ອົງການ ສາກົນ ທີ່ ຕັ້ງສຳນັກງານ ຢູ່ ສປປລາວ ກຳລັງ ປຶກສາ ຫາລືກັນ ກ່ຽວກັບ ເຣື້ອງ ທີ່ ທາງການລາວ ອອກດຳຣັດ ກວດສອບ ເນື້ອຫາ ຂໍ້ຄວາມ ຂ່າວສານ ຂອງທຸກ ອົງການ ກ່ອນຈະເອົາ ອອກເຜີຍແຜ່ ໃນເຄືອຂ່າຍ ອິນເຕີເນັດ ແລະ ຊ້ອງຕ່າງໆ ທີ່ ກ່ຽວກັບ ລາວ. ເຈົ້າຫນ້າທີ່ ອົງການ ຕ່າງຊາດ ແຫ່ງນຶ່ງ ໃນ ນະຄອນຫຼວງ ວຽງຈັນ ຜູ້ທີ່ ບໍ່ປະສົງ ອອກຊື່ ກ່າວຕໍ່ ເອເຊັຽເສຣີ ໃນ ມື້ວັນທີ 6 ມົກກະຣາ ນີ້ວ່າ ທີ່ຜ່ານມາ ຂ່າວສານ ບົດຄວາມ ແລະ ຂໍ້ມູນຕ່າງໆ ທີ່ ເອົາລົງໃນ ເວັບໄຊ ຂອງ ອົງການ ບໍ່ຈຳເປັນ ຕ້ອງໄດ້ສົ່ງ ໃຫ້ ຣັຖບານ ກວດກາ ກ່ອນ. ດັ່ງທ່ານ ກ່າວວ່າ:
"ໄດ້ຮັບຂ່າວ ຄືກັນ ບໍ່ນະ ທີ່ຜ່ານມາ ແຕ່ພວກເຮົາ ກໍຈະໄດ້ ລົມກັນ ນະເຈົ້າ".
ທ່ານກ່າວ ຕື່ມວ່າ ປັດຈຸບັນ ທາງອົງການ ຕ່າງຊາດ ກຳລັງ ປຶກສາ ຫາລືກັນ ແລະ ຈະ ອອກຖແລງການ ກ່ຽວກັບ ເຣື້ອງນີ້ ໃນໄວໆນີ້. ຫນັງສືພິມ ພາກຣັດ ສປປລາວ ຣາຍງານ ວ່າ ທ່ານ ທອງສິງ ທັມມະວົງ ນາຍົກ ຣັຖມົນຕຣີ ລາວ ໄດ້ອອກ ດຳຣັດ ລົງວັນທີ 24 ພຶສຈິກາ ປີ 2015 ໃຫ້ບັນດາ ສະຖານທູດ ແລະ ອົງການ ສາກົນ ໃນລາວ ສົ່ງເນື້ອຫາ ຂ່າວສານ ກ່ອນທີ່ຈະອອກ ເຜີຍແຜ່ ໃນເຄືອຂ່າຍ ອິນເຕີເນັດ ຂອງຕົນ ໃຫ້ ກະຊວງ ຕ່າງປະເທດ ກວດກາ ກ່ອນ.
ດຳຣັດ ດັ່ງກ່າວ ຍັງໄດ້ ອະນຸຍາດ ໃຫ້ ສື່ ຕ່າງປະເທດ ເຂົ້າມາຕັ້ງ ສຳນັກ ໃນລາວ ແຕ່ຕ້ອງຂໍ ອະນຸຍາດ ຈາກ ກະຊວງ ຕ່າງປະເທດ ກ່ອນ ຊື່ງ ໃນປັດຈຸບັນ ມີພຽງແຕ່ ຈີນ ແລະ ວຽດນາມ ເທົ່ານັ້ນ ທີ່ ມີສຳນັກງານ ຢູ່ລາວ. ເອເຊັຽ ເສຣີ ກໍໄດ້ສອບຖາມ ເຣື້ອງ ນີ້ ຕໍ່ ກົມການຂ່າວ ກະຊວງ ຕ່າງປະເທດ ເຈົ້າຫນ້າທີ່ ຢູ່ທີ່ນັ້ນ ບອກວ່າ ໃຫ້ລໍຖ້າຟັງ ຣາຍລະອຽດ ໃນ ມື້ວັນທີ 14 ມົກກະຣາ ນີ້ ທີ່ ດຳຣັດ ດັ່ງກ່າວ ຈະ ຖືກ ບັງຄັບ ໃຊ້.
