ຊາວລາວ ບໍ່ເຫັນດີ ນຳກາຣ ທີ່ ທາງຣັຖບາລ ໃຫ້ກາຣ ຊ່ວຍເຫລືອ ແກ່ຊາວຈີນ ເຂົ້າມາຢູ່ ໃນລາວ.
ຊາວ ນະຄອນຫລວງ ວຽງຈັນ ບໍ່ເຫັນດີນຳ ແຜນກາຣຂອງ ຣັຖບາລ ທີ່ໃຫ້ຄວາມ ຊ່ວຍເຫລືອ ແກ່ຊາວຈີນ ໃຫ້ໄດ້ຢູ່ໃນລາວ ຈົນຫລາຍເກີນໄປ ຍ້ອນວ່າມັນ ກະທົບ ຕໍ່ຊີວິດ ກາຣເປັນຢູ່ ຂອງຄົນລາວ ໃນກາຣປະກອບ ອາຊີພຕ່າງໆ. ປັຈຈຸບັນ ໃນນະຄອນຫລວງ ວຽງຈັນ ກໍມີແຕ່ຊາວຈີນ ທີ່ເຊົ່າຢູ່ຕຶກອາຄາຣ ສ່ວນຄົນລາວ ທີ່ເປັນເຈົ້າຂອງ ຕ້ອງໄປອາສັຍຢູ່ ເຂຕນອກເມືອງ. ດັ່ງຊາວລາວ ຜູ້ໜຶ່ງເວົ້າວ່າ:
“ຄົນເຂົ້າ ປະເທສເຮົາ ຄັນບໍ່ມີເງິນ ຊີ່ເຂົ້າມາຢູ່ ກໍຊີ່ເປັນໄປ ໄດ້ຍາກ ຄັນຣັຖບາລ ບໍ່ຊ່ວຍ ອັນນີ້ກໍເປັນເຣື່ອງ ຂອງຜູ້ໃຫຍ່ ເຮົາກໍບໍ່ຮູ້ ມັນກ້າວກ່າຍ ບໍ່ໄດ້ ອັນນີ້ມັນ ເພາະວ່າຂະເຈົ້າມີ ທຸຣະກິຈ ມີຫຍັງ ເຮົາກໍບໍ່ຮູ້ໄດ້ ເພາະວ່າຜູ້ໃຫຍ່ ເພີ່ນອາຈຈະມີ ແຜນກາຣອີຫຍັງ ຂອງເພີ່ນ ກ່ຽວກັບ ບ້ານເມືອງເຮົາ ເຮົາກໍບໍ່ເຂົ້າໃຈ ເຮົາກໍອອກ ຄວາມຄິດເຫັນບໍ່ໄດ້ ມີແຕ່ວ່າເຮົາ ປະຊາຊົນ ຣາສດອນ ກໍຮູ້ສຶກວ່າມັນ ເດືອດຮ້ອນ ທຸກຢ່າງ ມັນກໍບໍ່ຄືເກົ່າ”.
ລາວໄດ້ເວົ້າອີກວ່າ ຜົລກະທົບ ທີ່ເຫັນປະຈັກຕາ ແທ້ໆນັ້ນ ກໍແມ່ນເຣື່ອງ ກາຣຄ້າຂາຍຕ່າງໆ ໂດຽມີພວກພໍ່ຄ້າ ແມ່ຄ້າຊາວລາວ ຈຳນວນຫລວງຫລາຍ ຕ້ອງໄດ້ເຊົາອາຊີພ ຄ້າຂາຍ ຂອງພວກຕົນ ຍ້ອນວ່າສູ້ ສິນຄ້າ ຣາຄາຖືກ ຂອງຊາວຈີນບໍ່ໄດ້ ຊື່ງບາງເທື່ອກໍຂາຍ ໃນຣາຄາ ທີ່ຕໍ່າກວ່າຕົ້ນທຶນ ແຕ່ກໍຍັງໄດ້ກຳໄຣ ຈາກກາຣຂາຍ ສິນຄ້າອື່ນນຳອີກ. ກາຣທີ່ຣັຖບາລ ອະນຸຍາຕໃຫ້ ຊາວຕ່າງປະເທສ ເຂົ້າໄປຢູ່ໃນ ນະຄອນຫລວງ ວຽງຈັນ ຫລາຍເຊັ່ນນີ້ ມີຜົລເສັຍຫາຍ ຢ່າງຫລວງຫລາຍ:
“ຕາມຄວາມເຫັນ ສ່ວນຕົວ ຂະເຈົ້າເຂົ້າມາບ້ານ ເຮົາຫລາຍ ກໍເຮັດໃຫ້ເຮົາ ທຳມາຫາກິນ ມັນກໍລຳບາກ ເຖີງວ່າບ້ານເມືອງ ຂະເຈົ້າ ອາຈຈະຂັດສົນ ບາດນີ້ຂະເຈົ້າ ມາບ້ານເຮົາ ອັນໃດຂະເຈົ້າ ກໍເຮັດໝົດ ຄົນລາວ ກໍຈະບໍ່ມີ ວຽກເຮັດ ຄົນລາວເຮົາ ກໍຈະເດືອດຮ້ອນ ມີອັນໃດຂະເຈົ້າ ກໍມາເຮັດ ແທນເຮົາໝົດ ບາດນີ້ທາງເຮົາ ຫາວຽກເຮັດງານທຳກໍຍາກ ເສຖກິຈ ອີຫຍັງ ກໍລຳບາກ”.
ຊາວນະຄອນຫລວງ ວຽງຈັນ ຜູ້ນີ້ ໄດ້ເວົ້າຢ້ຳທ້າຍວ່າ ຖ້າທາງກາຣ ບໍ່ໃຫ້ກາຣຊ່ວຍເຫລືອ ຫລື ມີກາຣກວດກາ ໃນເຣື່ອງກາຣ ອອກວີຊ໋າ ຢ່າງເຂັ້ມງວດ ແທ້ໆນັ້ນ ມັນກໍເປັນໄປໄດ້ຍາກ ທີ່ຈະມີຊາວຈີນ ເຂົ້າໄປອາສັຍ ຢູ່ໃນເມືອງຫລວງ ຂອງລາວ ໄດ້ຫລວງຫລາຍ ເຖີງຂນາດນີ້.
