ຄະນະຜູ້ແທນ ເຊື້ອຊາດລາວເຜົ່າມົ້ງ ຢ້ຽມຢາມລາວ
*(ຂປລ): ໃນວັນທີ 14 ທັນວາ 2011 ທີ່ນະຄອນຫລວງວຽງຈັນ, ທ່ານ ອາລຸນແກ້ວ ກິດຕິຄຸນ ລັດຖະມົນຕີຊ່ວຍວ່າການກະຊວງການຕ່າງປະເທດ ແລະ ທ່ານ ດວງດີ ອຸດທະຈັກ ປະທານກຳມາທິການບັນດາເຜົ່າ ສະພາແຫ່ງຊາດ ແຫ່ງ ສປປ ລາວ ພ້ອມດ້ວຍຄະນະ ໄດ້ພົບປະກັບຄະນະຜູ້ແທນຄົນເຊື້ອຊາດລາວ ເຜົ່າມົ້ງ ຈາກສະຫະລັດອາເມລິກາ. ເຊິ່ງນຳໂດຍທ່ານ ພອນເຮີ ຫົວໜ້າຫ້ອງການປະສານງານຂອງອົງການ PMH, LLC ພ້ອມດ້ວຍຄະນະ ເນື່ອງໃນໂອ ກາດມາຢ້ຽມຢາມທັດສະນະສຶກສາຢູ່ ສປປ ລາວ ແຕ່ວັນທີ 11-21 ທັນວາ 2011 ນີ້, ເພື່ອເປັນການຂົນຂວາຍພີ່ນ້ອງຊາວລາວ ຢູ່ຕ່າງປະເທດອວ່າຍໜ້າ ກັບຄືນມາປະເທດນັບມື້ນັບຫລາຍຂຶ້ນ.
ໂອກາດນີ້ ທ່ານ ລັດຖະມົນຕີຊ່ວຍວ່າການກະຊວງການຕ່າງປະເທດ ອາລຸນແກ້ວ ກິດຕິຄຸນ ແລະ ທ່ານ ປະທານກຳມາທິການບັນດາເຜົ່າ ສະພາແຫ່ງຊາດ ແຫ່ງ ສປປ ລາວ ດວງດີ ອຸດທະຈັກ ທັງສອງກໍໄດ້ກ່າວສະແດງ ຄວາມຍິນດີຕ້ອນຮັບຕໍ່ຄະນະຜູ້ແທນດັ່ງກ່າວ ທີ່ມາຢ້ຽມຢາມທັດສະນະສຶກສາເປັນຄັ້ງທຳອິດ ຢູ່ ສປປ ລາວ. ຊຶ່ງເປັນ ການສ້າງເງື່ອນໄຂໃຫ້ແກ່ພີ່ນ້ອງຊາວລາວທີ່ດຳລົງຊີວິດຢູ່ຕ່າງປະເທດ ໄດ້ມາເຫັນສະພາບຕົວຈິງ ໃນການສ້າງ ສາພັດທະນາເສດຖະ ກິດ-ສັງຄົມຢູ່ລາວ. ພ້ອມທັງໄດ້ແຈ້ງໃຫ້ຄະນະຜູ້ແທນດັ່ງກ່າວ ໄດ້ຮັບຊາບກ່ຽວກັບນະໂຍບາຍຂອງພັກ-ລັດ ທີ່ມີຕໍ່ຄົນ ເຊື້ອຊາດລາວຢູ່ຕ່າງປະເທດ ຊຶ່ງ ຍາມໃດກໍມີຄວາມເປັນຫວ່ງເປັນໃຍ ແລະ ບໍ່ສາມາດຕັດແຍກອອກຈາກວົງຄະນາຍາດ ແຫ່ງຊາດໄດ້ລັດຖະບານລາວ ມີຄວາມຢຶດໜັ້ນຢ່າງສະເໜີຕົ້ນ ສະເໝີປາຍ ໃນການປະຕິບັດນະໂຍບາຍ ການຕ່າງປະເທດ ສັນຕິພາບ ເອກະລາດ ມິດຕະພາບ ແລະ ການຮ່ວມມືກັບທຸກປະເທດໃນໂລກບົນພື້ນຖານ ຫລັກການຕ່າງຝ່າຍຕ່າງໄດ້ຮັບຜົນປະໂຫຍດ. ນອກນີ້ຍັງໄດ້ແຈ້ງກ່ຽວກັບການກະກຽມກອງປະຊຸມ ອາເຊມ ຄັ້ງທີ 9 ທີ່ ສປປ ລາວເຮົາ ໄດ້ຮັບຄວາມ ໄວ້ເນື້ອເຊື່ອໃຈຈາກອົງການສາກົນ ອັນເປັນການປະກອບສ່ວນຍົກຖານະ ບົດບາດ ຂອງ ສປປ ລາວ ໃຫ້ສູງເດັ່ນຂຶ້ນໃນພາກພື້ນກໍຄືໃນໂລກ./.
