເປັນຂຸມ ຍ້ອນການກໍ່ສ້າງເສັ້ນທາງດັ່ງກ່າວແກ່ຍາວມາຫລາຍປີແລ້ວ, ແຕ່ຍັງບໍ່ສຳເລັດ ອັນໄດ້ສ້າງຄວາມລຳບາກຫຍຸ້ງຍາກໃຫ້ແກ່ການສັນຈອນໄປມາໃນເສັ້ນທາງ ດັ່ງກ່າວ, ຍາມແລ້ງແມ່ນ ຂີ້ຝຸ່ນ, ຍາມຝົນແມ່ນຂີ້ຕົມ ແຕ່ກໍບໍ່ເຫັນມີພາກສ່ວນກ່ຽວຂ້ອງໃດລົງໄປແນະນຳຕັກເຕືອນໃຫ້ຜູ້ ຮັບເໝົາກໍ່ສ້າງເຮັດສຳເລັດຕາມແຜນ ຫລື ບໍ່ກໍຕ້ອງມີມາດຕະການແກ້ໄຂໃຫ້ເດັດຂາດ ແລະ ເມື່ອມໍ່ໆນີ້ ກໍມີປະຊາຊົນຜູ້ອາໄສຢູ່ເຂດນາໄຮ-ນາໂນ ກໍສ່ອງແສງມາວ່າ: ເສັ້ນທາງນາໄຮ-ນາໂນກໍຕົກຢູ່ໃນສະພາບເປ່ເພໜັກ, ບາງບ່ອນຈົນເຮັດໃຫ້ບໍ່ສາມາດທຽວໄປມາໄດ້ ຍ້ອນບວກຍ້ອນຂຸມ ໂດຍສະເພາະເສັ້ນແຍກອອກໄປຄ້າຍຂຸມຂັງບໍ່ສາມາດຜ່ານໄປໄດ້ເລີຍ ຍ້ອນຂົວນ້ອຍຂ້າມເສັ້ນທາງດັ່ງ ກ່າວຖືກຍຸບລົງມາໄດ້ຫລາຍວັນແລ້ວ, ແຕ່ມາຮອດປັດຈຸບັນກໍຍັງບໍ່ທັນໄດ້ຮັບການປົວແປງ ແລະ ເສັ້ນທາງອື່ນໆອີກໃນນະຄອນຫລວງວຽງຈັນກໍຕົກຢູ່ໃນສະພາບເປ່ເພໜັກ ຈຶ່ງຂໍຮຽກຮ້ອງໃຫ້ພາກສ່ວນກ່ຽວຂ້ອງຮີບຮ້ອນລົງກວດກາປົວແປງ ເພື່ອບໍ່ໃຫ້ເປ່ເພໄປຫລາຍກວ່ານີ້.
ເສັ້ນທາງຫົວຂົວຈາກສະພ່າຍ ໄປທາດຫຼວງ ປູຢາງສີແດງ ຜູ້ສັນຈອນໃປມາໃຫ້ລະມັດລະວັງແນ່ເດີ້ ຢ້ານຫມື່ນລົ້ມ
ຄັນເຮົາເວົ້າເຮົາວ່າ ພັດຫາວ່າເຮົາ ເປັນປະຕິການ
ໜ້າເຫັນໃຈຜູ່ໃຊ້ຣົຖໃຊ້ຖະໜົນ ເສຍພາສີອາກອນທຸກອັດແຕ່ພັດໄຮ້ຄວາມສະດວກ
ຖ້າຂ້ອຍເປັນທ່ານສົມມາດ ພົນເສນາ ຂ້ອຍຈະຍື່ນໃບລາອອກທັນທີເພື່ອໃຫ້ໂອກາດ
ລູກຫຼານຜູ່ທີ່ມີຄວາມສາມາດໄດ້ມີໂອກາດໄດ້ຂຶ້ນມາສະແດງນ້ຳໃຈຮັກຊາດອັນແທ້
ຈິງຂອງເຂົາເຈົ້າ.
