ປະຊາຊົນຕ້ອງການຄວາມຊວຍເຫຼືອຈາກພັກລັດ
ຕ້ອງຍອມຮັບວ່າ ປະຈຸບັນ ນະຄອນຫລວງວຽງຈັນກຳລັງຂຸ້ນຂ້ຽວຍົກລະດັບພື້ນຖານໂຄງລ່າງ ເປັນຕົ້ນແມ່ນຖະຫນົນຫົນທາງຫລາຍເສັ້ນໄດ້ຮັບການປັບປຸງ ເພື່ອອຳນວຍຄວາມສະດວກ ແກ່ໄປ-ມາຂອງພໍ່ແມ່ປະຊາຊົນ ລວມທັງຕ້ອນຮັບກອງປະຊຸມອາເຊັມທີ່ລາວຈະເປັນເຈົ້າພາບໃນອີກບໍ່ ຊ້ານີ້.
ຢ່າງໃດກໍ່ຕາມ ສຳລັບເສັ້ນທາງຮ່ອມຈາກຖະຫນົນສຸພານຸວົງ (ຂ້າງໂບດນາຄຳ) ຫາ 4 ແຍກໄຟແດງ (T2) ໃກ້ບ້ານ ດົງປ່າສັກຢູ່ບ້ານອຸບມົງ ເມືອງສີໂຄດຕະບອງ ນະຄອນຫລວງ ວຽງຈັນ ກໍ່ເປັນເສັ້ນທາງຫນຶ່ງທີ່ເປ່ເພຫນັກແຕ່ຍັງບໍ່ໄດ້ຮັບການປັບປຸງ ປະຈຸບັນຈິ່ງເກີດເປັນຂຸມເລິກເກືອບສຸດເສັ້ນ ຂະນະທີ່ມີບາງຈຸດເລິກເຖິງ 1,50 ແມັດ ເມື່ອຝົນຕົກຫນັກລົດໃຫຍ່ບາງ ຄັນຍັງຜ່ານຍາກ.
ອ້າຍ ຂັນທອງ ພອນປະດິດ ຫນຶ່ງໃນຈຳນວນປະຊາຊົນທີ່ນຳໃຊ້ທາງດັ່ງກ່າວທຸກວັນກ່າວຕໍ່ທີມ ຂ່າວວ່າ: ທາງຮ່ອມດັ່ງກ່າວ ແມ່ນໄດ້ເປ່ເພມາຕັ້ງແຕ່ຕົ້ນລະດູຝົນປີນີ້ ໂດຍຜ່ານມາເຄີຍມີປະຊາຊົນເຮືອນແຄມທາງດັ່ງກ່າວ ໂທລະສັບແຈ້ງເຖິງເມືອງແຕ່ກໍ່ບໍ່ເຫັນທ່າທີແນວໃດຕໍ່ກັບ ເສັ້ນທາງດັ່ງກ່າວ ຈິ່ງເກີດເປັນບວກເລິກດັ່ງທີ່ເຫັນໃນປະຈຸບັນນີ້ ແລະ ປະຈຸບັນ ປະຊາຊົນທີ່ຜ່ານທາງເສັ້ນນີ້ ແມ່ນມີຄວາມຫຍຸ້ງຍາກຫລາຍ ແຕ່ກໍ່ຈຳເປັນຕ້ອງອົດເພາະບ່ອນເຮັດວຽກກໍ່ຢູ່ແຄມທາງສາຍນີ້.
ຢ່າງໃດກໍ່ຕາມ ທີມຂ່າວໄດ້ລົງສຳຫລວດຕົວຈິງເຫັນວ່າເສັ້ນທາງດັ່ງກ່າວມີຄວາມຍາວ ທັງຫມົດປະມານ 500 ແມັດ, ກວ້າງຫລາຍກວ່າ 6 ແມັດ ແມ່ນໄດ້ເປ່ເພຫນັກເກືອບຫມົດເສັ້ນ ແລະ ສັງເກດໄດ້ທາງເສັ້ນນີ້ແມ່ນບໍ່ມີຮ່ອງລະບາຍນ້ຳ ຈິ່ງກໍ່ໃຫ້ເກີດມີນ້ຳຫົ້ງເປັນເຫດເຮັດໃຫ້ທາງເພໄວ ແລະ ການສັນຈອນຜ່ານເຂດນີ້ ແມ່ນມີຄວາມຫຍຸ້ງຍາກຫລາຍ ຂະນະທີ່ປະຊາຊົນໃກ້ຄຽງຮຽກຮ້ອງເຖິງພາກສ່ວນທີ່ກ່ຽວຂ້ອງຊ່ວຍລົງ ແກ້ໄຂດ່ວນ ເພາະນອກຈາກຈະສ້າງຄວາມຫຍຸ້ງຍາກໃນການໄປ-ມາແລ້ວ ຍັງເຮັດໃຫ້ບັນດາທຸລະກິດຫ້າງຮ້ານຂອງປະຊາຊົນໃນເຂດນັ້ນງຽບໄປນຳ ອີກ.
