ເຈົ້າໜ້າທີ່ ກະຊວງ ຊັພຍາກອນ ທັມມະຊາດ ແລະ ສິ່ງແວດລ້ອມ ເປີດເຜີຍວ່າ ປັດຈຸບັນ ບັນຫາ ທີ່ດິນ ເກີດຂຶ້ນ ຫລາຍ ໃນ ທົ່ວປະເທດ ສ່ວນນຶ່ງ ແມ່ນຄວາມ ຂາດຕົກ ບົກຜ່ອງ ຂອງ ພະນັກງານ ແລະ ສ່ວນນຶ່ງ ແມ່ນເກີດ ຈາກ ຜູ້ສວຍ ໂອກາດ ຫວັງ ຜົນປໂຍດ ຈຶ່ງຢາກ ໃຫ້ ປະຊາຊົນ ເປັນຫູ ເປັນຕາ ຊ່ວຍກັນ ຖ້າເຫັນ ການກະທຳ ທີ່ ບໍ່ຖືກຕ້ອງ ຂອງ ເຈົ້າໜ້າທີ່ ບາງຄົນ ຂໍໃຫ້ແຈ້ງຫາ ໜ່ວຍງານ ທີ່ກ່ຽວ ຂ້ອງ. ດັ່ງ ເຈົ້າໜ້າທີ່ ກ່າວວ່າ:
"ປະຊາຊົນ ໄປຊື້ເນາະ ແບບວ່າ ຊື່ຜູ້ກ່ຽວ ແຕ່ວ່າດິນ ເປັນຂອງຣັດ ຊື້ມາກໍຊື້ ຊື້ຈ່າຍເງິນ ກໍຊື້ໄດ້ ແຕ່ວ່າ ຈະ ອອກໜັງສື ຢ້ານອອກ ເປັນ ຊື່ເຂົາ ບໍ່ໄດ້ ບາງເທື່ອ ເພາະວ່າ ເປັນ ປະຊາຊົນ ເພີ່ນຍັງບໍ່ມີ ນະໂຍບາຍ ແກ້ໄຂ ເນາະ ແບບວ່າ ຫັນດິນຣັດ ມາເປັນດິນ ຂອງ ປະຊາຊົນ".
ເຈົ້າໜ້າທີ່ ທ່ານນີ້ ກ່າວອີກວ່າ ກໍຣະນີ ທີ່ດິນ ທີ່ພົບເຫັນ ຫລາຍທີ່ສຸດ ຄື ເຈົ້າໜ້າທີ່ ຂາຍດິນ ຂອງຣັດ ໃຫ້ ປະຊາຊົນ ຊຶ່ງ ຕາມກົດໝາຍ ແລ້ວ ແມ່ນ ເຮັດບໍ່ໄດ້ ແຕ່ຜ່ານມາ ກໍມີ ປະຊາຊົນ ທີ່ບໍ່ຮູ້ ກົດໝາຍ ແລະ ບໍ່ກວດສອບ ໃຫ້ຄົບຖ້ວນ ຈຶ່ງ ຕົກເປັນເຫຍື່ອ ແລະ ເສັຽເງິນ ໄປແລ້ວ ແຕ່ບໍ່ໄດ້ ເປັນເຈົ້າຂອງ ທີ່ດິນ.
ກ່ຽວກັບ ບັນຫານີ້ ທ່ານ ອາໂນໄທ ຈັນທະລັງສີ ຮອງຫົວໜ້າ ກົມທີ່ດິນ ກະຊວງ ຊັພຍາກອນ ທັມມະຊາດ ແລະ ສິ່ງແວດລ້ອມ ໄດ້ກ່າວ ຕໍ່ ສື່ມວນຊົນ ລາວວ່າ ດຽວນີ້ ຕ້ອງ ຍອມຮັບວ່າ ກະແສວິຈານ ທາງສັງຄົມ ທີ່ມີຕໍ່ກົມ ທີ່ດິນ ມີຢ່າງ ຫລວງຫລາຍ ແລະ ມີບາງ ກໍຣະນີ ທີ່ກາຍເປັນ ປະກົດການ ຫຍໍ້ທໍ້ ໃນສັງຄົມ ຊຶ່ງບັນຫາ ສ່ວນນຶ່ງ ກໍເກີດຈາກ ເຈົ້າໜ້າທີ່ ນັ້ນເອງ ທີ່ ຕ້ອງການ ປະໂຫຍດ ແບບບໍ່ຖືກຕ້ອງ.
ເມື່ອບໍ່ດົນ ມານີ້ ມີ ພະນັກງານ ຂອງຣັດ ຈຳນວນ 8 ຄົນ ຖືກຕັດສິນ ຈຳຄຸກ ໃນຂໍ້ຫາ ຂາຍທີ່ດິນຣັດ ໂດຍ ການປອມແປງ ເອກສານ.
