ທາງການລາວຍັງເວົ້າຄວາມເກົ່າ ຢູ່ ເຈນີວາ

ທາງການ ລາວ ໄດ້ ຊີ້ແຈງ ກໍຣະນີ ການ ຫາຍສາບສູນ ຂອງ ທ່ານ ສົມບັດ ສົມພອນ ຢູ່ໃນ ກອງປະຊຸມ ທົບທວນ ການ ປະຕິ ບັດ ວຽກງານ ດ້ານ ສິດທິ ມະນຸດ ຫລື UPR ຢູ່ ນະຄອນ ເຈນີ ວາ ປະເທດ ສວິຊແລັນ ໃນ ວັນທີ 20 ມົກກະຣາ ທີ່ ຜ່ານມາ ໂດຍ ແມ່ນ ທ່ານ ພົງສະຫວັດ ບຸບຜາ ຣັຖມົນຕຣີ ປະຈຳ ສຳນັກ ງານ ປະທານ ປະເທດ ແລະ ທັງເປັນ ປະທານ ຄນະ ກັມການ ສິດທິ ມະນຸດ ລາວ ໄດ້ກ່າວ ໃນທີ່ ປະຊຸມ ເປັນ ພາສາ ອັງກິດ ວ່າ:

"ເຈົ້າໜ້າທີ່ ກ່ຽວຂ້ອງ ຂອງ ສປປ ລາວ ກຳລັງ ດຳເນີນການ ແລະ ສືບສວນ ຢ່າງ ຈິງຈັງ ແລະ ຍັງຈະ ດໍາເນີນ ຕໍ່ໄປ ເພື່ອ ຊອກຫາ ຄວາມຈິງ ແລະ ນຳເອົາ ຜູ້ ກະທຳຜິດ ເຂົ້າສູ່ ຂະບວນ ການ ຍຸຕິທັມ ພາຍໃຕ້ ກົດໝາຍ ຂອງ ສປປລາວ".

ແຕ່ ຍາງນາງ ອຶງຊຸຍເມັງ ພັລຍາ ຂອງທ່ານ ສົມບັດ ສົມພອນ ອອກມາ ກ່າວ ທີ່ ມີເນື້ອໃນ ກົງກັນຂ້າມ ກັບ ຄຳເວົ້າ ຂອງທ່ານ ພົງສະຫວັດ ບຸບຜາ ໂດຍ ຍານາງ ໄດ້ກ່າວວ່າ:

"ການຊີ້ແຈງ ຂອງ ທ່ານ ພົງສະຫວັດ ບຸບຜາ ບໍ່ມີ ຂໍ້ມູນໃໝ່. ຍັງຄົງ ສືບຕໍ່ ເວົ້າວ່າ ການສືບສວນ ກຳລັງ ດຳເນີນໄປ, ແຕ່ວ່າ ເວລາຜ່ານ ໄປ 2 ປີ ແລ້ວ ແລະ ກໍຍັງ ບໍ່ມີຄວາມ ຄືບໜ້າ ຫຍັງ. ຂ້າພະເຈົ້າ ຫວັງວ່າ ດຽວນີ້ ຣັຖບານ ລາວ ຈະ ຮັບເອົາ ການຊ່ວຍເຫລືອ ຈາກ ສາກົນ, ຈັດຕັ້ງ ຄນະ ກັມມະການ ໃໝ່ ແລະ ເປັນ ອິສຣະ ເພື່ອ ສືບສວນ ກໍຣະນີ ດັ່ງກ່າວ ແລະ ຊອກຫາ ຕົວ ສົມບັດ".

ທ່ານ ສົມບັດ ສົມພອນ ຖືກ ລັກພາ ຕົວ ໄປ ໃນວັນທີ 15 ທັນວາ ປີ 2012 ຢູ່ໜ້າປ້ອມ ຕຳຣວດ ຖະໜົນ ທ່າເດື່ອ ໃກ້ກັບ ໂຮງຮຽນ ການຊ່າງ ລາວ-ເຢັຽຣະມັນ ເຂດ ບ້ານວັດນາກ ເມືອງ ສີສັດຕະນາກ ນະຄອນ ຫລວງ ວຽງຈັນ ໂດຍ ມີ ເຈົ້າໜ້າທີ່ ຕຳຣວດ ຈຳນວນ ນຶ່ງ ເປັນ ຜູ້ຢຸດຣົດ ທ່ານ ສົມບັດ. ອີງຕາມ ຫລັກຖານ ຈາກ ກ້ອງ ວົງຈອນປິດ.

ຕໍ່ເຫດການ ດັ່ງກ່າວ ບັນດາ ອົງການ ຈັດຕັ້ງ ດ້ານ ສິດທິ ມະນຸດ ໄດ້ໃຫ້ ທັສນະ ວ່າ ຜູ້ເຈົ້າໜ້າທີ່ ຂອງ ທາງການ ລາວ ບາງທ່ານ ມີສ່ວນ ຮູ້ເຫັນ ໃນການ ລັກພາ ຕົວ ທ່ານ ສົມບັດ ສົມພອນ ໃນຄັ້ງນີ້.