ທະນາຄານໂລກຊ່ວຍ ເກືອບ 2 ລ້ານໂດລາ ສ້າງສູນວິໄຈພະຍາດສັດ
ທະນາຄານໂລກໃຫ້ທຶນຊ່ວຍເຫລືອເກືອບ 2 ລ້ານໂດລາສະຫະລັດແກ່ລັດຖະບານສືບຕໍ່ ສ້າງສູນວິໄຈພະຍາດສັດ, ແນໃສ່ປັບປຸງພື້ນຖານວັດຖຸເຕັກນິກ ແລະ ຍົກລະດັບວຽກງານການວິໄຈໃນຂະແຫນງການສຸຂະພາບສັດໃຫ້ນັບມື້ນັບ ດີຂຶ້ນ.
ເປັນກຽດເຂົ້າຮ່ວມເປີດນຳໃຊ້ຕຶກສູນວິໄຈພະຍາດສັດໂດຍທ່ານ ອາຊາງ ລາວລີ ຮອງນາຍົກລັດຖະມົນຕີ, ຜູ້ຊີ້ນຳວຽກງານວັດທະນະທຳສັງຄົມ, ມີຫົວຫນ້າທະນາຄານໂລກປະຈຳ ລາວ ແລະ ຜູ້ຕາງຫນ້າອົງການ OIE ເຂົ້າຮ່ວມ, ພິທີດັ່ງກ່າວຈັດຂຶ້ນໃນເຊົ້າວານນີ້ທີ່ກົມລ້ຽງສັດ ແລະ ການປະມົງ.
ທ່ານ ດຣ. ສິນລະວົງ ຄຸດໄພທູນ ລັດຖະມົນຕີ, ຫົວຫນ້າຫ້ອງວ່າການລັດຖະບານໃຫ້ຮູ້ວ່າ: ຫລັງລົງມືກໍ່ສ້າງຕຶກສູນວິໄຈພະຍາດສັດ ແຕ່ທ້າຍປີ 2001 ເນື່ອງຈາກວິກິດດ້ານການເງິນ ການກໍ່ສ້າງຈິ່ງໄດ້ຢຸດຕິລົງໃນປີ 2003 ຕໍ່ມາທະນາຄານໂລກໃຫ້ທຶນຊ່ວຍເຫລືອແກ່ລັດຖະບານ ສປປ ລາວ ຈຳນວນ 1,8 ລ້ານໂດລາສະຫະລັດສືບຕໍ່ສ້າງຕຶກ, ໂດຍບໍລິສັດ ຈິດຈະເລີນ ກໍ່ສ້າງ ເປັນຜູ້ຮັບເຫມົາ ເຊິ່ງໄດ້ເລີ່ມກໍ່ສ້າງແຕ່ເດືອນຕຸລາ ປີ 2010 ຜ່ານມາໃນເນື້ອທີ່ 27x20 ແມັດ ເປັນອາຄານ 5 ຊັ້ນ, ມີທັງຫມົດ 34 ຫ້ອງ.
ທ່ານ ວິໄລວັນ ພົມເຂ ລັດຖະມົນຕີວ່າການກະຊວງກະສິກຳ ແລະ ປ່າໄມ້ກ່າວວ່າ: ເພື່ອຮັບປະກັນເຮັດໃຫ້ຝູງສັດມີການຂະຫຍາຍຕົວປັດສະຈາກການສູນເສຍ ເນື່ອງຈາກການລະ ບາດຂອງພະຍຸພະຍາດສັດ, ການເຝົ້າລະວັງຕິດຕາມກໍ່ເປັນວຽກງານຫນຶ່ງທີ່ສຳຄັນໃນການຕອບໂຕ້ ແລະ ປ້ອງກັນບໍ່ໃຫ້ພະຍາດດັ່ງກ່າວແພ່ລະບາດສູ່ວົງກວ້າງ. ສະນັ້ນ ການສ້າງສູນ ວິໄຈພະຍາດສັດຂຶ້ນ ເພື່ອເປັນການປັບປຸງຍົກລະດັບພື້ນຖານວັດຖຸເຕັກນິກ ແລະ ຄວາມສາມາດດ້ານການວິໄຈບົ່ງມະຕິພະຍາດສັດໃຫ້ນັບມື້ນັບດີຂຶ້ນ ເປັນກ້າວໆ ເພາະການວິເຄາະ, ວິໄຈພະຍາດສັດທີ່ໃຫ້ຜົນໄວ ແລະ ເຊື່ອຖືໄດ້ນັ້ນຈະການເປັນແຫລ່ງຂໍ້ມູນສຳຄັນໃນການຕອບໂຕ້, ສະກັດກັ້ນ ແລະ ຄວບຄຸມການລະບາດຂອງພະຍາດສັດໄດ້ທັນເວລາ.
ພ້ອມກັນນັ້ນ, ຍັງມີຄວາມສຳຄັນໃນການປັບປຸງ ແລະ ຍົກລະດັບວຽກງານການວິໄຈໃນຂະແຫນງການສຸຂະພາບສັດ ເພາະຈະກາຍເປັນຫໍວິໄຈພະຍາດສັດຂັ້ນສູນກາງທີ່ສຳຄັນແຫ່ງຫນຶ່ງ ທີ່ມີສະຖານທີ່ ແລະ ສະພາບແວດລ້ອມດີຮັບປະກັນຄວາມປອດໄພສຳລັບນັກວິຊາການທີ່ເຮັດ ວຽກກ່ຽວກັບການວິໄຈພະຍາດສັດ ນອກຈາກນັ້ນ ສູນວິໄຈດັ່ງກ່າວຍັງຈະກາຍເປັນຫໍວິໄຈອ້າງອີງລະດັບສູນກາງ ເພື່ອສະຫນອງຂໍ້ມູນການບົ່ງມະຕິພະຍາດສັດໃນຂອບເຂດທົ່ວປະເທດ, ທັງເປັນຈຸດປະສານງານເຊື່ອມໂຍງກັບການຈັດຕັ້ງປະຕິບັດວຽກງານ ການຄວບຄຸມພະຍາດຕິດຕໍ່ຈາກສັດໃສ່ຄົນລະຫວ່າງຂະແຫນງສຸຂະພາບສັດ ແລະ ສຸຂະພາບຄົນນຳອີກດ້ວຍ, ທ່ານ ວິໄລວັນ ກ່າວຖິ້ມທ້າຍ.
