ຂ່າວ: ສຸກວິໄລ
ພິທີຈັດງານລ້ຽງສົ່ງນັກ ສຶກສາລາວຈຳນວນ 11 ຄົນທີ່ ຈະເດີນທາງໄປສຶກສາຕໍ່ທີ່ປະເທດຍີ່ປຸ່ນໃນເດືອນເມສາທີ່ຈະມາເຖິງ ໄດ້ຈັດຂຶ້ນໃນແລງວັນທີ 28 ມີນາຜ່ານມາທີ່ເຮືອນພັກ ທ່ານທູດຍີ່ປຸ່ນ ເຊິ່ງຈັດໂດຍທ່ານນາງ ຈຸນໂກະ ໂຢໂກຕະ ເອກອັກຄະລາຊະທູດຍີ່ປຸ່ນປະຈຳ ສປປ ລາວ.
ໃຫ້ກຽດເຂົ້າຮ່ວມງານລ້ຽງ ຄັ້ງນີ້ມີ ທ່ານ ດຣ. ປອນເມກ ດາລາລອຍ ປະທານສະມາຄົມມິດຕະພາບລາວ-ຍີ່ປຸ່ນ, ທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີຊ່ວຍວ່າການ ກະຊວງສຶກສາທິການ ແລະ ກີລາ, ທ່ານ ສຈ.ດຣ. ສົມສີ ຍໍພັນໄຊ ຮອງອະທິການບໍດີມະຫາວິທະຍາໄລແຫ່ງຊາດ, ມີແຂກທີ່ຖືກເຊີນ ແລະ ພາກສ່ວນທີ່ກ່ຽວຂ້ອງ.
ສຳລັບສົກປີ 2012 ນີ້ ລັດຖະບານຍີ່ປຸ່ນໄດ້ໃຫ້ທຶນແກ່ນັກສຶກສາລາວຈຳນວນ 11 ຄົນໄປສຶກສາຕໍ່ທີ່ປະເທດຍີ່ປຸ່ນ. ໃນນັ້ນ 4 ຄົນຈະໄປສຶກສາໃນລະດັບວິຊາຊີບຊັ້ນສູງ, 6 ຄົນໄດ້ທຶນປະລິນຍາຕີ ແລະ ອີກ 1 ຄົນຈະສຶກສາຕໍ່ລະດັບປະລິນຍາເອກ.
ໃນງານລ້ຽງສົ່ງ ທ່ານນາງ ຈຸນໂກະ ໂຢໂກຕະ ໄດ້ກ່າວຊົມເຊີຍບັນດານັກສຶກສາທີ່ປະສົບຜົນສຳເລັດໃນການສອບເສັງ ແລະ ຮຽກຮ້ອງໃຫ້ນັກສຶກສາປະກອບສ່ວນອັນສຳຄັນເຂົ້າໃນ ການພັດທະນາປະເທດຊາດ. ພ້ອມນັ້ນ ຍັງສະແດງຄວາມຫວັງວ່າ: ນັກສຶກສາເຫລົ່ານີ້ຈະມີບົດບາດເປັນຂົວຕໍ່ລະຫວ່າງລາວ ແລະ ຍີ່ປຸ່ນໃນອະນາຄົດ.
ທ່ານ ສາຍຄຳ ບຸດທະວົງ ໃນນາມຕາງຫນ້ານັກສຶກສາທີ່ຈະເດີນທາງໄປສຶກສາຕໍ່ເຊິ່ງຈະໄປຮຽນລະດັບປະລິນຍາເອກ ສາຂາວິຊາການອະນຸຮັກປ່າໄມ້ທີ່ມະຫາວິທະຍາໄລກີວຊູ ໄດ້ປະຕິຍານຕົນວ່າ: ຈະຕັ້ງໃຈຮ່ຳຮຽນ ແລະ ສຸມເຫື່ອແຮງສະຕິປັນຍາ ຂອງຕົນເພື່ອເຮັດໃຫ້ການສຶກສາປະສົບຜົນສຳເລັດ.
ຕັ້ງອົກຕັ້ງໃຈເອົາເນີ້,ນ້ອງນຸ່ງລູກຫຼານເອີ້ຍ ວິຊາຄວາມຮູ້ຈາກປະເທດທີ່ເຂົາຈະເລີນ
ຮຸ່ງເຮືອງສີວິໄລຂອງໂລກເສຣີ ,ໂອກາດດີໆທີ່ເຂົາຈະໃຫ້ທານພວກເຮົາມັນຫາຍາກ
ແທ້ໆ!ຮຽນຈົບມາແລ້ວເອົາມາສອນຕໍ່ໃຫ້ຜູ້ນໍາພັກລັດເຮົາແດ່!ພວກເພີ່ນນັ້ນຮູ້ຈັກ
ແຕ່ວິທີເອົາເງິນເຂົ້າຖົງໂຕເອງເດີ້ !ຊາດຊິເປັນແນວໃດນັ້ນເພີ່ນບໍ່ສົນໃຈດອກ,ທີ່ເພີ່ນ
ເຮັດໄດ້ດີທີ່ສຸດອີກຢ່າງກໍຄື :ເຊີນພວກແກວມາລາວແລ້ວກິນອົບໝາຊຸມກັນ ກິນ
ອີ່ມແລ້ວຕົບມືຊົມເຊີຍວ່າ ມາລາວໄດ້ຮັບການຕ້ອນຮັບອົບອຸ່ນ ແຕ້..ແຕ້...ງອງລໍ້າ!
ສ.ສີໄຄ
