ຍ້ອນພະນັກງານຊຸກເຊື່ອງເອກະສານທີ່ດິນ​ການອອກໃບຕາດິນຈື່ງຊັກຊ້າ

ສ່ວນບັນຫາສຳນວນຕອນດິນເສຍ ແມ່ນຍ້ອນການເກັບມ້ຽນບໍ່ດີ ແລະ ໄດ້ກວດເຫັນຈຳນວນໜຶ່ງແລ້ວ. ການແກ້ໄຂບັນຫາຈະດີຂຶ້ນນັບແຕ່ເດືອນສິງຫານີ້ເປັນຕົ້ນໄປ ເພາະພວມມີການປັບປຸງກົງຈັກການຈັດຕັ້ງ ຮວມທັງຈະແກ້ໄຂອາສາສະໝັກ.

ກ່ຽວກັບບັນຫາຫາງສຽງສັງຄົມທີ່ວ່າ ຈ່າຍເງິນໄປແລ້ວຫຼາຍປີແຕ່ບໍ່ໄດ້ໃບຕາດິນ ຕໍ່ບັນຫານີ້ທ່ານ ບຸນທາມ ພຸດທະວົງສາ ຫົວໜ້າພະແນກຊັບພະຍາກອນທຳມະຊາດແລະ ສິ່ງແວດລ້ອມນະຄອນຫຼວງວຽງຈັນ ຍອມຮັບວ່າເປັນຄວາມຈິງ ຍ້ອນພະນັກງານຈຳນວນໜຶ່ງຂາດຄວາມຮັບຜິດຊອບມີການຊຸກເຊື່ອງເອກະສານທີ່ດິນໄວ້ ແລະ ເອົາເງິນປະຊາຊົນໄປໃຊ້ສ່ວນຕົວ.

ກອງປະຊຸມຄົ້ນຄວ້າປຶກສາຫາລືການແກ້ໄຂບັນຫາທີ່ດິນໃນນະຄອນຫຼວງວຽງຈັນ ໄດ້ຈັດຂຶ້ນໃນວັນທີ 2 ສິງຫາ 2019 ນີ້ ໂດຍການເຂົ້າຮ່ວມຂອງທ່ານ ສົມມາດ ພົລເສນາ ລັດຖະມົນຕີກະຊວງຊັບພະຍາກອນທຳມະຊາດແລະ ສິ່ງແວດລ້ອມ ແລະ ທ່ານ ອາດສະພັງທອງ ສີພັນດອນ ຮອງເຈົ້າຄອງນະຄອນຫຼວງວຽງຈັນ.