ທ່ານເຈືອງ ສົມບູນຂັນ ຫົວໜ້າຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ ຖະແຫລງຍອມຮັບວ່າ ການທີ່ພັກໄດ້ວາງເປົ້າໝາຍທີ່ຈະລົບລ້າງບັນຫາຄວາມທຸກຈົນຂອງ ປະຊາຊົນລາວ ໃຫ້ໄດ້ໂດຍພື້ນຖານພາຍໃນປີ 2015 ນັ້ນ ກໍບໍ່ໄດ້ໝາຍຄວາມວ່າ ຈະເຮັດໃຫ້ປະຊາຊົນລາວທຸກຄົນ ມີລາຍໄດ້ໝາຍຄວາມວ່າ ຈະເຮັດໃຫ້ປະຊາຊົນລາວ ທຸກຄົນມີລາຍໄດ້ສະເລ່ຍຢ່າງເທົ່າທຽມກັນ ໃນທົ່ວປະເທດແຕ່ຢ່າງໃດ.
ຍິ່ງໄປກວ່ານັ້ນ ເນື່ອງຈາກວ່າມູນຄ່າ GDP ໃນລາວ ທີ່ເປັນຈິງນັ້ນ ກໍຍັງລວມເຖິງຜົນ ປະໂຫຍດຂອງນັກລົງທຶນຊາວຕ່າງປະເທດໃນລາວອີກດ້ວຍ ເພາະສະນັ້ນ ຈຶ່ງເປັນເລື້ອງທໍາມະດາ ທີ່ນັກລົງທຶນເຫລົ່ານີ້ຈະຕ້ອງໂອນຜົນປະໂຫຍດເຫລົ່ານັ້ນ ກັບຄືນໄປປະເທດຂອງພວກເຂົາເຈົ້າ ຊຶ່ງກໍຈະສົ່ງຜົນກະທົບຕໍ່ການສະເລ່ຍລາຍໄດ້ຂອງປະຊາຊົນລາວຈາກມູນຄ່າ GDP ອີກດ້ວຍນັ້ນເອງ ດັ່ງທີ່ທ່ານເຈືອງໄດ້ຊີ້ແຈງວ່າ:
“ເຖິງວ່າເຮົາສິເອົາລວມຍອດມູນຄ່າມາແບ່ງສະເລ່ຍໃຫ້ແຕ່ລະຄົນໆ ຫັ້ນນະ ມັນເພີ້ມຂຶ້ນສູງແທ້ ແຕ່ວ່າ ການກະຈາຍຕົວຈິງຂອງລາຍໄດ້ ຈາກລວມຍອດມູນຄ່າອັນນີ້ ນຶ່ງຫັ້ນພວກລົງທຶນເຂົາເອົາກັບຄືນເມືອປະເທດເຂົາ ສ່ວນນຶ່ງແລ້ວ ທີ່ເປັນຜົນກໍາໄລຂອງເຂົາ ອັນສອງມາເຮົາກໍເອົາມາເຂົ້າໃນຄັງເງິນລວມຂອງຊາດ ຖົງເງິນໃຫຍ່ ຢູ່ໃນການເງິນນີ້ໝົດ ສ່ວນວ່າປະຊາຊົນຕົວຈິງເຂົາເຈົ້າບໍ່ໄດ້ຈາກຕົວນີ້ເດ໋ະ.”
