ພິທີວາງສີລາເລີກ ສຳລັບສອງໂຄງການກໍ່ສ້າງພື້ນຖານໂຄງລ່າງ ທີ່ແຂວງຊຽງຂວາງ ໄດ້ຈັດຂຶ້ນໃນວັນທີ 25ພຶດສະພາ ຜ່ານມານີ້ຢູ່ທີ່ເມືອງຜາໄຊ ແລະ ເມືອງພູກູດ ເຊິ່ງສອງໂຄງການຊ່ວຍເຫຼືອດ້ານມະນຸດສະທຳນີ້ ແມ່ນໄດ້ຮັບການສະໜັບສະໜູນດ້ານທຶນຮອນຈາກລັດຖະບານສະຫະລັດ ອາເມລິກາ ແລະ ສູນບັນຊາການກອງທັບສະຫະລັດປະຈຳພາກພື້ນປາຊີຟິກ (USPACOM) ເຊິ່ງເປັນພາກສ່ວນໜຶ່ງຂອງໂຄງການໃຫ້ການຊ່ວຍເຫຼືອດ້ານມະນຸດສະ ທຳຢ່າງຕໍ່ເນື່ອງ.
ໂຄງການດັ່ງກ່າວຈະສະໜອງອາຄານໂຮງໝໍຫຼັງໃໝ່ ຢູ່ເມືອງຜາໄຊ ແລະ ເມືອງພູກູດ ແຂວງຊຽງຂວາງ ໂຮງໝໍຫຼັງໃໝ່ສອງແຫ່ງນີ້ ຈະເຮັດໃຫ້ການບໍລິການທາງດ້ານການຮັກສາສຸຂະພາບຂອງປະຊາຊົນ ແຂວງຊຽງຂວາງ ດີຂຶ້ນ ການກໍ່ສ້າງທັງສອງໂຄງການຄາດວ່າຈະສຳເລັດໃນເດືອນທັນວາ ປີ 2012.
ການຊ່ວຍເຫຼືອປຸກສ້າງອາຄານໂຮງໝໍຫຼັງໃໝ່ນີ້ ແມ່ນການຊ່ວຍເຫຼືອໃນນາມປະຊາຊົນອາເມລິກາ ເພື່ອເປັນການສະແດງຄວາມຮູ້ບຸນຄຸນອັນເລິກເຊິ່ງຕໍ່ລັດຖະບານ ກໍຄືປະຊາຊົນແຂວງຊຽງຂວາງ ທີ່ໄດ້ໃຫ້ການສະໜັບສະໜູນ ແລະ ການຮ່ວມມືໃນການຂຸດຄົ້ນຫາກະດູກ ແລະ ສິ່ງເສດເຫຼືອຂອງທະຫານອາເມລິກາ ທີ່ຫາຍສາບສູນໃນປາງສົມຄາມອິນໂດຈີນ.
ສະຖານທູດສະຫະລັດອາເມລິກາ ຮ່ວມກັບສູນບັນຊາການກອງທັບສະຫະລັດປະຈຳພາກພື້ນປາຊີຟິກ (USPACOM) ໄດ້ໃຫ້ການຊ່ວຍເຫຼືອທາງດ້ານໂຄງການຊ່ວຍເຫຼືອດ້ານມະນຸດສະທຳ ຢູ່ໃນເຂດຊົນນະບົດຂອງປະເທດລາວມາແລ້ວຫຼາຍກ່ວາ 15ປີ ເຊິ່ງລວມມີການປຸກສ້າງໂຮງຮຽນ ໂຮງໝໍ ລະບົບຊົນລະປະທານ ແລະ ລະບົບນ້ຳສະອາດ ອື່ນໆ ໂຄງການກໍ່ສ້າງດັ່ງກ່າວນີ້ ແມ່ນໜຶ່ງໃນ 8ໂຄງການຊ່ວຍເຫຼືອດ້ານມະນຸດສະທຳຂອງ USPACOM ທີ່ໄດ້ຕົກລົງໃຫ້ການຊ່ວຍເຫຼືອໃນປີນີ້ ເຊິ່ງມີມູນຄ່າການຊ່ວຍເຫຼືອຫຼາຍກ່ວາ 3,5ລ້ານໂດລາສະຫະລັດ.
ເຂົ້າຮ່ວມໃນພິທີມີທ່ານ ດວງຈິດ ຈາງໄຊວາງ ຮອງເຈົ້າແຂວງຊຽງຂວາງ ມີຫົວໜ້າພະແນກສາທາລະນະສຸກແຂວງຊຽວຂວາງ ຮອງເຈົ້າເມືອງຜາໄຊ ເຈົ້າເມືອງພູກູດ ນອກນັ້ນ ຍັງມີທ່ານ ພັນໂທ ເຈມສ ແມັກກາເດິນ ທູດທະຫານສະຫະລັດອາເມລິກາ ປະຈຳລາວ ແລະ ພາກສ່ວນກ່ຽວຂ້ອງຕ່າງໆເຂົ້າຮ່ວມໃນພິທີດັ່ງກ່າວ.
ການສ້າງໂຮງຫມໍແມ່ນແຜນການທີ່ດີຈະເຮັດໃຫ້ການບໍຣິການທາງດ້ານການຮັກສາສຸຂະພາບຂອງປະຊາຊົນໃຫ້ດີຂຶ້້ນ, ແຕ່ກົງກັນຂ້າມບໍຣິສັດຈີນມີແຕ່ສ້າງເສຖກິດ
ພິເສດ,casinoຊຶ່ງເຮັດໃຫ້ສັງຄົມລາວເປື່ອຍເຍື່ອຍ,ມີແມ່ຈ້າງນາງເລງ,ຄ້າຢາເສບ
ຕິດ.ຜົນປະໂຫຍດທີ່ໃຫ້ປະຊາຊົນມີວຽກເຮັດງານທໍາແມ່ນບໍ່ມີ.ຜົນໄດ້ແມ່ນນາຍ
ທຶນແລະອີກສ່ວນນຶ່ງເງິນເຂົ້າຖົງສ່ວນຕົວພັກລັດຜູ້ມີອໍານາດ.
