ລາວໂຮມລາວ ເພື່ອປະຊາທິປະໄຕ

laos.usembassy.gov

ຍານາງ Karen B. Stewart ເອກອັຄຣາຊທູດ ສະຫະຣັດ ປະຈໍາລາວ ໄປຮ່ວມ ເປີດພິທີ ໃຊ້ເສັ້ນທາງ ຍາວ 32KM ທີ່ເມືອງຄວາ ແຂວງ ຜົ້ງສາລີ

ສະຖານທູດ ສະຫະຣັຖ ໃຫ້ເງິນ ຊ່ວຍເຫລືອ ຈຳນວນ 235,000 ດອນລ່າ ເພື່ອສ້າງ ຖນົນ ທີ່ມີ ຄວາມຍາວ 18 ກິໂລແມັດ ຊຶ່ງເປັນ ຖນົນສ່ວນນຶ່ງ ທີ່ເຊື່ອມຕໍ່ ຣະຫວ່າງ ບ້ານລາດຊ້າງ ແລະ ບ້ານແສນຫລວງ ໃນແຂວງ ຜົ້ງສາລີ; ອີກສ່ວນນຶ່ງ ມີຄວາມຍາວ 14 ກິໂລແມັດ ແມ່ນທາງການ ແຂວງ ຜົ້ງສາລີ ເອງ ເປັນຜູ້ ອອກທຶນ ສ້ອມແປງ ເອົາທາງເກົ່າ ທີ່ມີ ຢູ່ແລ້ວ.

ເມື່ອວັນທີ່ 18 ເດືອນສິງຫາ ນີ້ ຍານາງ Karen Stewart ເອກອັຄຣາຊທູດ ສະຫະຣັຖ ປະຈຳລາວ ໄດ້ເດີນທາງ ໄປຮ່ວມ ພິທີ ເປີດໃຊ້ ຖນົນສາຍ ດັ່ງກ່າວ; ຜູ້ເຂົ້າຮ່ວມ ທາງຝ່າຍ ລາວ ກໍມີ ທ່ານ ສຸບັນ ສະຣິດທິຣາຊ ປະທານ ຄນະກັມມາທິການ ຄວບຄຸມ ຢາເສບຕິດ ແຫ່ງຊາດ ລາວ ແລະ ທ່ານ ທອງສິດ ແສງວົງ ຮອງເຈົ້າແຂວງ ຜົ້ງສາລີ.

ນອກຈາກ ແຂວງ ຜົ້ງສາລີ ແລ້ວ ເອກອັຄຣາຊທູດ Karen Stewart ຍັງໄດ້ໄປ ຢ້ຽມຢາມ ແຂວງ ອຸດົມໄຊ ຫາລືກັບ ຮອງເຈົ້າແຂວງ ແລະ ຮອງຫົວໜ້າ ຄນະກັມມະການ ປາບປາມ ຢາເສບຕິດ ປະຈຳ ແຂວງ ອຸດົມໄຊ.

ເມື່ອສັປດາ ທີ່ແລ້ວ ທາງ ສະຖານທູດ ສະຫະຣັຖ ພ້ອມກັບ ຜູ້ບັນຊາການ ກອງທັບ ສະຫະຣັຖ ປະຈຳເຂດ ປາຊີຟິກ ກໍໄດ້ຈັດ ການຝຶກ ອົບຮົມ ກ່ຽວກັບ ການໃຊ້ເລືອດ ຢ່າງປອດໄພ ໃຫ້ແກ່ ທະຫານ ແລະ ພົລເຮືອນ ຂອງລາວ ຢູ່ທີ່ ໂຮງແຮມ ດອນຈັນ ພາເລສ ນະຄອນຫລວງ ວຽງຈັນ. ການຝຶກ ອົບຮົມ ຄັ້ງນີ້ ເປັນການ ຝຶກອົບຮົມ ກ່ຽວກັບ ການໃຊ້ເລືອດ ຂັ້ນສູງ ສູງກວ່າ ຂັ້ນພື້ນຖານ ທີ່ທາງ ສະຖານທູດ ສະຫະຣັຖ ໄດ້ຈັດຂື້ນ ເມື່ອຕົ້ນເດືອນນີ້ ທີ່ເມືອງ ປາກເຊ ແຂວງ ຈຳປາສັກ.

ເມື່ອສັປດາກ່ອນ ສະຖານທູດ ສະຫະຣັຖ ກໍໄດ້ ຈັດການ ຝຶກອົບຮົມ ກ່ຽວກັບ ການກວດ ເຊື້ອໂຣກ HIV ແລະ ໂຣກເອດສ໌ ໃຫ້ແກ່ ທະຫານ ແລະ ພົລເຮືອນ ຂອງລາວ ເຊັ່ນກັນ.