ຜ່ານຂະບວນວິວັດຫຼາຍຍຸກຫຼາຍສະໄໝ ຢູ່ໃນບົນດິນແດນລ້ານຊ້າງອັນແສນຮັກ ແລະ ຫວງແຫນນັ້ນ ມັນໄດ້ກຳເນີດເກີດມີວິລະບູລຸດ ຜູ້ປີຊາສາມາດອົງອາດກ້າຫານ ເພື່ອປົກປ້ອງປິຕຸພູມຂອງຕົນເອົາໄວ້ ໂດຍບໍ່ໃຫ້ຊາດໃດໆເຂົ້າມາຄຸ້ມຄອງ ແລະ ຍາດແຍ່ງເອົາໄປຕາມໃຈມັກ ເມື່ອຢ້ອນເຖິງສະໄໝຈັກກະພັດຝຣັ່ງ ແລະ ອາເມລິກາ ເຂົ້າມາຮຸກຮານເມືອງລາວ ພວກເຂົາກໍຫວັງຢາກເອົາເປັນຫົວເມືອງຂຶ້ນ ຫຼື ກືນກິນປະເທດເຮົາຢ່າງງ່າຍດາຍ ພວກເຂົາໄດ້ໃຊ້ກົນອຸບາຍຫຼາຍລ່ຽມ ຮ້ອຍແປດພັນປະການ ເພື່ອທຳສົງຄາມກັບອິນດູຈີນ ເວົ້າລວມ ເວົ້າສະເພາະແມ່ນ ຢູ່ໃນປະເທດລາວຂອງພວກເຮົາ ຕັ້ງເປັນຫຼາຍສິບປີ ແຕ່ກໍບໍ່ໄດ້ຕາມຈຸດປະສົງຂອງພວກມັນ ສຸດທ້າຍກໍຖືກປະລາໄຊ ຢ່າງອັບອາຍຂາຍໜ້າ.
ຕໍ່ໜ້າເຫດຜົນເງື່ອນໄຂທີ່ໄດ້ຮັບໄຊຊະນະມາຂ້າງເທິງນັ້ນ ມັນຍ້ອນໃຜ ກໍຍ້ອນແຕ່ແມ່ນຜູ້ນຳເຮົາທັງນັ້ນ ທີ່ໄດ້ມີບົດບາດການນຳພາທີ່ມີຄວາມປີຊາສາມາດ ແລະ ສະຫຼາດສ່ອງໃສ ດ້ານສະຕິປັນຍາ ເພື່ອເຕົ້າໂຮມເອົາທຸກຊັ້ນຄົນ ໃຫ້ເປັນຈິດໜຶ່ງໃຈດຽວ ພ້ອມກັນຕໍ່ສູ້ ແລະ ກູ້ເອົາອິດສະຫຼະພາບມາໃຫ້ປະເທດຊາດຂອງຕົນ ພັກປະຊາຊົນ ປະຕິວັດລາວ ບໍ່ໄດ້ຢູ່ໂດດດ່ຽວ ຊຶ່ງເວລາໃດກໍໄດ້ຢູ່ຄຽງບ່າຄຽງໄຫຼ່ກັບມະຫາຊົນ ຫຼື ພໍ່ແມ່ປະຊາຊົນບັນດາເຜົ່າ ເພື່ອຊອກເອົາຄວາມຢູ່ດີກິນດີມາສູ່ປະຊາຊົນ ກໍຄືປະເທດຊາດຂອງຕົນຢູ່ສະເໝີ.
ສິ່ງສຳຄັນໄປກ່ວານັ້ນແມ່ນພັກ ແລະ ຜູ້ນຳເຮົາ ໄດ້ຢືນຢັນດ້ານຫຼັກໝັ້ນຊົນຊັ້ນ ແລະ ມີສະຕິຊາດສູງ ຍອມສະຫຼະສິດສ່ວນຕົວເພື່ອປະເທດຊາດ ຜູ້ນຳເຮົາບໍ່ເຄີຍມີແນວຄິດສໍ້ຫຼວງບັງລາດ ຫຼື ສໍ້ລາດບັງຫຼວງ ຊຶ່ງເວລາໃດກໍຮ້ອງຄຳຂວັນທີ່ວ່າ: ພັກປະຊາຊົນປະຕິວັດລາວ ແມ່ນກຳເນີດມາຈາກປະຊາຊົນ ແລະ ເຮັດວຽກງານຮັບໃຊ້ປະຊາຊົນ ທຸກສິ່ງຢ່າງກໍມີແຕ່ຫວັງ ຢາກໃຫ້ປະເທດຊາດ ມີຄວາມຈະເລີນຜາສຸກທັງນັ້ນ.
ດັ່ງນັ້ນ ພວກເຮົາເປັນຄົນຍຸກສະໄໝ ຕ້ອງຮ່ຳຮຽນເອົານ້ຳໃຈອັນແສນປະເສີດ ແນວຄິດທີ່ຜ່ອງໃສ ແລະ ການກະທຳອັນດີງາມຂອງຜູ້ນຳເຮົາໄວ້ຈົນຊົ່ວໃດໆ ແລະ ພວກເຮົາຕ້ອງຈົດຈຳບຸນຄຸນຂອງບັນດາທ່ານຜູ້ນຳ ວິລະບູລຸດຜູ້ກ້າແກ່ນ ໄວ້ໃນດວງໃຈຂອງເຮົາຕະຫຼອດການ.
ເຈົ້າຈົດຈຳເອົາສາ ພໍ່ອາວ
ຂອ້ຍບໍ່ເອົານຳເຈົ້າແລ້ວຜູ້ນຳໂກງຊາດ
