ພະນະທ່ານ ທອງສິງ ທຳມະວົງ, ນາຍົກລັດຖະມົນຕີ ແຫ່ງ ສປປ ລາວ ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ19
*(ຂປລ)ກອງປະຊຸມສຸດຍອດອາຊຽນຄັ້ງທີ 19 ແລະ ບັນດາກອງປະຊຸມສຸດຍອດອື່ນໆ ທີ່ກ່ຽວຂ້ອງ ໄດ້ໄຂ ຂື້ນຢ່າງເປັນທາງການ ໃນຕອນເຊົ້າຂອງວັນທີ 17 ພະຈິກ 2011 ທີ່ ບາຫລີ, ອິນໂດເນເຊຍ. ພະນະທ່ານທອງສິງ ທຳມະວົງ, ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ນຳພາຄະນະຜູ້ແທນລາວ ເຂົ້າຮ່ວມບັນດາກອງປະຊຸມສຸດຍອດດັ່ງກ່າວ ຊຶ່ງຈະດຳເນີນໄປເປັນເວລາ 3 ວັນ ຄື: ແຕ່ວັນທີ 17 -19 ພະຈິກ 2011.
ໃນໂອກາດເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 19 ນີ້, ບັນດາຜູ້ນຳອາຊຽນ ໄດ້ທົບທວນຄືນຄວາມຄືບຫນ້າ ຂອງຂະບວນການສ້າງປະຊາຄົມອາ ຊຽນ ແລະ ການຈັດຕັ້ງປະຕິບັດກົດບັດອາຊຽນ ພາຍຫລັງທີ່ມີຜົນບັງຄັບໃຊ້ໃນວັນທີ 15 ທັນວາ 2008, ໄດ້ປຶກສາຫາລືກັນກ່ຽວກັບການເຊື່ອມຈອດອາຊຽນ ໂດຍສະເພາະແມ່ນໄດ້ຮັບຊາບຄວາມຄືບຫນ້າໃນການຈັດຕັ້ງປະຕິບັດແຜນແມ່ບົດ ວ່າດ້ວຍການ ເຊື່ອມຈອດອາຊຽນ. ພ້ອມກັນນີ້, ບັນດາຜູ້ນຳອາຊຽນ ຍັງ ໄດ້ປຶກສາຫາລືກ່ຽວກັບການຮ່ວມມືລະຫວ່າງ ອາຊຽນ ກັບພາຍນອກ ລວມທັງການຮັກສາ ແລະ ເສີມຂະຫຍາຍບົດບາດຂອງອາຊຽນ ໃນເວທີພາກພື້ນທີ່ ອາຊຽນລິ້ເລີ້ມ. ໃນໂອກາດນີ້, ບັນດາຜູ້ນຳ ອາຊຽນໄດ້ລົງນາມຮັບຮອງເອົາຖະແຫລງການບາຫລີ ວ່າດ້ວຍປະຊາຄົມອາຊຽນ ໃນປະຊາຄົມໂລກຂອງບັນດາ ປະຊາຊາດ ຊຶ່ງເປັນຖະແຫລງການທີ່ກຳນົດວິໄສທັດ ກ່ຽວກັບບົດບາດຂອງອາຊຽນ ພາຍຫລັງການສ້າງປະຊາຄົມອາຊຽນໃນປີ 2015.
ນອກຈາກນີ້, ບັນດາຜູ້ນຳອາຊຽນ ຍັງໄດ້ປຶກສາຫາລື ກ່ຽວກັບບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ ເປັນຕົ້ນແມ່ນ ບັນຫາໄພພິບັດທຳມະ ຊາດໂດຍສະເພາະແມ່ນ ໄພນ້ຳຖ້ວມທີ່ເກີດຂື້ນຢູ່ບາງປະເທດສະມາຊິກອາຊຽນ. ກ່ຽວກັບໄພພິບັດຈາກທຳມະຊາດນີ້, ບັນດາຜູ້ນຳອາຊຽນ ເຫັນວ່າ ອາຊຽນ ຄວນເພີ້ມທະວີການຮ່ວມມືກັນດ້ານການບັນເທົາທຸກ ແລະ ການຄຸ້ມຄອງໄພພິບັດ ເພື່ອປ້ອງກັນ ແລະ ຫລຸດຜ່ອນຜົນກະທົບຈາກໄພພິບັດທຳມະຊາດທີ່ມີຕໍ່ ການດຳລົງຊີວິດຂອງປະຊາຊົນກໍຄືການພັດທະນາເສດຖະກິດ-ສັງຄົມຂອງປະເທດ ທີ່ໄດ້ຮັບຜົນກະທົບຈາກໄພພິບັດດັ່ງກ່າວ. ພ້ອມດຽວກັນນີ້, ບັນດາຜູ້ນຳອາ ຊຽນ ໄດ້ຮັບຮອງເອົາຖະແຫລງການວ່າດ້ວຍການຮ່ວມມືເພື່ອປ້ອງກັນ, ຫລຸດຜ່ອນ, ບັນເທົາທຸກ ແລະ ຟື້ນຟູ ໄພນ້ຳຖ້ວມ ແລະ ຖະແຫລງການອື່ນໆ ພາຍໃຕ້ ປະຊາຄົມວັດທະນາທຳ-ສັງຄົມອາຊຽນ.
ໃນວັນດຽວກັນນີ້, ພະນະທ່ານ ນາຍົກລັດຖະມົນຕີ ທອງສິງ ທຳມະວົງ ຍັງໄດ້ພົບປະສອງຝ່າຍກັບ ນາຍົກລັດຖະມົນຕີຫວຽດນາມ ໂດຍໄດ້ປຶກສາຫາລືກັນ ກ່ຽວກັບການເສີມຂະຫຍາຍການພົວພັນຮ່ວມມືລະ ຫວ່າງສອງປະເທດ.
