ລາວວາງງົບອາເຊັມ 9 ຢູ່ທີ່ 240 ຕື້ ຊື້ພາຫະນະ ແລະ ບໍລິຫານ
ລັດຖະບານວາງງົບປະມານຮັບໃຊ້ກອງ ປະຊຸມສຸດຍອດອາຊີ-ເອີຣົບຄັ້ງທີ 9 (ASEM 9) ເພື່ອຈັດຊື້ອຸປະກອນ, ຮັບໃຊ້ວຽກງານບໍລິຫານ ແລະ ຈັດຊື້ພາຫະນະຮັບໃຊ້ຕ່າງໆທີ່ 240 ຕື້ກີບ, ຮັບປະກັນພຽງພໍຕາມຄວາມຕ້ອງການ.
ທ່ານ ພູເພັດ ຄຳພູນວົງ ລັດຖະມົນຕີວ່າການກະຊວງການເງິນ, ຫົວຫນ້າອະນຸກຳມະການງົບປະມານຮັບໃຊ້ກອງປະຊຸມອາເຊັມ 9 ໃຫ້ຮູ້ວ່າ: ຈາກການຄິດໄລ່ ແລະ ປະເມີນຜົນເບື້ອງຕົ້ນລັດວາງງົບປະມານຮັບໃຊ້ການຈັດກອງປະຊຸມສຸດ ຍອດອາເຊັມ 9 ທີ່ 270 ຕື້ກີບ, ແຕ່ຈາກການຫາລືຂອງອະນຸກຳມະການ ແລະ ຄິດໄລ່ຄືນອີກເທື່ອຫນຶ່ງ ໂດຍການຕັດສິ່ງທີ່ບໍ່ຈຳເປັນອອກ, ຫລ້າສຸດ ງົບປະມານທີ່ຈະຮັບໃຊ້ກອງປະຊຸມອາເຊັມ 9 ຢູ່ທີ່ 240 ຕື້ກີບ ແລະ ຮັບປະກັນວ່າທີ່ພຽງພໍກັບງານຄັ້ງສຳຄັນນີ້.
ໃນຈຳນວນ 240 ຕື້ກີບ ເປັນງົບປະມານພາຍໃນຂອງລັດຖະບານລາວທີ່ໃຊ້ເພື່ອຈັດຊື້ພາຫະນະ ເປັນຕົ້ນແມ່ນຊື້ລົດ Mercedes Ben ຮຸ່ນ S350 40 ຄັນ, ຮຸ່ນ E350 65 ຄັນ, ລົດ BMW 11 ຄັນ, ລົດ ໂຕໂຢຕາແຄມຣີ (TOYOTA CAMRY) 130 ຄັນ, ລົດຕູ້ໂຕໂຢຕາ 16 ບ່ອນນັ່ງ 10 ຄັນ, ລົດສະຫລາມ ປກສ 40 ຄັນ, ລົດຈັກມ້າຂາວຮອນດ້າ 1300cc 127 ຄັນ, 125cc 50 ຄັນ, ລົດແພດສຸກເສີນ 10ຄັນ, ລົດຖ່າຍທອດສົດທາງໂທລະພາບ 2 ຄັນ ແລະ ລົດຕູ້ສຳລັບຫມາຂອງເຈົ້າຫນ້າທີ່ ປກສ 2ຄັນ, ອີກຈຳນວນຫນຶ່ງ ເພື່ອຈັດຊື້ອຸປະກອນ, ຮັບໃຊ້ການບໍລິຫານ ແລະ ຮັກສາໄວ້ ເພື່ອຄວາມຕ້ອງການສຸກເສີນອີກຈຳນວນຫນຶ່ງ.
ນອກຈາກນັ້ນ, ຍັງມີທຶນທີ່ໄດ້ຮັບການຊ່ວຍເຫລືອລ້າ ແລະ ການກູ້ຢືມຈາກຕ່າງປະເທດອີກ, ໃນນັ້ນ ຫລາຍກວ່າຫມູ່ແມ່ນຈາກ ສປ ຈີນ ເປັນຕົ້ນແມ່ນ: ທຶນຊ່ວຍເຫລືອລ້າ 450 ລ້ານຢວນ (ລວມທັງສູນປະຊຸມ), ເງິນກູ້ດອກເບ້ຍຕ່ຳ 37 ລ້ານກວ່າໂດລາສະຫະລັດ, ລົດເມ 45 ບ່ອນນັ່ງ 10 ຄັນ ແລະ ລົດເກັງສະຫລາມ (Motor Cade) ຮັບໃຊ້ວຽກງານປ້ອງ ກັນຄວາມສະຫງົບ 4 ຄັນ, ພາກສ່ວນເອກະຊົນ ສສ ຫວຽດນາມ 5 ແສນໂດລາ ແລະ ເງິນກູ້ຢືມຈຳນວນຫນຶ່ງ, ປະເທດຍີ່ປຸ່ນ 1.935 ລ້ານເຢັນ ແລະ 3 ລ້ານໂດລາສະຫະລັດ, ປະເທດໄທ ຊ່ວຍ 6,3 ລ້ານໂດລາ (ຊ່ວຍເຫລືອລ້າ 30% ແລະ ກູ້ຢືມດອກເບ້ຍຕ່ຳ 70%), ປະເທດບຣູໄນ 5 ແສນໂດລາ ແລະ ສະຫະພາບເອີຣົບຊ່ວຍໃນການຖອດຖອນບົດຮຽນກ່ຽວກັບການຈັດກອງປະຊຸມ ສຸດຍອດອາເຊັມທີ່ປະເທດແບນຊິກ ແລະ ການໃຫ້ທຶນສຳມະນາຕ່າງໆເປັນມູນຄ່າ 125.000 ໂດລາສະຫະລັດ ແລະ ສະຫນອງນາຍແປພາສາໃນໄລຍະດຳເນີນກອງປະຊຸມອີກ 6 ພາສາ ພາສາລະ 3 ທ່ານ.
ພ້ອມດຽວກັນນັ້ນ, ຍັງໄດ້ຮັບການຊ່ວຍເຫລືອດ້ານການຝຶກອົບຮົມ ແລະ ອຸປະກອນຮັບໃຊ້ວຽກງານວິຊາສະເພາະເປັນຕົ້ນແມ່ນປະເທດອົດສະຕຣາ ລີສະຫນອງການຝຶກອົບຮົມພາສາ ອັງກິດໃຫ້ນັກແປພາສາ, ພະນັກງານຂັບລົດ ແລະ ວຽກງານພິທີການ, ປະເທດສິງກະໂປ ສະຫນອງການຈັດຝຶກອົບຮົມກ່ຽວກັບການຈັດກອງປະຊຸມສຸດຍອດອາເຊັມໃຫ້ ແກ່ພະນັກງານອາ ວຸໂສຂອງ ສປປ ລາວ, ສະຫນອງອຸປະກອນເຄື່ອງສຽງ ແລະ ອຸປະກອນຮັບໃຊ້ການແປພາສາ ແລະ ປະເທດປາກິດສະຖານສະຫນອງເຄື່ອງຄອມພິວເຕີ ແລະ ເຄື່ອງພິມເອກະສານຈຳນວນ 10 ຊຸດ.
ປະຈຸບັນ ວຽກງານດ້ານງົບປະມານມີຄວາມພ້ອມ, ການຈັດຊື້ອຸປະກອນ ແລະ ພາຫະນະຮັບໃຊ້ພຽງພໍຕາມຄວາມຕ້ອງການ, ຂະນະດຽວກັນ, ຫລັງຈາກສຳເລັດກອງປະຊຸມສຸດຍອດອາເຊັມພາຫະນະຈຳນວນຫນຶ່ງຈະມອບ ໃຫ້ພະນັກງານການນຳນຳໃຊ້ ແລະ ສ່ວນຫນຶ່ງຈະຂາຍອອກ ເພື່ອນຳເງິນເຂົ້າງົບປະມານລັດຄືນ, ທ່ານ ພູເພັດ ຄຳ ພູນວົງ ກ່າວ.
ມື້ແລງຈະໄປຟັງທ່ານບົວຣອຍຖະແຫຼງການບັນຫານີ້, ຖ້າພໍເປັນໄປໄດ້ ພະຍາຍາມຕັດຄໍາວ່າ
ໝາຍຄວາມວ່າອອກຫຼາຍໆແດ່ ຜູ່ຟັງຈຶ່ງຈະເຂົ້າໃຈງ່າຍຂຶ້ນ.
ຖ້າທ່ານມີເວລາກໍ່ເອົາເລື້ອງຄໍາທີ່ຜະລິດໄດ້ຈາກບໍ່ຄໍາພູເບັ້ຽມາເວົ້າແດ່ ເບິ່ງຮູບແລ້ວທ່ານຮູ້ສຶກ
ແນວໃດໃນເມື່ອຊັບສົມບັດຂອງຊາດຕ້ອງຕົກຢູ່ໃນກໍາມະສິດສ່ວນຕົວຂອງຜູ່ນໍາບາງຄົນ?
