ຍີ່ປຸ່ນຊ່ວຍເຫລືອປັບປຸງ-ກໍ່ສ້າງໂຮງຮຽນຢູ່ 2 ແຂວງ
*(ຂປລ): ລັດຖະບານຍີ່ປຸ່ນ ໄດ້ສະໜັບສະໜູນທຶນຊ່ວຍເຫລືອ ເພື່ອປັບປຸງ-ກໍ່ສ້າງໂຮງ ຮຽນປະຖົມ ແລະ ມັດທະຍົມຕົ້ນ ຈຳນວນ 95 ແຫ່ງ ຢູ່ 2 ແຂວງ ຄື: ສະຫວັນນະເຂດ ແລະ ຈຳປາສັກ ຊຶ່ງພິທີມອບ-ຮັບຜົນສຳເລັດໂຄງການກໍ່ສ້າງດັ່ງກ່າວ ໄດ້ຈັດຂຶ້ນວັນທີ 25 ພຶດສະພາ 2012 ນີ້ ໂດຍມີທ່ານ ດຣ. ພັນຄຳ ວິພາວັນ, ລັດຖະມົນຕີວ່າການກະຊວງສຶກສາທິການ ແລະ ກິລາ, ມີທ່ານນາງ ຈຸນໂກະ ໂຢໂກຕະ, ເອກອັກຄະຣາຊະທູດ ວິສາມັນຜູ້ມີອຳນາດເຕັມ ແຫ່ງປະ ເທດຍີ່ປຸ່ນປະຈຳລາວ ແລະ ພາກສ່ວນທີ່ກ່ຽວຂ້ອງແຕ່ຂັ້ນສູນກາງລົງຮອດທ້ອງຖິ່ນ ເຂົ້າຮ່ວມ.
ທ່ານນາງ ຈຸນໂກະ ໂຢໂກະຕະ ກ່າວວ່າ: ປັດຈຸບັນ ລັດຖະບານຍີ່ປຸ່ນ ໄດ້ກໍ່ສ້າໂຮງຮຽນແກ່ລາວຈຳນວນ 433 ແຫ່ງ ໃນທົ່ວປະເທດ, ໃນນັ້ນມີ ໂຮງຮຽນປະຖົມ 375 ແຫ່ງ ແລະ ໂຮງ ຮຽນມັດທະຍົມ 58 ແຫ່ງ ພ້ອມກັນນັ້ນ ກໍຍັງໃຫ້ການຊ່ວຍເຫຼືອດ້ານເຕັກນິກ ສຳລັບຝຶກອົບຮົມຄູສອນວິທະຍາສາດ, ຄູສອນເລກ ແລະ ໄດ້ຊຸກຍູ້ປະຊາຊົນທ້ອງຖິ່ນ ປະກອບສ່ວນເຂົ້າໃນການຄຸ້ມຄອງໂຮງຮຽນພາຍໃຕ້ໂຄງການ CIED ລວມທັງໂຮງຮຽນອີກ 95 ແຫ່ງຢູ່ 2 ແຂວງດັ່ງກ່າວ ຊຶ່ງຈະເປັນ ທ່າແຮງອັນສຳຄັນ ຕໍ່ການເຕີບໃຫຍ່ຂະຫຍາຍຕົວທາງດ້ານການສຶກສາຂອງລາວ ເຊັ່ນດຽວກັນກັບການເສີມຂະຫຍາຍສາຍພົວພັນມິດຕະພາບຍີ່ປຸ່ນ-ລາວໃນ ອະນາຄົດ.
