ມ.ອຸທຸມພອນເກັບເງິນ ວັນຊາດ ວັນກອງທັບ

ພະນັກງານ ຣັຖກອນເມືອງອຸທຸມພອນ ແຂວງສວັນນະເຂດ ບໍ່ພໍໃຈທີ່ທາງການເກັບເງິນເຂົາເຈົ້າຫລາຍເກີນໄປ ເພື່ອໄປສລອງວັນຊາດ ແລະ ວັນສ້າງຕັ້ງກອງທັບ ຍ້ອນວ່າ ສະເພາະສອງວັນດັ່ງກ່າວ ທາງການໄດ້ເກັບເງິນ ພະນັກງານທຸກຂແນງການ ແລ້ວຄົນລະ 1 ແສນກີບ ນອກຈາກນັ້ນຍັງຈະໄດ້ເກັບຄ່າໃຊ້ຈ່າຍອື່ນໆອີກ. ດັ່ງຄຳເວົ້າຂອງເຈົ້າໜ້າທີ່ ເມືອງອຸທຸມພອນ ກ່າວຕໍ່ວິທຍຸ ເອເຊັຍເສຣີ ໃນວັນທີ 5 ທັນວາ ວ່າ:

"ແຈ້ງການອອກມາເກັບນຳທະຫານ ພະນັກງານ ປະຊາຊົນ ຄືພວກນ້ອງເປັນພະນັກງານນີ້ ເສັຍສອງຕໍ່ສາມຕໍ່ເພິ່ນເກັບເອົາເງິນເດືອນ ອອກເດ້ ຕັດເອົາໂລດ ມີແຕ່ຕັດກັບຕັດ ນັບແຕ່ວັນສ້າງຕັ້ງວັນຊາດ ຮອດວັນກອງທັບ ວັນອີ່ຫຍັງ ອັນຢ່າເພິ່ນເກັບຫັ້ນ ຄືພວກນ້ອງ ພະນັກງານ ແຮງຜູ້ລະແສນພຸ້ນນະ ຄືຢູ່ບ້ານແນ່ເນາະມາເປັນພະນັກງານເກັບ 2 ຕໍ່ ຄືວ່າຢູ່ບ້ານເພິ່ນກໍເກັບ."

ທ່ານກ່າວຕື່ມວ່າ ພະນັກງານຂແນງການຖືກຫັກເງິນ ຈາກບັນຊີເງິນເດືອນໄປແລ້ວ ຄົນລະ 1 ແສນກີບ ແຕ່ຍັງຕ້ອງເສັຍເງິນໃຫ້ບ້ານອີກ 10 ພັນກີບ ພ້ອມທັງເສັຍເງິນຊື້ ພວງມະລາອີກ, ດັ່ງນັ້ນເຈົ້າໜ້າທີ່ຣັຖ ທ່ານນີ້ຈຶ່ງຮຽກຮ້ອງ ໃຫ້ພາກສ່ວນກ່ຽວຂ້ອງ ຊ່ອຍແກ້ໄຂບັນຫານີ້.

ນອກຈາກນີ້ ປະຊາຊົນ ເມືອງອຸທຸມພອນ ທີ່ຖືກຫັກເງິນຄົນລະ 10 ພັນກີບ ພວກເຂົາເຈົ້າຍັງຕັ້ງຄຳຖາມວ່າ ການສລອງວັນຊາດທີ່ຜ່ານມາ ທາງຂັ້ນເທິງມີແຕ່ດອກໄມ້ ແລະ ພວງມະລາໄປວາງທີ່ອານຸສອນສະຖານ ເປັນຫຍັງຈ່ງເກັບເງິນປະຊາຊົນ ໝົດເມືອງ.

"ແທນທີ່ເພິ່ນເຮັດບຸນເຮັດງານ ຈະໄປຊື້ຫຍັງ ເກັບນໍາທົ່ວເມືອງປະຊາຊົນນີ້ເດ້ນີ້ເດ້ ປະຊາຊົນກໍທຸກຍາກ ກໍເກັບເຮືອນລະ 10 ພັນກີບ ເກັບນຳປະຊາຊົນ ຊື້ແຕ່ດອກໄມ້ແຕ່ພວງມາລາ ໄປອັນອະນຸສອນສະຖານ ໄກສອນ ກັບອານຸສາວະລີ ຫັ້ນໄດ໋ ສິເຮັດຫຍັງອ້າຍເອີຍ ເຮັດແຕ່ແນວນັ້ນບາດເກັບປະຊາຊົນໝົດເມືອງ."

ຢ່າງໃດກໍຕາມ ຫລ້າສຸດ ມື້ວານນີ້ ປະຊາຊົນ ແລະ ພະນັກງານ ເມືອງ ປາກອູ ແຂວງຫລວງພຣະບາງ ກໍ່ໄດ້ຮ້ອງຮຽນໄປຍັງ ພາກສ່ວນ ທີ່ກ່ຽວຂ້ອງ ຈາກເຫດການເກັບເງິນກັບປະຊາຊົນ ແລະ ຕັດເງິນພະນັກງານຣັຖ 40 ພັນກີບ ເຖິງ 1 ແສນກີບ  ເພື່ອໄປສລອງວັນຊາດ ແລະ ວັນສ້າງຕັ້ງກອງທັບ. ໂດຍເນື້ອໃນຈົດໝາຍຮ້ອງຮຽນເນັ້ນຢໍ້າວ່າ ປະຊາຊົນຣາຍໄດ້ໜ້ອຍ ພະນັກງານຣັຖ ເງິນເດືອນບໍ່ຫລາຍ ຜູ້ປະກອບການກໍ່ເສັຍພັນທະອາກອນຕ່າງໆ ການເກັບເງິນໄປສລອງແບບນີ້ ແມ່ນເຫັນວ່າບໍ່ ເໝາະສົມ.