ຄນະ ຜູ້ຕາງໜ້າ ພັນທະມິດ ເພື່ອ ປະຊາທິປະຕັຍ ໃນລາວ ນຳໂດຍ ດຣ. ບຸນທອນ ຈັນມະລາວົງ ວີເຊີ ໄດ້ເດີນທາງ ໄປ ປະເທສ ອັງກິດ, ເພື່ອເຂົ້າພົບ ອົງການ ນິຣະໂທດກັມ ສາກົນ ແລະ ພາກສ່ວນ ຮັບຜິດຊອບ ບັນຫາ ໃນລາວ ຂອງ ກະຊວງ ການຕ່າງ ປະທສ ອັງກິດ ທີ່ມີຫຼາຍ ບັນຫາ ກ່ຽວກັບ ການຣະເມີດ ສິດທິ ມະນຸດ ແລະ ການຂາດຄວາມ ເປັນ ເອກກະຣາດ ຂອງ ສປປລາວ ທີ່ ກຸງ ລອນດອນ ໃນ ວັນທີ 19 ມົກກະຣາ 2016. ໃນຣະຫວ່າງ ພົບພໍ້ກັນ ນັ້ນ ຝ່າຍ ພັນທະມິດ ເພື່ອ ປະຊາທິປະຕັຍ ໄດ້ແຈ້ງ ໃຫ້ ຄູ່ຮ່ວມ ສົນທະນາ ຮູ້ເຖິງ ການຣະເມີດ ສິດທິ ມະນຸດ ຢ່າງ ຮ້າຍແຮງ ຢູ່ ສປປລາວ. ດັ່ງ ດຣ. ບຸນທອນ ຈັນມະລາວົງ ວີເຊີ ໄດ້ກ່າວ ໃນ ຕອນນຶ່ງວ່າ:
"ພວກເຮົາ ໄດ້ມີການ ໂອ້ລົມ ສົນທະນາ ກັບ ພວກເພິ່ນ ບັນຫາ ຣະເມີດ ສິດທິ ມະນຸດ ໃນລາວ ບັນຫາ ທີ່ ປະຊາຊົນ ລາວ ຖືກກົດຂີ່ ແລະ ບັນຫາ ທີ່ວ່າ ປະເທສລາວ ບໍ່ມີ ເອກກະຣາດ ທີ່ແທ້ຈິງ ໂດຍ ທີ່ມີ ປະທສ ອ້ອມຂ້າງ ຍັງມີ ອິດທິພົນ ຢຽບຍໍ່າ ສິດທິ ຂອງ ປະຊາຊົນ ລາວ ໂດຍສະເພາະ ບັນຫາ ທີ່ ວຽດນາມ ຄອບຄອງ ລາວ ແລະ ອິດທິພົນ ເຖສກິດ ຂອງຈີນ ອັນນີ້ ກະເປັນເຣຶ່ອງ ສໍາຄັນ ທີ່ ໄດ້ມີການ ໂອ້ລົມກັນ".
ຫລັງຈາກ ເຄື່ອນໄຫວ ວຽກງານ ຢູ່ ປະເທສ ອັງກິດ ເປັນເວລາ 3 ມື້ແລ້ວ ຄນະ ຜູ້ແທນ ພັນທະມິດ ເພື່ອ ປະຊາທິປະຕັຍ ໃນລາວ ກໍໄດ້ເດີນທາງ ໄປ ສະຫະຣັຖ ອະເມຣິກາ ໃນວັນທີ 20 ເຖິງ 23 ມົກກະຣາ. ດຣ. ບຸນທອນ ຈັນທະລາວົງ ວີເຊີ ພ້ອມດ້ວຍ ຄນະ ໄດ້ພົບພໍ້ ສົນທະນາ ກັບ ອົງການ ນີຣະໂທດກັມ ສາກົນ ປະຈຳ ສະຫະຣັຖ ອະເມຣິກາ ແລະ ປຶກສາ ຫາລື ກັບຜູ້ ຮັບຜິດຊອບ ບັນຫາ ລາວ ຂອງ ກະຊວງ ການຕ່າງ ປະເທສ ສະຫະຣັຖ ຊຶ່ງ ໃນນັ້ນ ຄູ່ ສົນທະນາ ມີຄວາມສົນໃຈ ຫຼາຍ ໃນບັນຫາ ການ ຣະເມີດ ສິດທິ ມະນຸດ ຢູ່ລາວ. ດັ່ງທີ່ ດຣ. ບຸນທອນ ຈັນທະລາວົງ ວີເຊີ ໄດ້ກ່າວອີກ ໃນຕອນນຶ່ງ ວ່າ:
"ໄດ້ມີການ ປຶກສາ ຫາລືກັນ ກ່ຽວກັບ ສະພາບ ການຣະເມີດ ສິດທິມະນຸດ ໃນລາວ ໂດຍສະເພາະ ການ ຈໍາກັດ ສິດທິ ທາງດ້ານ ຂ່າວສານ ທາງດ້ານ ອິນເຕິເນັດ ທີ່ວ່າມີ ຫຼາຍຄົນ ໄດ້ຖືກ ຈັບກຸມໄປ ບັນຫາ ການຣະເມີດ ສິດທິ ດ້ານອື່ນໆ ບັນຫາ ການຍຶດ ດິນດອນ ຕ່ອນຫຍ້າ ຂອງ ປະຊາຊົນ ບັນຫາ ການສໍ້ໂກງ ການ ຄ້າມະນຸດ ການ ຕັດໄມ້ ທໍາລາຍ ປ່າ".
ໃນໂອກາດ ການຢ້ຽມຢາມ ສະຫະຣັຖ ຄັ້ງນີ້ ດຣ. ບຸນທອນ ຈັນທະລາວົງ ວີເຊີ ປະທານ ພັນທະມິດ ເພື່ອ ປະຊາທິປະຕັນ ໃນລາວ ກໍໄດ້ຢື່ນ ໜັງສື ເຖິງ ທ່ານ ບາຣັກ ໂອບາມາ ປະທານາທິບໍດີ ສະຫະຣັຖ ອະເມຣິກາ ກ່ຽວກັບ ສະພາບ ການຣະເມີດ ສິດທິ ມະນຸດ ຢູ່ລາວ ໃນວັນທີ 21 ມົກກະຣາ 2016. ໃນນັ້ນ ຂຽນວ່າ ພວກ ຂ້າພະເຈົ້າ ສນັບສນູນ ຢ່າງເຕັມສ່ວນ ການເປັນ ຄູ່ຮ່ວມ ຂ້າມ ປາຊີຟິກ ແລະ ການຈະໄປ ຢ້ຽມຢາມ ສປປລາວ ຂອງ ທ່ານ. ພ້ອມກັນນັ້ນ ກໍຂໍໃຫ້ ທ່ານ ເອົາໃຈໃສ່ ໃນບັນຫາ ທີ່ ຊາວໂລກ ມີຄວາມກັງວົນ ກ່ຽວກັບ ການຣະເມີດ ສິດທິ ມະນຸດ ຢູ່ລາວ.
ພັກ ປະຊາຊົນ ປະຕິວັດ ລາວ ເລືອກ ທ່ານ ບຸນຍັງ ວໍຣະຈິດ ເປັນ ເລຂາທິການ ໃຫຽ່ ແທນ ທ່ານ ຈູມມະລີ ໄຊຍະສອນ.
ໃນ ກອງປະຊຸມ ມື້ສຸດທ້າຍ ເມື່ອ ວັນສຸກ ວັນທີ່ 22 ມົກກະຣາ ທ່ານ ບຸນທອງ ຈິດມະນີ ກັມມະການ ກົມການເມືອງ ປະກາດ ຜົນການ ເລືອກຕັ້ງ ຄນະ ກົມການເມືອງ ຂອງພັກ ຊຸດໃໝ່ ຊຶ່ງ ທ່ານ ບຸນຍັງ ວໍຣະຈິດ ໄດ້ຮັບ ຄະແນນສຽງ ທີນຶ່ງວ່າ:
“ກົມການເມືອງ ສູນກາງພັກ ປະກອບດ້ວຍ 11 ສະຫາຍ ດັ່ງຕໍ່ໄປນີ້:
1.ສະຫາຍ ບຸນຍັງ ວໍຣະຈິດ,
2.ສະຫາຍ ດຣ. ທອງລຸນ ສີສຸລິດ,
3.ສະຫາຍ ນາງ ປານີ ຢ່າທໍ່ຕູ້,
4.ສະຫາຍ ດຣ. ບຸນທອງ ຈິດມະນີ,
5.ສະຫາຍ ດຣ. ພັນຄຳ ວິພາວັນ,
6.ສະຫາຍ ຈັນສີ ໂພສີຄຳ,
7.ສະຫາຍ ດຣ. ໄຊສົມພອນ ພົມວິຫານ,
8.ສະຫາຍ ພົນໂທ ຈັນສະໝອນ ຈັນຍາລາດ,
9.ສະຫາຍ ດຣ. ຄຳພັນ ພົມມະທັດ,
10.ສະຫາຍ ດຣ. ສິນລະວົງ ຄຸດໄພທູນ,
11.ສະຫາຍ ສອນໄຊ ສີພັນດອນ.
ເປັນທີ່ ຮູ້ກັນວ່າ ທ່ານ ບຸນຍັງ ວໍຣະຈິດ ປັດຈຸບັນ ອາຍຸ 78 ປີ ຈົບການສຶກສາ ຢູ່ ປະເທດ ວຽດ ນາມ ແລະ ເປັນທີ່ ສັງເກດວ່າ ກັມມະການ ກົມການເມືອງ ໃໝ່ 6 ທ່ານ ສຸດທ້າຍ ແມ່ນ ສະມາຊິກ ໃໝ່ ຫາກໍຖືກ ເລືອກຕັ້ງ ແທນ ກັມມະການ ກົມການເມືອງ ເກົ່າ ທີ່ສຳຄັນ 5 ທ່ານ ທີ່ບໍ່ມີຊື່ ຢູ່ໃນຄນະ ກົມການເມືອງ ຊຸດໃໝ່ ນັ້ນເລີຍ ຄື: ທ່ານ ຈູມມະລີ ໄຊຍະສອນ, ທ່ານ ທອງສິງ ທັມມະວົງ, ທ່ານ ອາຊ່າງ ລາວລີ, ທ່ານ ສົມສວາດ ເລັ່ງສວັດ, ແລະ ທ່ານ ບຸນປອນ ບຸດຕະນະວົງ.
ໃນການເລືອກ ຄນະຜູ້ນຳ ພັກ ເທື່ອນີ້ ມີເຫດການ ເກີດຂື້ນ ເໜືອ ຄວາມຄາດໝາຍ 3 ຢ່າງ ທີ່ ໜ້າສົນໃຈ ຄື:
1.ທ່ານ ບຸນປອນ ບຸດຕະນະວົງ ຊຶ່ງເປັນ ສະມາຊິກ ຄນະກັມມະການ ກົມການເມືອງ ສູນກາງພັກ ສໄມທີ 9, ບໍ່ໄດ້ຖືກ ຮັບເລືອກ ເປັນ ສະມາຊິກ ຄນະ ກັມມະການ ກົມການເມືອງ ສູນກາງພັກ ໃນສໄມ ທີ 10 ນີ້ເລີຍ, ແຕ່ທ່ານຍັງຢູ່ ໃນຣາຍຊື່ 69 ຄົນ ຂອງຄນະ ກັມມະການ ສູນກາງພັກ ຢູ່.
2,ທ່ານ ພົນໂທ ແສງນວນ ໄຊຍະລາດ, ຣັຖມົນຕຣີ ວ່າການ ກະຊວງ ປ້ອງກັນ ປະເທດ ຄົນ ປະຈຸບັນ ທີ່ ຄາດວ່າ ຈະໄດ້ຮັບ ເລືອກຕັ້ງເປັນ 1 ໃນ ສະມາຊິກ ຄນະ ກັມມະການ ກົມການເມືອງ ຊຸດໃໝ່ ແຕ່ ຜົນປະກົດວ່າ ບໍ່ຖືກເລືອກ, ກັບແມ່ນ ທ່ານ ພົນໂທ ຈັນສະໝອນ ຈັນຍາລາດ ຮອງ ຣັຖມົນຕຣີ ກະຊວງ ປ້ອງກັນ ປະເທດ ທີ່ ເປັນຮອງ ທ່ານ ພົນໂທ ແສງນວນ ໄຊຍະລາດ, ພັດໄດ້ຖືກ ຮັບເລືອກ ຂຶ້ນເປັນ ສະມາຊິກ ຄນະ ກັມມະການ ກົມການເມືອງ ສູນກາງພັກ ສໄມທີ 10 ແທນ.
3,ທ່ານ ດຣ. ຄຳພັນ ພົມມະທັດ, ອະດີດ ເຈົ້າແຂວງ ແຂວງ ເຊກອງ ແລະ ແຂວງ ອັດຕະປື ໄດ້ ຖືກຮັບເລືອກ ເປັນ ສະມາຊິກ ຄນະ ກັມມະການ ກົມການເມືອງ ໃໝ່, ແບບ ມ້າມືດ, ຖ້າມກາງ ທີ່ ນັກວິເຄາະ ການເມືອງ ໃນລາວ ຫຼາຍຄົນ ບໍ່ໄດ້ຄາດຄິດ ໄວ້ກ່ອນວ່າ ດຣ. ຄຳພັນ ພົມມະທັດ ຈະ ຖືກເລືອກເປັນ ກັມມະການ ກົມການເມືອງ ສູນກາງພັກ.
