ລາວໂຮມລາວ ເພື່ອປະຊາທິປະໄຕ

ໂອກາດນີ້ ທ່ານ ສັນຕິພາບ ພົມວິຫານ ໄດ້ມີຄຳເຫັນຕໍ່ກອງປະຊຸມ ໄດ້ເນັ້ນບາງບັນຫາສຳຄັນວ່າ: ກອງປະຊຸມສຳມະນາວິທະຍາສາດດັ່ງກ່າວ ແມ່ນມີຄວາມໝາຍສຳຄັນທີ່ສຸດ ໃນວຽກງານຂະແໜງການເງິນ ຊຶ່ງປັດຈຸບັນ, ສະພາບເສດຖະກິດ ຂອງ ສປປ ລາວ ເຫັນວ່າຍັງຢູ່ໄລຍະທີ່ມີຄວາມຫຍຸ້ງຍາກ ແລະ ທ້າທາຍຫຼາຍດ້ານ; ເສດຖະກິດຂະຫຍາຍຕົວ ໃນລະດັບ 4%, ອັດຕາເງິນເຟີ້ຍັງຢູ່ໃນລະດັບສູງ (24.8%), ເງິນກີບອ່ອນຄ່າ ຄຽງຄູ່ກັບລາຄາສິນຄ້າປັບຕົວຂຶ້ນ, ເຊິ່ງເປັນສິ່ງທ້າທາຍຕໍ່ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແຫ່ງຊາດ ແລະ ແຜນງົບປະມານແຫ່ງລັດ, ເຊິ່ງເປັນບັນຫາທ້າທາຍເຮັດໃຫ້ໂຄງສ້າງເສດຖະກິດມະຫາພາກຂາດຄວາມສົມດຸນ, ງົບປະມານ ແລະ ເງິນຕາຕ່າງປະເທດ ມີຈໍາກັດ, ພັນທະຊຳລະໜີ້ສິນຕ່າງປະເທດມີຫຼາຍ ແລະ ການຜະລິດສະໜອງພາຍໃນ, ການສົ່ງອອກສິນຄ້າໄປຕ່າງປະເທດ ກໍຍັງບໍ່ທັນແຂງແຮງ.

ລັດຖະບານ ສປປ ລາວ ໄດ້ມີຫຼາຍມາດຕະການແກ້ໄຂ, ໃນນັ້ນ ມາດຕະການທາງດ້ານການເງິນ ແມ່ນສືບຕໍ່ຂຸດຄົ້ນທ່າແຮງບົ່ມຊ້ອນ ເພື່ອຂະຫຍາຍຖານລາຍຮັບໃຫ້ເພີ່ມຂຶ້ນ, ຄຸ້ມຄອງການຈັດຕັ້ງປະຕິບັດງົບປະມານແຫ່ງລັດ ເປັນທັນສະໄໝ ໃຫ້ມີປະສິດທິພາບ ແລະ ປະສິດທິຜົນ, ຍົກສູງບົດບາດຄວາມເປັນເຈົ້າການ ລວມສູນການຄຸ້ມຄອງງົບປະມານແຫ່ງລັດ. ສ່ວນມາດຕະການທາງດ້ານເງິນຕາ ແມ່ນສືບຕໍ່ດຳເນີນປະຕິບັດນະໂຍບາຍເງິນຕາແບບຮັດກຸມ ເພື່ອຄຸ້ມຄອງອັດຕາແລກປ່ຽນໃຫ້ມີສະຖຽນລະພາບ ເພື່ອຫຼຸດອັດຕາເງິນເຟີ້ໃນປີ 2024.

ກອງປະຊຸມສຳຄັນນີ້ ບັນດາທ່ານ ແມ່ນໄດ້ພ້ອມກັນແລກປ່ຽນ ບົດຮຽນປະສົບການຊຶ່ງກັນ ແລະ ກັນ ໃນບາງບັນຫາສຳຄັນຄື: ການຄຸ້ມຄອງເສດຖະກິດມະຫາພາກ ຂອງ ສປປ ລາວ; ບົດຮຽນ ກ່ຽວກັບນະໂຍບາຍດ້ານການເງິນຕໍ່ການສົ່ງເສີມການລົງທຶນພາຍໃນ ແລະ ຕ່າງປະເທດ; ບົດຮຽນ ກ່ຽວກັບຍຸດທະສາດການແກ້ໄຂໜີ້ສິນສາທາລະນະ; ການແບ່ງຂັ້ນຄຸ້ມຄອງງົບປະມານ ລະຫວ່າງ ສູນກາງ ແລະ ທ້ອງຖິ່ນ; ການສ້າງຄວາມເຂັ້ມແຂງ ໃນການປະຕິຮູບລັດວິສາຫະກິດ; ການພັດທະນາຫັນເປັນທັນສະໄໝ ແລະ ອື່ນໆ.

ທ່ານ ວິເລດ ກິນນະວົງ ວ່າການແທນຫົວໜ້າກົມນະໂຍບາຍການເງິນ ແລະ ທ່ານ ນາງ ຮວາງ ຊຽວ ຫຼິງ ໄດ້ຜັດປ່ຽນກັນຂຶ້ນ ສະເໜີ ສະພາບເສດຖະກິດມະຫາພາກ ຂອງປະເທດຕົນ ໂດຍໄດ້ຍົກໃຫ້ເຫັນ ຈຸດພິເສດຂອງການຂະຫຍາຍຕົວຂອງປະເທດ ໃນແຕ່ລະໄລຍະ ພ້ອມທັງຄາດຄະເນ ແຜນງົບປະມານ ການເງິນໃນຕໍ່ໜ້າ.