ອົງການຈັດຕັ້ງພາກປະຊາສັງຄົມ ຮຽກຮ້ອງໃຫ້ບັນດາ ຜູ້ນຳປະເທສອາຊຽນ ປະຕິບັດກົດໝາຍຕ່າງໆ ຕາມຫຼັກສິທທິມະນຸສ, ເຄົາຣົພສິທທິ ເສຣີພາບ ແລະ ຊີວິຕການເປັນຢູ່ ຂອງປະຊາຊົນຢ່າງເຕັມສ່ວນ. ໃນ ຣະຫວ່າງກອງປະຊຸມ ພາກປະຊາສັງຄົມ ອາຊຽນ ຫຼື ASEAN Civil Society Conference ແລະ ASEAN People Forum 2019 ທີ່ສະມາຄົມອົງກອນ ພາກເອກກະຊົນຂອງໄທ ເປັນເຈົ້າພາບ ຈັດຂຶ້ນ ຢູ່ ມະຫາວິທຍາລັຍ ທັມມະສາຕ ເຂດຣັງສິດ ນະຄອນຫຼວງບາງກອກ ປະເທສໄທ ເມື່ອວັນທີ 10-12 ກັນຍາ ນີ້. ໃນເວທີດັ່ງກ່າວ.
ມາດາມ ອຶ້ງ ຊຸ່ຍ-ເມັ້ງ ເອງ, ໂຕແທນຈາກກຸ່ມບຸກຄົນ ທີ່ຖືກບັງຄັບ ໃຫ້ຫາຍສາບ ສູນ ໄດ້ກ່າວໃນກອງປະຊຸມ ຕອນນຶ່ງວ່າ:
“ພວກເຮົາຢູ່ໃນອາຊຽນ ຕ້ອງການສິ່ງດຽວກັນ. ບໍ່ວ່າພວກເຮົາຈະເປັນປະຊາຊົນ ທີ່ມີຖານະ ສູງຫຼືຕ່ຳ ບໍ່ວ່າພວກເຮົາຈະເປັນ ຜູ້ນຳ ຫຼືນັກ ການເມືອງ ຫຼືເປັນພຽງຊາວບ້ານ ທັມມະດາ, ພວກເຮົາຕ້ອງການ ສັນຕິພາບ, ຄວາມປອດພັຍ. ພວກເຮົາຕ້ອງການ ການດຳຣົງຊີວິຕ ດ້ວຍໂຕເອງ. ພວກເຮົາຕ້ອງການ ເບິ່ງແຍງຄອບຄົວ ພວກເຮົາດ້ວຍໂຕເອງ ເພື່ອໃຫ້ມີໂອກາດ ຢ່າງເທົ່າທຽມກັນ ແລະ ເພື່ອຊີວິຕ ການເປັນຢູ່ ທີ່ດີ ສຳລັບພວກເຮົາເອງ.”
ຍານາງ ປະຣິນ ເຊດ, ໂຕແທນຂອງອົງການຈັດຕັ້ງ ພາກປະຊາສັງຄົມ ຈາກປະເທສຟິລິບປິນ ກໍໄດ້ຮຽກຮ້ອງ ໃຫ້ແຕ່ລະປະເທສເນັ້ນໃສ່ ຄວາມສເມີພາບ ຂອງພົລເມືອງ ແລະ ການເປັນຢູ່ທີ່ດີ ຂອງພວກເຂົາ.
“ພວກເຮົາຕ້ອງການ ສະຖານະພາບດ້ານການເມືອງ ຂອງພົລເມືອງ ທີ່ຕັ້ງຢູ່ເທິງພື້ນຖານ ຄວາມສເມີພາບ, ສິທໃນການປາກເວົ້າ ຢ່າງ ເທົ່າທຽມກັນ ຂອງທຸກຄົນ.”
ນອກຈາກນີ້, ກອງປະຊຸມດັ່ງກ່າວຍັງມີເຈົ້າໜ້າທີ່ ເຄືອຂ່າຍພາກປະຊາສັງຄົມ ຈາກລາວຈຳນວນ 15 ອົງກອນ, ເຊິ່ງໂຕແທນຈາກລາວ ທີ່ເຂົ້າມາຮ່ວມງານນັ້ນ ກໍໄດ້ໃຫ້ສັມພາດ ແກ່ຜູ້ສື່ຂ່າວ ວິທຍຸເອເຊັຽ ເສຣີ ໃນວັນທີ 11 ກັນຍາ ນີ້ວ່າ ປະຈຸບັນ ອົງການຈັດຕັ້ງ ພາກ ປະຊາສັງຄົມ ໃນລາວ ໄດ້ຮັບການສນັບສນູນ ຈາກ ພາກຣັຖບານຢ່າງເຕັມທີ່ ທັງເຣື້ອງການອຳນວຍ ຄວາມສະດວກ ດ້ານວິຊາການ ແລະດ້ານອື່ນໆ ເພື່ອຮ່ວມກັນກັບ ພາກຣັຖ ພັທນາປະເທສ.
“ສນັບສນູນເປັນຢ່າງດີເຈົ້າ. ຣັຖບານຄືເພິ່ນຈະອຳນວຍ ຄວາມສະດວກໃຫ້ທຸກຢ່າງ ໃນຕາມແນວທາງຂອງ ຣັຖບານເຈົ້າ. ບໍ່ວ່າຈະເປັນ ການຊຸກຍູ້ ຄືໂຕຢ່າງ ວິຊາການ ຈາກອົງກອນ ຈະໄປໃຫ້ skill ເນາະ ຫຼື ທັກສະເຈົ້າ. ຈະໄປພັທນາເຣື້ອງທັກສະ ສີມືຕ່າງໆເຈົ້າ.”
ເຈົ້າໜ້າທີ່ໂຕແທນ ອົງການຈັດຕັ້ງພາກປະຊາສັງຄົມລາວ ອີກທ່ານນຶ່ງ ກໍໃຫ້ສັມພາດ ໃນທຳນອງດຽວກັນວ່າ ພາກຣັຖ ກໍໄດ້ໃຫ້ການ ສນັບສນູນ ທີ່ດີແກ່ພວກຕົນຕລອດມາ.
“ຣັຖບານເພິ່ນກະໄດ້ສນັບສູນ ກ່ຽວກັບເຣື້ອງນີ້ວ່າ ຕ້ອງເຮັດແນວໃດ ເພື່ອສ້າງໃຫ້ສະມາຄົມ ເພື່ອສ້າງໃຫ້ຊຸມຊົນ ມີຄວາມເຂັ້ມແຂງ. ຄັນຊັ້ນ, ນີ້ກະເປັນທ່າແຮງ ອັນນຶ່ງ ລະກະເປັນບ່ອນນຶ່ງ ທີ່ພວກເຮົາໄວ້ໃຈ ລະກະມາຮຽນຮູ້ ເອົາບົດຮຽນ ເພື່ອພັທນາ ຮ່ວມກັບທາງ ພັກ-ຣັຖ ໄທເຮົາເນາະ.”
ກອງປະຊຸມອົງການຈັດຕັ້ງພາກປະຊາສັງຄົມອາຊຽນ 2019 ນີ້, ມີອົງການຈັດຕັ້ງພາກປະຊາສັງຄົມ ຈາກ ແຕ່ລະປະເທສ ເຂົ້າຮ່ວມຫຼາຍ ກວ່າ 70 ອົງກອນ ແລະ ມີການນຳຜລິຕພັນ ຈາກ ແຕ່ລະອົງກອນ ທີ່ເປັນເອຄລັກສນະ ເພາະມາຈັດວາງສະແດງ ພາຍໃນງານນຳດ້ວຍ, ເຊິ່ງກໍໄດ້ຮັບຄວາມສົນໃຈ ຈາກຜູ້ເຂົ້າຮ່ວມ ຢ່າງໜາແໜ້ນ.
ສະພາແຫ່ງຊາດ ສປປ ລາວ ຫລັງໃໝ່ ທີ່ກໍາລັງຢູ່ໃນການກໍ່ສ້າງ ຊຶ່ງຣັຖບານລາວ ໄດ້ຮັບການຊ່ອຍເຫຼືອ ຈາກ ສສ ວຽດນາມ
ອົງການນິຣະໂທສກັມສາກົນ ຣາຍງານວ່າປະເທສລາວ ຍັງບໍ່ມີການນັບຖື ສິທທິມະນຸສ ການນັບຖືສິທທິມະນຸສ ຢູ່ລາວ ຍັງອ່ອນແອ ທາງ ດ້ານກົດໝາຍ ແລະ ທາງດ້ານການປະຕິບັດໂຕຈິງ. ຜ່ານມາ, ເຈົ້າໜ້າທີ່ທາງການລາວ ກໍໄດ້ປະຕິຮູບກົດໝາຍບາງຢ່າງ ລວມທັງກົດໝາຍ ອາຍາ, ແຕ່ກໍຍັງບໍ່ປະຕິບັດ ຕາມກົດໝາຍເຫຼົ່ານັ້ນ ເລີຍ.
ນັ້ນແມ່ນເນື້ອໃນຂອງບົດຣາຍງານ ຂອງອົງການນິຣະໂທສກັມສາກົນ ຫຼື Amnesty International ທີ່ໄດ້ສົ່ງໄປຫາ ອົງການ ສະຫະ ປະຊາຊາຕ ໃນວັນທີ່ 11 ເດືອນກັນຍາ ປີ 2019 ນີ້, ກ່ອນອົງການ ສະຫະປະຊາຊາຕ ຈະທົບທວນຄືນ ການນັບຖືສິທທິມະນຸສຢູ່ລາວ ໃນເດືອນມົກກະຣາ ປີໜ້າ.
ບົດຣາຍງານນັ້ນແຈ້ງອີກວ່າ ນັບແຕ່ກອງປະຊຸມທົບທວນຄືນ ການນັບຖືສິທທິມະນຸສ ຢູ່ລາວ ເມື່ອປີ 2015 ເປັນຕົ້ນມາ, ຣັຖບານລາວ ຍັງຈຳກັດສິທເສຣີພາບ ໃນການປາກເວົ້າ, ອອກຂ່າວ, ໂຮມຊຸມນຸມ, ຍັງກັກຂັງ ແລະ ທໍຣະມານປະຊາຊົນລາວ ທີ່ຕຳນິຕິຕຽນຣັຖບານ. ບໍ່ເທົ່ານັ້ນ, ຣັຖບານລາວ ຍັງບັງຄັບຫາຍສາບສູນ ຄົນລາວຫຼາຍຄົນ.
ກົດໝາຍກໍອະນຸຍາດ ໃຫ້ຣັຖບານລ່ວງລໍ້າສິທທິ ຂອງປະຊາຊົນ; ຕຳຣວດກໍຈັບແລະກັກຂັງປະຊາຊົນ ໂດຍທີ່ອ້າງວ່າພວກເຂົາມີເຈຕະນາ ໂຄ່ນລົ້ມຣັຖບານ ແລະ ຣັຖບານຈັບກຸມພວກນີ້ ກໍເພື່ອຄວາມ ໝັ້ນຄົງຂອງຊາຕ.
ນອກຈາກນັ້ນ, ດຳຣັຖວ່າດ້ວຍສະມາຄົມ ທີ່ປະກາດໃຊ້ໃນວັນທີ່ 15 ເດືອນພຶສຈິກາ ປີ 2017 ນັ້ນ, ກໍໃຫ້ສິທ ແລະ ອຳນາດແກ່ຣັຖບານ ສາມາດຄວບຄຸມການຈັດຕັ້ງ ແລະ ການດຳເນີນງານ ຂອງສະມາຄົມ ແລະ ອົງການຕ່າງໆ ໃນປະເທສລາວ. ຣັຖບານມີສິທ ຕິດຕາມ ການເຄື່ອນໄຫວ ທັງທາງດ້ານການເງິນ ແລະ ວຽກງານ ຂອງສະມາຄົມ ແລະ ອົງການຢ່າງໃກ້ຊິດ. ມີສິທປະຕິບັດວິນັຍ ແລະ ລົງໂທສ ອົງການ ທີ່ບໍ່ປະຕິບັດຕາມດຳຣັຖດັ່ງກ່າວ.
ອີກດຳຣັຖນຶ່ງ ດຳຣັຖ 327 ກໍໃຫ້ສິທແກ່ຣັຖບານ ມີສິທປັບໃໝ, ລົງໂທສ ແລະ ສຶກສາອົບຮົມ ປະຊາຊົນລາວ ຜູ້ໃຊ້ອິນເຕີແນັຕ, ຜູ້ລົງ ຂ່າວ, ຮູບ, ວີດີໂອ ແລະ ອອກຄວາມຄິດຄວາມເຫັນໃນສື່ສັງຄົມອອນລາຍ ແລະ ອື່ນໆ.
ກົດໝາຍອາຍາມາດຕຣາ 65 ກໍບົ່ງໄວ້ວ່າ ຜູ້ໂຄສະນາ ຕໍ່ຕ້ານສາທາຣະນະຣັຖ ປະຊາທິປະໄຕ ປະຊາຊົນລາວ ຈະຖືກປັບໃໝ ໃນຣະຫວ່າງ 5 ແສນກີບ ແລະ 10 ລ້ານກີບ ແລະ ຈະຖືກລົງໂທສ ຈຳຄຸກ ໃນຣະຫວ່າງນຶ່ງປີ ເຖິງ 5 ປີ.
ໃນດ້ານການບັງຄັບຫາຍສາບສູນ, ອົງການນິຣະໂທສກັມສາກົນ ກໍຣາຍງານວ່າ ຣັຖບານຮັບປາກວ່າ ຈະສືບສວນສອບສວນ ການ ຫາຍສາບສູນຂອງ ທ່ານ ສົມບັດ ສົມພອນ ແລະ ກໍຣະນີຫາຍສາບສູນອື່ນໆ, ແຕ່ໃນສະພາບຄວາມເປັນຈິງ ການສືບສວນນັ້ນ ບໍ່ມີຄວາມກ້າວໜ້າເລີຍ.
ວິທຍຸເອເຊັຽເສຣີ ພວກເຮົາ ໄດ້ອີເມລ ແລະ ໂທຣະສັບ ຫາສຳນັກງານໃຫຍ່ ຂອງອົງການນິຣະໂທສກັມສາກົນ ຢູ່ນະຄອນຫຼວງ ລອນດອນ, ປະເທສອັງກິດ ໃນວັນທີ່ 11 ກັນຍາ 2019 ນີ້ວ່າ ອົງການນິຣະໂທສກັມສາກົນ ຮູ້ກ່ຽວກັບການ ຫາຍໂຕໄປ ຂອງ ທ້າວ ອ໊ອຕ ໄຊຍະວົງ, ຄົນງານລາວຢູ່ບາງກອກ, ປະເທສໄທບໍ່? ເຈົ້າໜ້າທີ່ສຳນັກງານໃຫຍ່ ຕອບວ່າ ບັນຫານີ້ ແລະບັນຫາອື່ນໆ ກ່ຽວກັບ ປະເທສລາວ ໃຫ້ ພວກເຮົາຕິດຕໍ່ ໄປຫາເຈົ້າໜ້າທີ່ ຂອງອົງການນິຣະໂທສກັມສາກົນ ຢູ່ບາງກອກ.
