ຣັຖບານລາວຂາຍ ສວັນ-ເວກັສ CASINO
ທາງການລາວ ຍັງບໍ່ເປີດເຜີຍ ເຣື່ອງ ການຂາຍ ໂຮງ ຄະຊີໂນ ແຫ່ງນີ້ເທື່ອ; ແຕ່ ບໍຣິສັດ Macau Legend Development ຊຶ່ງ ເປັນ ບໍຣິສັດ ການພະນັນ ຈາກເກາະ ມາກ້າວ ອອກຖແລງການ ເມື່ອວັນສຸກ ທີ່ຜ່ານມາ ວ່າ, ທາງບໍຣິສັດ ມາກ້າວ ຕົກລົງຊື້ ໂຮງ ຄະຊີໂນ ສວັນ-ເວກັສ ຈາກ ຣັຖບານລາວ ໃນຣາຄາ 42 ລ້ານ ໂດລາ ສະຫະຣັຖ.
ຕາມຂໍ້ຕົກລົງ ການຊື້ຂາຍ ບໍຣິສັດ ມາກ້າວ ຈະເປັນເຈົ້າຂອງ ໂຮງ ຄະຊີໂນ ຢູ່ລາວ ສາມແຫ່ງ ເປັນເວລາ 50 ປີ ແລະ ຕໍ່ອາຍຸ ໄດ້ອີກ 49 ປີ ຮວມເປັນ 99 ປີ. ໂຮງ ຄະຊີໂນ ທັງສາມ ແຫ່ງນັ້ນຄື; ຄະຊີໂນ ສວັນ-ເວກັສ ທີ່ ແຂວງ ສວັນນະເຂດ, ຄະຊີໂນ ແຂວງ ບໍຣິຄຳໄຊ ແລະ ຄະຊີໂນ ແຂວງຄຳມ່ວນ.
ໃນຂໍ້ຕົກລົງ ບົ່ງໄວ້ວ່າ ບໍຣິສັດ ມາກ້າວ ມີສິດຂຍາຍ ຄະຊີໂນ ສວັນ-ເວກັສ ແລະ ມີສິດສ້າງ ສນາມກອຟ ສອງແຫ່ງ ໂຮງແຮມ ໃຫຍ່ ອີກນຶ່ງຫຼັງ ເຮືອນວິລາ ແລະ ສະອາບນ້ຳ ໃນທີ່ດິນ ເຂດໃກ້ໆກັບໂຮງ ຄະຊີໂນ ນັ້ນນຳ.
ເມື່ອເດືອນທີ່ແລ້ວ ຣັຖບານລາວ ປະກາດ ປະມູນຂາຍ ຄະຊີໂນ ສວັນ-ເວກັສ ແລະ ປະກົດວ່າມີ ບໍຣິສັດ ຕ່າງປະເທດ ຫົກ ບໍຣິສັດ ຍື່ນປະມູນ ຊື້, ຮວມທັງ ບໍຣິສັດ Macau Legend.
ໃນປີ 2012 ຣັຖບານລາວ ຍຶດເອົາ ຄະຊີໂນ ສວັນ-ເວກັສ ຈາກ ບໍຣິສັດ Sanum ຊຶ່ງເປັນ ບໍຣິສັດ ຈາກ ມາກ້າວ ເຊັ່ນກັນ ໂດຍ ໃຫ້ເຫດຜົນ ວ່າ ບໍຣິສັດ Sanum ບໍຈ່າຍ ພາສີ ອາກອນ ເຖິງ 23 ລ້ານ ໂດລາ ໃຫ້ຣັຖບານ ລາວ.
ແຕ່ ບໍຣິສັດ Lao Holding ຈາກ ປະເທດ Netherlands ຊຶ່ງເປັນ ບໍຣິສັດແມ່ ຂອງ ບໍຣິສັດ Sanum ຖແລງວ່າ ທາງ ບໍຣິສັດ Sanum ບໍຍອມຈ່າຍ ພາສີ ອາກອນ ໃຫ້ ຣັຖບານລາວ ກໍເພາະວ່າ ຣັຖບານລາວ ເກັບ ພາສີ ອາກອນ ສູງເກີນເຫດ ຄືສູງເຖິງ 90 ສ່ວນຮ້ອຍ. ປັດຈຸບັນ ບໍຣິສັດ Lao Holding ກຳລັງຟ້ອງ ຣັຖບານລາວ ຄືນ ໃນຂໍ້ຫາ ຍຶດຊັພສິນ ຂອງບໍຣິສັດ ຢ່າງຜິດກົດໝາຍ.
ປັຈຈຸບັນ ເຈົ້າໜ້າທີ່ ທາງການລາວ ຫຼາຍພາກສ່ວນ ພວມເລັ່ງ ການສຶກສາ ອົບຮົມ ໃຫ້ ປະຊາຊົນ ໃນ ແຂວງ ໄຊສົມບຸນ ຢ່າງ ເອົາໃຈໃສ່ ເພື່ອໃຫ້ ປະຊາຊົນ ເຂົ້າໃຈເຖິງ ບົດບາດ ຂອງ ພັກ-ຣັຖ ແລະ ໃຫ້ຊາວບ້ານ ຣະມັດ ຣະວັງ ໂດຍເນັ້ນໃສ່ ປະຊາຊົນ ເຂດຫ່າງໄກ ສອກຫລີກ ເພາະ ຢ້ານວ່າ ພວກເຂົາເຈົ້າ ຈະຖືກ ກຸ່ມກໍ່ກວນ ວຸ້ນວາຍ ມາຍຸຍົງ ໃຫ້ເຂົ້າຮ່ວມ ຂະບວນ ນໍາກັນ. ດັ່ງ ເຈົ້າໜ້າທີ່ ກະຊວງ ປ້ອງກັນ ຄວາມສງົບ ທ່ານນຶ່ງກ່າວ ໃນວັນທີ່ 16 ພຶສພາ ນີ້ວ່າ:
“ປະຊາຊົນ ທີ່ ເຂົາເຈົ້າພາກັນ ສຶກສາອົບຮົມ ຈໍານວນ ຫຼວງຫຼາຍນັ້ນ ກໍພໍເຂົ້າຢູ່ ແຕ່ສໍາຄັນ ສໍາແມ່ນ ປະຊາຊົນ ຈໍານວນນຶ່ງ ທີ່ຢູ່ຫ່າງໄກ ຊອກຫລີກ ທາງການ ຕ້ອງໄດ້ ສົ່ງ ພະນັກງານ ເຖິງທີ່ ເພື່ອໃຫ້ການ ສຶກສາ ອົບຮົມ ບໍ່ ຢ່າງເຖິງຖອງ ເພາະ ກຸ່ມຄົນບໍ່ດີ ມັກຊັກຈູງ ພວກກຸ່ມນີ້ ຢູ່ແລ້ວ”.
ທ່ານກ່າວວ່າ ມາຮອດ ປັຈຈຸບັນນີ້ ປະຊາຊົນ ໃນແຂວງ ໄຊສົມບຸນ ໂດຍສະເພາະ ບັນດາເຜົ່າ ຍັງບໍ່ຮູ້ຈັກ ຣະບົບ ການເມືອງ ຂອງ ທາງການລາວ ໄດ້ດີພໍ ຫຼາຍຄົນ ຮອດ ບໍ່ຮູ້ວ່າ ແມ່ນໃຜ ເປັນປະທານ ປະເທດ ໃຜເປັນ ນາຍົກ ຣັຖມົນຕຣີ ເພາະ ພວກເຂົາ ບໍ່ເຄີຍ ຮັບຂ່າວສານ ໃດໆເລີຍ ຈາກທາງການ. ສະນັ້ນ ຖ້າບໍ່ ເອົາໃຈໃສ່ ໃນດ້ານນີ້ ພວກກໍ່ກວນ ອາດໃຊ້ ປະຊາຊົນ ເປັນເຄື່ອງ ກໍ່ເປັນໄດ້.
ທ່ານວ່າ ບໍ່ດົນມານີ້ ເຈົ້າໜ້າທີ່ ແຂວງ ໄຊສົມບຸນ ກໍຈັບກຸ່ມ ກໍ່ກວນໄດ້ 22 ຄົນ ຊຶ່ງເປັນຜູ້ ຕ້ອງສົງສັຍ ໃນຄະດີ ກໍ່ຄວາມບໍ່ສງົບ ແຕ່ຫລັງຈາກ ສຶບສວນ ສອບສວນ ແລ້ວ ກໍບໍ່ມີ ຫລັກຖານ ພຽງພໍ ກໍໃຫ້ການ ອົບຮົມ ແລ້ວກໍປ່ອຍໄປ ສໍາລັບຜູ້ ມີຄວາມຜິດ ແທ້ ກໍຖືກສົ່ງ ໄປດໍາເນີນ ຄະດີ ຕາມກົດໝາຍ.
