ເຈົ້າຫນ້າທີ່ອາວຸໂສອາເຊັມ ຕົກລົງຮັບ 9 ບັນຫາ ແລະ 22 ຂໍ້ສະເຫນີຂອງລາວ
ກອງ ປະຊຸມເຈົ້າຫນ້າທີ່ອາວຸໂສອາເຊັມ ທີ່ຈັດຂຶ້ນລະຫວ່າງວັນທີ 1-2 ມີນາ 2012 ທີ່ນະຄອນຫລວງໂກເປັນຮາກປະເທດດານມາກ ຄະນະຜູ້ແທນລາວນຳໂດຍ ທ່ານ ບຸນເກີດ ສັງ ສົມສັກ ລັດຖະມົນຕີຊ່ວຍວ່າ ການກະຊວງການຕ່າງປະເທດ ທັງເປັນຫົວຫນ້າເຈົ້າຫນ້າທີ່ອາວຸໂສອາເຊັມຂອງ ສປປ ລາວ ໄດ້ເຂົ້າຮ່ວມກອງປະຊຸມດັ່ງກ່າວ ແລະ ມີຜູ້ເຂົ້າຮ່ວມຈາກປະເທດສະມາຊິກອາເຊັມ 46 ປະເທດ, ກອງເລຂາອາຊຽນ ແລະ ຄະນະກຳມາທິການເອີຣົບ.
ຜ່ານ ການປຶກສາຫາລືຢ່າງເຄັ່ງຮ້ອນຕະຫລອດເວລາ 2 ວັນ ກອງປະຊຸມໄດ້ຕົກລົງຮັບ 9 ບັນຫາຄື: 1 ຕົກລົງຮັບເອົາປະເທດອົດສະຕຣາລີ, ນິວຊີແລນ ແລະ ຣັດເຊຍ ເຂົ້າສັງກັດຢູ່ໃນກຸ່ມອາຊີ ບັນຫານີ້ໄດ້ຄ້າງຄາມາແຕ່ກອງປະຊຸມສຸດຍອດອາເຊັມຄັ້ງທີ 8 ໃນປີ 2010 ແລະ ໄດ້ມອບໃຫ້ ສປປ ລາວ ເຈົ້າພາບອາເຊັມ 9 ເປັນຜູ້ແກ້ໄຂ ແລະ ສປປ ລາວ ສາມາດແກ້ໄຂຢ່າງສຳເລັດໃນກອງປະຊຸມຄັ້ງນີ້. 2. ຝ່າຍເອີຣົບຮັບຕົກລົງເອົາສະມາຊິກໃຫມ່ 2 ປະເທດຄື: ປະເທດນອກແວ ແລະ ສະວິດ ເຂົ້າໃນກຸ່ມເອີຣົບ ສ່ວນປະເທດບັງກະລາເທດ ເຂົ້າ ຢູ່ໃນກຸ່ມອາຊີ ບັນຫາການຮັບ ເອົາປະເທດນອກແວ ແລະ ສະ ວິດ ນີ້ກໍ່ເປັນບັນຫາຄ້າງຄາມານານ ສົມຄວນ ແລະ ກໍ່ສາມາດແກ້ໄຂ ໃນຄັ້ງນີ້. 3. ເຫັນດີຮັບເອົາຫົວ ຂໍ້ກອງປະຊຸມອາເຊັມ 9 “ເພື່ອສັນຕິພາບ, ຄູ່ຮ່ວມມືເພື່ອຄວາມສົມບູນພູນສຸກ” ທັງໄດ້ເຫັນດີຮັບເອົາສັນຍະລັກ ASEM 9 ເຊິ່ງຈະນຳໃຊ້ຄວບຄູ່ກັບກາສັນຍະລັກຂອງ ASEM, ຮັບເອົາດ້ານຫລັກການວາລະກອງປະຊຸມ ແຕ່ກອງປະຊຸມແນະນຳໃຫ້ປັບປຸງຢ່າງມີຈຸດສຸມ.
ພ້ອມດຽວກັນ ກອງປະຊຸມຍັງເຫັນດີໃຫ້ ສປປ ລາວ ສ້າງເອກະສານ 2 ສະບັບຄື: ຖະແຫລງການຂອງປະທານ ແລະ ຖະແຫລງການວຽງຈັນ ວ່າດ້ວຍການເພີ່ມທະວີການເປັນຄູ່ ຮ່ວມເພື່ອສັນຕິພາບ ແລະ ການພັດທະນາ, ຕົກລົງໃຫ້ ສປປ ລາວ ເຊີນທ່ານປະທານາທິບໍດີແຫ່ງສາທາລະນະລັດ ສະຫະພາບມຽນມາ. ເຫັນດີດ້ານຫລັກການໃຫ້ ສປປ ລາວ ເຊີນຜູ້ ນຳອູກຣາອິນ (Ukrain) ເຂົ້າຮ່ວມໃນພິທີເປີດກອງປະຊຸມ ແລະ ໃຫ້ບັນດາຜູ້ນຳ 3 ປະເທດ ຈາກອາຊີ ແລະ ເອີຣົບ ເຂົ້າຮ່ວມຮັບປະທານອາຫານເຊົ້າກັບຄະນະຜູ້ແທນກອງປະຊຸມອາຊີ-ເອີ ຣົບພາກທຸລະກິດ (AEEF).
ນອກຈາກນີ້ແລ້ວ ກອງປະຊຸມຍັງເຫັນດີຕໍ່ຂໍ້ສະເຫນີຈຳນວນ 22 ຂໍ້ຂອງຄະນະຜູ້ແທນລາວໃນການກະກຽມກອງປະຊຸມ ASEM 9.
ກອງປະຊຸມເຈົ້າຫນ້າທີ່ອາວຸໂສຄັ້ງນີ້ ເປັນກອງປະຊຸມທີ່ມີການຕົກລົງເປັນປະຫວັດສາດເພາະສາມາດແກ້ໄຂ ບັນຫາຄົງ ຄ້າງມາແລ້ວດົນນານເຖິງ 16 ປີ ກ່ຽວກັບວ່າ ອາເຊັມ ແມ່ນການພົວພັນຮ່ວມມືລະຫວ່າງພາກພື້ນກັບພາກພື້ນຫມາຍຄວາມ ວ່າລະຫວ່າງອາຊີ ແລະ ເອີຣົບ ແຕ່ຫາກບໍ່ແມ່ນລະຫວ່າງກຸ່ມກັບກຸ່ມຄືອາຊີກັບອີຢູ.
ນອກນີ້ ກອງປະຊຸມຍັງໄດ້ຍ້ອງຍໍຊົມເຊີຍ ສປປ ລາວ ທີ່ໄດ້ຫ້າງຫາກະກຽມກອງປະຊຸມສຸດຍອດອາເຊັມ ຄັ້ງທີ 9 ໂດຍມີຄວາມຄືບຫນ້າຕົວຈິງຫລາຍດ້ານ ບໍ່ວ່າທາງດ້ານເນື້ອໃນ ແລະ ກໍ່ສ້າງໂຄງລ່າງ ທັງນີ້ ສປປ ລາວ ຈະເປັນເຈົ້າພາບຈັດກອງປະຊຸມເຈົ້າຫນ້າທີ່ອາວຸໂສ ໃນເດືອນມິຖຸນາ ແລະ ກັນຍາປີ 2012 ເພື່ອສືບຕໍ່ຜັນຂະຫຍາຍຂອງກອງປະຊຸມຄັ້ງທີ່ຜ່ານມາ ແລະ ສືບຕໍ່ກະກຽມກອງປະຊຸມສຸດຍອດອາເຊັມ ຄັ້ງທີ 9 ທີ່ຈະຈັດຂຶ້ນໃນວັນທີ 5-6 ພະຈິກ 2012 ຢູ່ນະຄອນຫລວງວຽງຈັນ.
