ໃບຕາດິນຢູ່ລາວ ສູງກ່ວາ ລາຄາຊື້ທີ່ດິນ !!
ກາຍເປັນບັນຫາທີ່ແກ່ຍາວມາຫລາຍປີ ສຳລັບຄວາມຫຍຸ້ງຍາກໃນເວລາເຮັດໃບຕາດິນຂອງພໍ່ແມ່ປະຊາຊົນ ເປັນຕົ້ນແມ່ນບັນຫາຄວາມຫລ້າຊ້າໃນການອອກໃບຕາດິນຂອງ ເຈົ້າຫນ້າທີ່ ລວມທັງລາຄາໃບຕາດິນທີ່ເຫັນວ່າເພີ່ມທະວີຄູນແພງຂຶ້ນທຸກໆປີ ຈົນເກືອບເທົ່າກັບລາຄາດິນເຮັດໃຫ້ປະຊາຊົນບາງຄົນຢູ່ເຂດຫ່າງໄກ ບໍ່ກ້າທີ່ຈະເຂົ້າມາເຮັດໃບຕາດິນທີ່ຈະເຊື່ອມໂຍງເຖິງການເສຍສິດ ນຳໃຊ້ທາງດ້ານກົດຫມາຍໄດ້ ແນວໃດກໍ່ດີ ຕໍ່ບັນຫານີ້ກົມຄຸ້ມຄອງທີ່ດິນຊີ້ແຈງວ່າ ສາເຫດຫລັກແມ່ນເກີດຈາກນາຍຫນ້າ.
ທ່ານ ສີພັນດອນ ສີຫາວົງ ຫົວຫນ້າກົມຄຸ້ມຄອງທີ່ດິນກະຊວງຊັບພະຍາກອນ ແລະ ສິ່ງແວດລ້ອມ ໄດ້ໃຫ້ສຳພາດພິເສດຕໍ່ທີມຂ່າວເສດຖະກິດ ເມື່ອອາທິດຜ່ານມານີ້ຮູ້ວ່າ: ສາເຫດແທ້ຈິງທີ່ເຮັດໃຫ້ໃບຕາດິນມີລາຄາສູງ ເນື່ອງຈາກວ່າປະຊາຊົນບາງບຸກຄົນທີ່ຮູ້ເທົ່າບໍ່ເຖິງການ ເມື່ອມີດິນຕ້ອງການເຮັດໃບຕາດິນຖາວອນກໍ່ໄປຫານາຍຫນ້າໃນການແລ່ນ ເອກະສານຕ່າງໆ ເພື່ອປະກອບເຮັດໃບຕາດິນນຳເຈົ້າຫນ້າທີ່ (ບໍ່ເຂົ້າຫາເຈົ້າຫນ້າທີ່ໂລດ) ໂດຍນາຍຫນ້າອາດເອີ້ນເອົາລາຄາທີ່ສູງກວ່າ ຄວາມເປັນຈິງນຳເຈົ້າຂອງທີ່ດິນ ຫລື ອາດຈະສູງເກືອບເທົ່າກັບລາຄາຂອງດິນຕອນທີ່ຕ້ອງການໃບຕາດິນນັ້ນ.
ນອກຈາກນາຍຫນ້າແລ້ວ ທ່ານ ສີພັນດອນ ສີຫາວົງ ຍອມຮັບວ່າ: ເຈົ້າຫນ້າທີ່ກ່ຽວຂ້ອງຂອງລັດ ໂດຍສະພາະແມ່ນພະນັກງານອອກໃບຕາດິນບາງບຸກຄົນກໍ່ມີການຮ່ວມຄິດ ກັບນາຍຫນ້າ ພ້ອມສວຍໃຊ້ຖານະຕຳແຫນ່ງຂອງຕົນໃນການຖ່ວງດຶງຄວາມຫລ້າຊ້າຂອງການ ອະນຸຍາດອອກໃບຕາດິນເປັນຕົ້ນແມ່ນໃນການອອກລາຍເຊັນ.
ຕໍ່ບັນຫນີ້ ກົມຄຸ້ມຄອງທີ່ດິນໄດ້ມີຄວາມເອົາໃຈໃສ່ຢ່າງຈິງຈັງໃນການເອົາ ພະນັກງານຈາກສູນກາງລົງໂອ້ລົມພະນັກງານທີ່ດິນຂັ້ນທ້ອງຖິ່ນທີ່ ເຮັດວຽກສະເພາະດ້ານເປັນຕົ້ນແມ່ນສຶກສາອົບຮົມການເມືອງແນວຄິດ ແລະ ຫລັກຈັນຍາບັນຂອງພະນັກງານລັດ ຖ້າກວດສອບເຫັນພະນັກງານບຸກຄົນໃດມີການປະພຶດບໍ່ດີກໍ່ຈະຖືກ ລົງໂທດຕາມລະບຽບວິໄນ ພ້ອມໃຊ້ແທນຄ່າເສຍຫາຍ ຂະນະທີ່ທ່ານຫົວຫນ້າກົມຄຸ້ມຄອງທີ່ດິນກ່າວວ່າຜ່ານມາເຖິງຂັ້ນ ຍົກຍ້າຍຫນ້າທີ່ ຫລື ປົດຕຳແຫນ່ງພະນັກງານທີ່ດິນທີ່ມີການກະທຳຜິດ.
ທ່ານ ສີພັນດອນ ສີຫາວົງ ກ່າວຢືນຢັນຕໍ່ທີມຂ່າວຕື່ມວ່າ: ການໃຊ້ຈ່າຍໃນເມື່ອເຮັດໃບຕາດິນຖາວອນຂອງພໍ່ແມ່ນປະຊາຊົນຕາມ ລະບຽບແລ້ວເນື້ອທີ່ດິນ 1 ເຮັກຕາ ກໍ່ຈະໃຊ້ຈ່າຍລວມມີຄ່າທຳນຽມ, ຄ່າວັດແທກ ແລະ ໃຊ້ຈ່າຍອື່ນໆຖ້າສູງສຸດກໍ່ປະມານ 300.000 ກີບ (ດິນໃນຕົວເມືອງ) ສ່ວນເຂດຊົນນະບົດກໍ່ປະມານ 250.000 ກີບ.
ແນວໃດກໍ່ດີ ໃບຕາດິນແມ່ນເອກະສານຢັ້ງຢືນສິດນຳໃຊ້ທີ່ດິນສູງສຸດທາງດ້ານ ກົດຫມາຍແມ່ນເອກະສານທີ່ເປັນຫລັກຖານຕົ້ນຕໍອັນຫນຶ່ງອັນດຽວກ່ຽວ ກັບສິດນຳໃຊ້ທີ່ດິນຢ່າງຖາວອນ ລວມທັງເປັນສີ່ງທີ່ສາມາດຄ້ຳປະກັນສິດຂອບເຂດການນຳໃຊ້ທີ່ດິນຕາມ ລັດຖະທຳມະນູນໄດ້ກຳນົດໃນມາດຕາ 17 ອັນໄດ້ເຮັດໃຫ້ປະຊາຊົນມີຄວາມຫມັ້ນໃຈໃນການນຳໃຊ້ທີ່ດິນຂອງ ເຂົາເຈົ້າຄືດິນຖືກປົກປ້ອງດ້ວຍລັດ, ຫັນດິນມາເປັນທຶນ ແລະ ເປັນຫລັກຊັບຄ້ຳປະກັນໄດ້ທີ່ຈະຍູ້ການຜະລິດເຮັດໃຫ້ປະຊາຊົນຫລຸດ ພົ້ນອອກຈາກຄວາມທຸກຍາກເທື່ອລະກ້າວ.
ບັນຫາທີ່ຍົກມາຂ້າງເທິງນີ້ ກໍ່ອາດຈະເປັນເສັ້ນໃຍທີ່ຖ່ວງດຶງການພັດທະນາກໍ່ຄືປະຊາຊົນ ໃຫ້ຫລຸດພົ້ນຈາກຄວາມທຸກຍາກຊ້າລົງອີກ ພ້ອມຈະເປັນບັນຫາຕໍ່ເປົ້າຫມາຍຂອງລັດຖະບານ ໂດຍໄດ້ຕັ້ງເປົ້າໄວ້ຮອດປີ 2015 ການອອກໃບຕາດິນໃນທົ່ວປະເທດຈະຕ້ອງບັນລຸໄດ້ 1 ລ້ານຕອນ ເຊິ່ງປະຈຸບັນໄດ້ແລ້ວ 6,5 ແສນຕອນ ສະນັ້ນ ເຈົ້າຫນ້າທີ່ກ່ຽວຂ້ອງ ໂດຍສະເພາະແມ່ນດ້ານມະຫາພາກກໍ່ຄວນລົງຕິດຕາມກວດກາແກ້ໄຂບັນຫາ ນີ້ ຢ່າງຮີບດ່ວນ ເພື່ອຫລຸດຜ່ອນ ແລະ ລົບຫາງສຽງຈົ່ມບໍ່ດີຂອງປະຊົນຕໍ່ພະນັກລັດບາງຄົນທີ່ເອົາປຽບ ປະຊາຊົນ, ສ້າງຄວາມສະຫມານສາມັກຄີ ແລະ ຄວາມເຂົ້າໃຈລະຫວ່າງປະຊາຊົນກັບລັດ ເພື່ອພ້ອມກັນກ້າວຂຶ້ນສູ່ສັງຄົມນິຍົມທີ່ມີຄວາມສີວິໄລ ແລະ ຄວາມສົມບູນພູນສຸກໃນອະນາຄົດ.
