ທ້າວ ເພັດພູທອນ ພິລາຈັນ ຄົນງານລາວ ທີ່ ເຮັດວຽກຢູ່ໄທ ແລະ ເຄີຍຮຽກຮ້ອງ ເພື່ອ ສິດທິມະນຸດ ໄດ້ຫາຍສາບສູນ ຢູ່ລາວ ຫລັງຈາກ ເດີນທາງໄປ ແຂວງໜອງຄາຍ ປະເທດໄທແລ້ວຂ້າມໄປ ນະຄອນຫລວງວຽງຈັນ ເພື່ອເຮັດວຽກສ່ວນຕົວ ເມື່ອເດືອນ ພຶສຈິກາ ຜ່ານມານີ້ ມີການສົງໃສກັນວ່າ ຜູ້ກ່ຽວ ອາດຖືກເຮັດໃຫ້ສູນຫາຍໄປແລ້ວ, ອີງຕາມຄໍາເວົ້າຂອງໝູ່ ທ້າວ ເພັດພູທອນ ຕໍ່ RFA ໃນມື້ວັນທີ 9 ທັນວາ ນີ້:
“ຕິດຕໍ່ຄັ້ງສຸດທ້າຍ ວັນທີ 14 ພຶສຈິກາ ລາວບອກວ່າໃຫ້ກັບ ເມືອງກຸງເທບ ກ່ອນເລີຍເອົາເສື້ອຜ້າໃນຫ້ອງພັກຢູ່ໜອງຄາຍຫັ້ນນະ ໄປພັກ ໜອງຄາຍ ນໍາກັນ ລາວສິກັບໄປທາງມຸກດາຫານ ສິຂ້າມໄປທາງມຸກດາຫານ ບໍ່ໄດ້ຂ້າມມາທາງໜອງຄາຍ ເພິ່ນສິ ຂ້າມເມືອຫາພໍ່ ຢູ່ ແຂວງຄໍາມ່ວນ ພີ່ນ້ອງສິໄປສົ່ງວ່າຊັ້ນ.”
ຜູ້ເປັນໝູ່ຂອງ ທ້າວ ເພັດພູທອນ ເວົ້າຕື່ມວ່າຕາມປົກກະຕິແລ້ວ ທ້າວ ເພັດພູທອນ ບໍ່ແມ່ນຄົນຕິດຕໍ່ຍາກ ຕິດຕໍ່ກັນກັບໝູ່ຄູ່ ຢູ່ຕລອດ ບໍ່ແມ່ນຈະມິດງຽບໄປຊື່ໆ ໂດຍບໍ່ບອກໃຜ, ດັ່ງນັ້ນ ຈຶ່ງເຊື່ອວ່າຜູ້ກ່ຽວອາດຖືກລັກພາຕົວ ຄືກັນກັບກໍຣະນີ ທ້າວ ອັອດ ໄຊຍະວົງ:
“ຂ້າພະເຈົ້າຄຶດວ່າບໍ່ກັບມາແລ້ວແຫຼະ ປົກກະຕິ ລາວຕ້ອງກັບມາ ລາວບໍ່ເປັນຄົນຈັ່ງຊີ້ ລາວບໍ່ເປັນຄົນຫາຍໄປ ສົງສັຍຈັ່ງຊີ້ບໍ່ໄດ້ ມັນຈະ ເປັນເຄສເໝືອນ ອັອດສະກ້າ (ອັອດ ໄຊຍະວົງ) ໄປແລ້ວເນາະ ວ່າສິກັບມານໍາກັນ ຂ້າພະເຈົ້າວ່ານ່າຈະຖືກອູ້ມ ຫາຍໂຕໄປແລ້ວ.”
ພ້ອມດຽວກັນນີ້ ຄົນງານລາວ ທີ່ເຮັດວຽກ ຢູ່ໄທ ອີກຜູ້ນຶ່ງ ຊຶ່ງເປັນເຄືອຂ່າຍດຽວກັນກັບ ທ້າວ ເພັດພູທອນ ເວົ້າຕໍ່ RFA ວ່າ, ທ້າວ ເພັດພູທອນ ມີຖານະຖືກຄຸ້ມຄອງ ໂດຍອົງການ ສະຫະປະຊາຊາດ ຊຶ່ງຕົນ ແລະເຈົ້າໜ້າທີ່ ສະຫະປະຊາຊາດ ກໍໄດ້ເຕືອນ ຜູ້ກ່ຽວແລ້ວ ຫລາຍເທື່ອ ບໍ່ໃຫ້ຂ້າມໄປລາວ ຢ່າງເດັດຂາດ ຍ້ອນບໍ່ປອດພັຍ:
“ເພິ່ນສິເມືອວຽງຈັນເນາະ ໄປຢູ່ໜອງຄາຍແລ້ວວັນທີ 13 ເພິ່ນຂ້າມເມືອ ວຽງຈັນ ຕິດຕໍ່ບໍ່ໄດ້ເລີຍບາດນີ້ ທາງ UN ຄຸ້ມຄອງຢູ່ຕອນນີ້ ຫັ້ນແຫລະ ເຂົາບໍ່ໃຫ້ໄປລາວ ບໍ່ໃຫ້ໄປເຮັດແນວສຸ່ມສ່ຽງວ່າຊັ້ນຊະ ຂ້ອຍຫ້າມກະບໍ່ຟັງ ຫ້າມວ່າຢ່າໄປຢ່າໄປ ກະບໍ່ຟັງ.”
ກ່ຽວກັບເຣື່ອງນີ້ RFA ໄດ້ຕິດຕໍ່ຫາຫ້ອງການຕໍາຣວດກວດຄົນເຂົ້າເມືອງຂອງລາວ ປະຈໍາດ່ານຂົວມິຕພາບ ລາວ-ໄທ, ວຽງຈັນ-ໜອງຄາຍ ເພື່ອຂໍຮູ້ຂໍ້ມູນເພີ່ມຕື່ມ ແຕ່ເຈົ້າໜ້າທີ່ບອກພຽງສັ້ນໆ ວ່າບໍ່ຮູ້ຈັກ ແລະ ບໍ່ເຫັນຜູ້ກ່ຽວ.
ທ້າວ ເພັດພູທອນ ເປັນນຶ່ງໃນຈໍານວນ ຄົນງານລາວ ທີ່ເຄີຍໄປຮຽກຮ້ອງ ເພື່ອ ສິດທິມະນຸດ ແລະ ປະຊາທິປະໄຕ ໃນລາວ ຢູ່ຕໍ່ໜ້າ ສະຖານທູດລາວ ຢູ່ບາງກອກ. ຜູ້ກ່ຽວເປັນເຄືອຂ່າຍດຽວກັນກັບ ທ້າວ ອັອດ ໄຊຍະວົງ ຄົນງານລາວໃນໄທ ທີ່ຫາຍສາບສູນ ໄປກ່ອນໜ້ານີ້ ແລະຍັງເປັນກຸ່ມດຽວກັນກັບ ຄົນງານລາວ 3 ຄົນ ທີ່ຖືກຕັດສິນຈໍາຄຸກ ຢູ່ລາວ ຄື ທ້າວ ສົມພອນ ພິມມະສອນ, ທ້າວ ສຸກັນ ໃຈທັດ ແລະ ນາງຫລອດຄໍາ ທັມມະວົງ ທີ່ຖືກຈັບໃນຂໍ້ຫາ ໃສ່ຮ້າຍປ້າຍສີ ພັກຣັດ.
ຄວາມຄືບໜ້າຫລ້າສຸດ, ໝູ່ໃກ້ຊິດ ທ້າວ ເພັດພູທອນ ໄດ້ກ່າວຕໍ່ ເອເຊັຽເສຣີ ວ່າ:“ຄອບຄົວຂອງ ທ້າວ ເພັດພູທອນ ຫ້າມຄົນອື່ນ ໄປຫຍຸ້ງກ່ຽວກັບເຣື່ອງ ຂອງລາວ ເພາະວ່າ ມັນເປັນເຣື່ອງຂອງຜູ່ໃຫຍ່ ແລະເປັນ ເຣື່ອງຮ້າຍແຮງ.”
ໝູ່ຂອງລາວ ເວົ້າຕື່ມອີກວ່າ:“ຂ້ອຍ ຂ້ອນຂ້າງແນ່ໃຈວ່າ ທ້າວ ເພັດພູທອນ ຈະຖືກເຈົ້າໜ້າທີ່ ທາງການລາວ ຈັບຕົວໄປແລ້ວ.”
ເສຍໃຈນຳ
