ກອງປະຊຸມໂຄງການບູລະນະຮັກສາທາງຫຼວງ ສົກປີ 2014-2015 ໄດ້ຈັດຂຶ້ນວັນທີ 13 ພະຈິກ 2014 ຢູ່ທີ່ກະຊວງໂຍທາທິການ ແລະ ຂົນສົ່ງ (ຍທຂ) ໂດຍການເປັນປະທານຂອງທ່ານ ເລົາຄຳ ສົມເພັດ ຫົວໜ້າກົມຂົວທາງ ກະຊວງ ຍທຂ ເຊິ່ງມີບັນດາຫົວໜ້າພະແນກການ ຫ້ອງການ ຄະນະກຳມະການປະມູນໂຄງການ ບູລະນະຮັກສາທາງຫຼວງພາກກາງ (ເຂດ 3) ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໂຄງການບູລະນະຮັກສາທາງຫຼວງ (ເຂດ 3) ແມ່ນໄດ້ຮັບອະນຸມັດງົບປະມານຈາກກອງທຶນທາງ ເພື່ອປະຕິບັດວຽກບູລະນະຮັກສາທາງຫຼວງ ປະຈຳສົກປີ 2014-2015 ແລະ ຕາມແຜນວຽກໂຄງການມີທັງໝົດ 31 ສັນຍາ ມີຄວາມຍາວທັງໝົດ 909,2 ກິໂລແມັດ ເຊິ່ງກວມເອົາ 5 ແຂວງຄື: ນະຄອນຫຼວງວຽງຈັນ ແຂວງວຽງຈັນ ແຂວງໄຊສົມບູນ ແຂວງບໍລິຄຳໄຊ ແລະ ແຂວງຄຳມ່ວນ ໂດຍມີມູນຄ່າປະມູນໄວ້ເບື້ອງຕົ້ນ ປະມານ 150 ຕື້ກີບ ໜ້າວຽກຕົ້ນຕໍ່ຂອງໂຄງການ ແມ່ນສຸມໃສ່ວຽກງານປັບປຸງໂຄງສ້າງທາງ ບັນດາຈຸດທີ່ເປ່ເພເສຍຫາຍເຊັ່ນ: ໜ້າທາງແຕກ ບວມ ຕ້ອງໄດ້ຂູດຮື້ ແລະ ປູຢາງສອງຊັ້ນຄືນໃໝ່ເປັນຈຸດໆ ຕາມແຕ່ລະຈຸດທີ່ເປ່ເພຕົວຈິງເປັນຊ່ວງຍາວ ຫຼື ສັ້ນ ເພື່ອຮັບປະກັນການສັນຈອນຂອງພາຫະນະໃຫ້ໂລ່ງລ່ຽນ ແລະ ທັງເປັນການຢືດອາຍຸການນຳໃຊ້ອອກໄປອີກ ເຊິ່ງຈະເປັນການປະຢັດງົບປະມານໄດ້ເປັນຢ່າງດີ.
ສຳລັບໂຄງການບູລະນະຮັກສາທາງຫຼວງແຫ່ງຊາດປະຈຳເຂດ ມີທັງໝົດ 4 ເຂດ ແລະ ແຕ່ລະເຂດມີຫ້ອງການປະຈຳຢູ່ເຂດໃຈກາງຂອງເຂດ ແລະ ຮັບຜິດຊອບບູລະນະສະເພາະເສັ້ນທາງຫຼວງ ຜ່ານແຕ່ລະເຂດແຂວງຄື: ເຂດ 1. ປະກອບມີ 4 ແຂວງ ມີແຂວງຜົ້ງສາລີ ອຸດົມໄຊ ຫຼວງນ້ຳທາ ຫ້ອງການແມ່ນຕັ້ງຢູ່ແຂວງອຸດົມໄຊ ເຂດ 2. ປະກອບມີ 4 ແຂວງ ມີແຂວງຫົວພັນ ຊຽງຂວາງ ຫຼວງພະບາງ ແລະ ໄຊຍະບູລີ ຫ້ອງການຕັ້ງຢູ່ແຂວງຊຽງຂວາງ ເຂດ 3 ປະກອບມີ 5 ແຂວງ ມີນະຄອນຫຼວງວຽງຈັນ ແຂວງວຽງຈັນ ໄຊສົມບູນ ບໍລິຄຳໄຊ ແລະ ແຂວງຄຳມ່ວນ ຫ້ອງການຕັ້ງຢູ່ກົມຂົວທາງ ກະຊວງ ຍທຂ ແລະ ເຂດ 4 ປະກອບມີ 5 ແຂວງ ມີແຂວງສະຫວັນນະເຂດ ສາລະວັນ ຈຳປາສັກ ເຊກອງ ແລະ ອັດຕະປື ຫ້ອງການຕັ້ງຢູ່ແຂວງຈຳປາສັກ ທຸກໂຄງການແມ່ນໃຫ້ສຳເລັດພາຍໃນ 5 ເດືອນ ເລີ່ມເດືອນທັນວາ 2014.
