ທະນາຄານໂລກ ມອບ 8 ລ້ານໂດລາ ຄຸ້ມຄອງຊັບພະຍາກອນຕາມລໍານໍ້າຂອງ
ທະນາຄານ ໂລກໃຫ້ການ ສະຫນັບສະຫນູນແກ່ຄະນະກໍາມະການແມ່ນ້ໍາຂອງສາກົນໃນມູນຄ່າ 8 ລ້ານໂດລາສະຫະລັດ ເພື່ອນຳໃຊ້ເຂົ້າໃນການຄຸ້ມຄອງຊັບພະຍາກອນຕາມລຳນ້ຳ ຂອງ, ເຊິ່ງມີກຳນົດ 5 ປີ (2012-2017) ໂດຍເປົ້າຫມາຍແນໃສ່ອຳນວຍຄວາມສະດວກໃຫ້ແກ່ວຽກງານການປຶກສາຫາລື ແລະ ຈັດຕັ້ງປະຕິບັດການຄຸ້ມຄອງຊັບພະຍາກອນ ແມ່ນ້ຳຂອງຕອນລຸ່ມລວມມີ 4 ປະເທດຄື: ສປປ ລາວ, ໄທ, ກຳປູເຈຍ ແລະ ຫວຽດນາມ.
ທ່ານ ຮັນສ໌ກຸດແມນ ຜູ້ອໍານວຍການໃຫຍ່ອົງການແມ່ນ້ໍາຂອງສາກົນກ່າວວ່າ: ການປະກອບສ່ວນຂອງທະນາຄານໂລກ ຈະຊ່ວຍເພີ່ມທະວີການພົວພັນລະຫວ່າງປະເທດຂອງບັນດາ ລັດຖະບານ ແລະ ຄູ່ຮ່ວມພັດທະນາໃຫ້ມີຄວາມເຂັ້ມແຂງຂຶ້ນ, ໂດຍສະເພາະທຶນດັ່ງກ່າວຈະໄດ້ນຳໃຊ້ເຂົ້າໃນໂຄງການຄຸ້ມ ຄອງຊັບພະຍາກອນນ້ໍາແບບປະສົມປະສານຕາມລຳແມ່ນ້ໍາຂອງໃຫ້ມີການ ພັດທະນາຮ່ວມກັນໃນການຄຸ້ມຄອງນ້ໍາ ແລະ ແຫລ່ງນ້ຳ ເພື່ອຮັບປະກັນການຂະຫຍາຍຕົວທາງດ້ານເສດຖະກິດ ແລະ ສັງຄົມໃນຕໍ່ຫນ້າບໍ່ໃຫ້ມີຜົນກະທົບຕໍ່ຄວາມຍືນຍົງຂອງ ລະບົບນິເວດ.
ນອກຈາກນັ້ນ ອົງການແມ່ນ້ໍາຂອງສາກົນຈະນໍາໃຊ້ທຶນດັ່ງກ່າວຊ່ວຍບັນດາປະເທດ ສະມາຊິກໃນການນໍາໃຊ້ຫລັກການຄຸ້ມຄອງແຫລ່ງນ້ໍາແບບເຊື່ອມໂຍງເຂົ້າ ໃນການຕັດສິນບັນຫາລະ ດັບຊາດກໍ່ຄືການປະຕິບັດວຽກງານການຄຸ້ມຄອງຊາຍແດນຮ່ວມເຊັ່ນວ່າ: ໂຄງການຮ່ວມຄຸ້ມຄອງການປະມົງຕາມລຳແມ່ນ້ໍາຂອງ ແລະ ແມ່ນ້ໍາເຊກອງໃນ ສປປ ລາວ ແລະ ກໍາປູເຈຍ.
ອົງການແມ່ນ້ໍາຂອງສາກົນເປັນອົງການລະຫວ່າງລັດຖະບານທີ່ ຮັບຜິດຊອບປະສານງານຮ່ວມມື ເພື່ອການຄຸ້ມຄອງອ່າງແມ່ນ້ໍາຂອງແບບຍືນຍົງໂດຍມີສະມາຊິກຮ່ວມກັນ 4 ປະເທດຄື: ສປປ ລາວ, ໄທ, ກຳປູເຈຍ ແລະ ຫວຽດນາມ ເພື່ອການຮັກສາເສລີພາບໃນການແລ່ນເຮືອ, ການຄົ້ນຫາໂອກາດທາງດ້ານກະສິກຳ, ການປະມົງທີ່ຍືນຍົງ, ການຄຸ້ມຄອງ ແລະ ບໍລິຫານຈັດການກ່ຽວກັບໄພນ້ຳຖ້ວມ ແລະ ຮັກສາຄວາມສົມດຸນລະບົບນິເວດຂອງບັນດາປະເທດສະມາຊິກ.
ພິທີເຊັນສັນຍາໄດ້ຈັດຂຶ້ນໃນຕອນແລງວານນີ້ທີ່ຫ້ອງການອົງການ ແມ່ນ້ຳຂອງສາກົນລະຫວ່າງ ທ່ານ ຮັນສ໌ກຸດແມນ ຜູ້ອໍານວຍການໃຫຍ່ອົງການແມ່ນ້ໍາຂອງສາກົນ ແລະ ທ່ານນາງ ແອນແນັດເຕ້ ດີໂຊນ ຜູ້ອໍານວຍການປະຈໍາພາກພື້ນຕາເວັນອອກສ່ຽງໃຕ້ຕາງຫນ້າຈາກທະນາຄານ ໂລກມີບັນດາຄະນະນໍາທັງສອງຝ່າຍເຂົ້າຮ່ວມ.
